Read Iloko 2 Timothy 4 Bible Online

2 Timothy 4 - Iloko bible

2 Timothy 4

¹Iti imatang ti Dios ken ni Cristo Jesus a mangukomto kadagiti amin a tattao, natay man wenno sibibiag, ken gapu iti yaayna a mangituray a kas Ari, yunay-unayko

²nga ikasabam ti mensahe. Wen, agawaam nga ipakaammo, nasayaat man wenno dakes ti tiempo. Mangallukoy, mangtubngar ken mangbalakadka. Mangisuroka a siaanus.

³Dumtengto ti tiempo a di ipangag dagiti tattao ti pudno a pannursuro, ngem surotendanto dagiti tarigagayda, ket dawatendanto iti ad-adu pay a maestro a mangibaga kadakuada iti pagay-ayatda a dengdenggen.

⁴Saandanto a kayat a denggen ti pudno, ket ad-addanto a mamatida kadagiti parbo a sarsarita.

⁵Ngem masapul nga agtalinaedka latta iti kinamanagparbengmo. Ibturam ti panagsagaba. Annongem ti trabaho a kas mangaskasaba iti Naimbag a Damag. Aramidem amin a pagrebbengam a kas adipen ti Dios.

⁶No maipapan kaniak, dimtengen ti oras a pannakaidatonko. Adtoyen ti tiempo nga isisinak iti daytoy a biag.

⁷Inaramidko ti amin a kabaelak iti salisal. Nadanonkon ti pagpatinggaan ti lumba. Nagtalinaedak iti pammati.

⁸Ita, agur-urayen kaniak ti gunggona ti balligi, ti korona ti kinalinteg nga ited ti Apo, ti nalinteg nga Ukom, iti dayta nga Aldaw—ket saan la nga agpaay kaniak no di ket kadagiti amin a siaayat nga agur-uray iti yaayna.

⁹Ikarigatam ti umay kaniak iti mabiit.

¹⁰Nakayawan ni Demas iti daytoy agdama a lubong ket binaybay-annak. Napanen idiay Tesalonica. Napan ni Cresente idiay Galacia ket nagturong met ni Tito idiay Dalmacia.

¹¹Ni laeng Lucas ti adda iti dennak. Dagasem ni Marcos ket itugotmo ditoy, ta makatulong kaniak iti trabaho.

¹²Imbaonko ni Tikico idiay Efeso.

¹³Inton umayka, pakialam ti kagayko a nabatik ken ni Carpo idiay Troas. Itugotmo met dagiti librok, nangruna dagiti pagsuratan.

¹⁴Adu ti dakes nga inaramid kaniak ni Alejandro a mammanday. Dusaento ti Dios gapu iti inaramidna.

¹⁵Agannadka met kenkuana ta binusorna a sipipinget ti mensahetayo.

¹⁶Idi damo a pannakausigko, awan ti nagtestigo a mangikalintegan kaniak. Binaybay-annak ti tunggal maysa. Sapay koma ta saanda a mapabasol gapu iti daytoy.

¹⁷Nupay kasta, tinulongannak ti Apo ket pinapigsanak, isu a nabalinak nga impakaammo ti sibubukel a mensahe tapno mangngeg ti amin a Hentil. Iti kasta, naisalakanak iti ngiwat ti leon.

¹⁸Ispalennakto ti Apo iti amin a kinadakes, ket alaennakto nga awan pakaan-anoak iti nailangitan a Pagarianna. Maipaay koma kenkuana ti dayag nga awan inggana! Amen.

¹⁹Pakomustaam da Priscila ken Akila ken ti familia ni Onesiforo.

²⁰Nagyan ni Erasto idiay Corinto, ket imbatik ni Trofimo idiay Mileto ta masakit.

²¹Ikagumaam ti umay sakbay ti lam-ek. Komustaka kano, kuna da Eubulo, Pudente, Lino ken Claudia, kasta met dagiti amin a kakabsat.

²²Sapay koma ta adda ti Apo iti espiritum. Sapay koma ta adda kadakayo amin ti parabur ti Dios.