Read Iloko Titus 1 Bible Online

Titus 1 - Iloko bible

Titus 1

¹Kenka, Tito, a napaypayso nga anakko iti pammati nga adda kadatay amin: Sapay koma ta parabur ken talna ti ited ti Dios Ama ken ni Cristo Jesus a Mangisalakan kadatayo. Siak, ni Pablo nga adipen ti Dios ken apostol ni Jesu-Cristo, ti naggapuan daytoy a surat. Naibaonak a tumulong kadagiti tattao tapno maidalanda iti kinapudno ken kinasanto. Naibatay daytoy iti namnama iti biag nga agnanayon nga inkari ti Dios sakbay ti panangrugi daytoy a lubong. Saan nga agulbod ti Dios. Iti intudingna a tiempo, impaltiingna daytoy a namnama iti mensahena a naitalek kaniak ket ipakaammok babaen iti bilin ti Dios a Mangisalakan kadatayo.

⁵Imbatika dita Creta tapno urnosem dagiti amin a masapul a maurnos ket mangdutokka kadagiti panglakayen ti iglesia iti tunggal ili. Laglagipem ti imbalakadko:

⁶Masapul nga awan pakapilawan ti maysa a panglakayen. Maysa la ti asawana. Mamati dagiti annakna ket awan pakasarsaritaanda a dakes ken saanda a nasukir.

⁷Agsipud ta isu ti katalek ti Dios a mangimaton iti iglesia, masapul nga awan ti pakapilawanna. Saan a natangsit wenno nalaka nga agpungtot. Saan a mammartek wenno naranggas wenno naagum.

⁸Masapul a managpadagus, naayat iti naimbag, nateppel, nalinteg, nasantoan ken naparbeng.

⁹Masapul a salimetmetanna ti mapagtalkan a mensahe a kas mayannurot iti pannursuro tapno maallukoyna dagiti dadduma iti pudno a pannursuro ken masungbatanna dagiti sumuppiat iti daytoy.

¹⁰Ngamin, adu ti nasukir ken manangallilaw, nangruna dagiti mangipapilit iti pannakakugit. Awan serserbi ti sao dagitoy.

¹¹Pasardengem ida agsipud ta riribukenda dagiti adu a familia babaen iti panangisuroda kadagiti saan a maiparbeng tapno makakuartada laeng.

¹²Maysa kadagiti profetada ti mismo a nagkuna: “Ulbod a namimpinsan dagiti Cretano. Naagum ken sadutda, kasdala narungsot nga ayup.”

¹³Pudno ti imbagana. Gapu iti daytoy, dika agamak a mangbabalaw kadakuada tapno nasalun-atda iti pammati,

¹⁴ket didan denggen dagiti sarsarita a pinarbo dagiti Judio ken dagiti bilin nga impaulog dagiti tattao a simmina iti kinapudno.

¹⁵Kadagiti nadalus, nadalus amin a banag. Ngem kadagiti natulawan ken awanan pammati, awan ti nadalus, agsipud ta narugit ti isip ken konsensiada.

¹⁶Kunada nga ammoda ti Dios ngem makita kadagiti aramidda a dida am-ammo ti Dios. Nakarimrimon ken nasukirda, ket dida maikari nga agaramid iti naimbag.