Read Iloko 2 Timothy 2 Bible Online

2 Timothy 2 - Iloko bible

2 Timothy 2

¹No maipapan kenka, anakko, bumilegka koma babaen iti parabur a kukuatayo iti pannakikaysatayo ken ni Cristo Jesus.

²Ikumitmo kadagiti tattao a mapagtalkan dagiti pannursuro a nangngegmo nga inkasabak iti sangoanan ti adu a saksi. Isudanto met ti mangisuro kadagiti sabali.

³Makipagsagabaka a kas napudno a soldado ni Cristo Jesus.

⁴Ti soldado nga adda iti serbisio, tarigagayanna a maay-ayo kenkuana ti ofisialna. Iti kasta, adaywanna dagiti inaldaw a parikut ti biag ti sibilian.

⁵Ti makilumba saanna a magun-od ti premio no dina suroten amin a pagannurotan ti salisal.

⁶Ti naanep nga agtaltalon masapul nga isu ti umuna nga aglak-am iti bunga ti nagbannoganna.

⁷Amirisem ti sasawek agsipud ta ikkannakanto ti Apo iti kabaelan tapno maawatam ti amin a banag.

⁸Lagipem ni Jesu-Cristo a napagungar, isu a nagtaud iti kaputotan ni David. Daytoy ti mensahe ti Naimbag a Damag nga ikaskasabak.

⁹Gapu ta ikasabak ti Naimbag a Damag, agsagabaak ket makawaranak pay a kas maysa a kriminal. Ngem saan a makawaran ti sao ti Dios.

¹⁰Isut' gapuna nga ibturak ti amin gapu kadagiti napili a tattao ti Dios tapno awatendanto met ti pannakaisalakan nga adda ken ni Cristo Jesus, agraman ti agnanayon a gloria.

¹¹Pudno daytoy a pagsasao: “No nairamantayo kenkuana a natay, kaduatayonto met nga agbiag.

¹²No makaibturtayo, makipagturaytayto met kenkuana. No kunatayo a saantayo nga am-ammo, kunananto met a dinatay am-ammo.

¹³No pagtallikudantayo, agtalinaed latta a sipupudno, agsipud ta dina mabalin a pagtallikudan ti bagina.”

¹⁴Palagipam dagiti tattao, ket bilinem ida iti sangoanan ti Dios a dida pagsusuppiatan dagiti sasao nga awan imbag nga ibungana, ngem dadaelenna laeng dagiti agdengngeg.

¹⁵Aramidem ti amin a kabaelam a manggun-od iti pananganamong ti Dios, kas maysa nga adipen ni Cristo a di mangibain iti trabahona ken husto ti panangisurona iti mensahe ti kinapudno.

¹⁶Liklikam dagiti saan a nadiosan a panagsasao ken minamaag a panagsusuppiat nga ad-adda a mangyadayo laeng kadagiti tattao iti Dios.

¹⁷Mayarig ti pannursuroda iti sakit a kanser nga agwaras ken mangdadael iti entero a bagi. Dua kadagitoy a maestro isuda da Himeneo ken Fileto.

¹⁸Simmiasidan iti dalan ti kinapudno ket rirriribukenda ti pammati dagiti dadduma babaen iti panagkunada a napasamaken ti panagungar.

¹⁹Ngem natibker ken di magunggon ti fondasion nga impasdek ti Dios. Nailanad dagitoy a balikas: “Ammo ti Apo no siasino dagiti tattaona,” ken “Siasinoman nga agkuna a mamati iti Apo, masapul nga adaywanna dagiti dakes nga aramid.”

²⁰Iti dakkel a balay, adda amin a kita ti pinggan ken malukong. Adda naaramid iti pirak ken balitok. Adda met kayo ken damili. Adda para iti naisangsangayan a pasken, ket adda met dagiti agpaay kadagiti kadawyan nga aldaw.

²¹No adda mangdalus iti bagina kadagitoy dakes a bambanag, agbalinto a kas iti alikamen nga agpaay iti Apona ken sidadaan nga agserbi iti aniaman a nasantoan a panggep.

²²Dimo ipalubos nga iturayannaka ti rugso ti kinaagtutubo. Ikagumaam ketdi ti agbiag a nalinteg, napudno iti pammati; ayatem dagiti padam a Kristiano ken makikappiaka kadakuada.

²³Adaywam dagiti minamaag a panagsusuppiat nga agtaud iti kina-ignorante ta ammom nga agtungpalda iti panagriringgor.

²⁴Masapul a saan a makiringringgor ti adipen ti Apo. Masapul a naasi iti amin a tattao, nalaing ken naanus a maestro;

²⁵nasingpet ken naannad a mangpatigmaan kadagiti kabusorna, bareng no ikkanto ida ti Dios iti gundaway nga agbabawi ket maammoanda ti pudno.

²⁶Iti kasta, agsublida iti nasayaat a panunotda ket makaruk-atda iti palab-og ti Diablo a nangtiliw kadakuada tapno aramidenda ti pagayatanna.