Read Iloko Titus 3 Bible Online

Titus 3 - Iloko bible

Titus 3

¹Ipalagipmo kadagiti agdengngeg kenka a rebbengda ti agtungpal kadagiti turayen ken pannakabagi ti gobierno. Sisasaganada koma nga agaramid iti naimbag.

²Ibagam kadakuada a dida mamadpadakes wenno makiringgor, no di ket naparbeng ken mannakigayyemda koma. Natakneng koma a kanayon ti pannakilangenda iti amin a tattao.

³Ta maag, nasukir ken nayaw-awantayo met idi. Tinagabunatayo ti nadumaduma a kita ti tarigagay ken paggarteman. Nagbiagtayo iti dakes a panagem ken apal. Ginuradatayo dagiti sabsabali ket ginuratayo met ida.

⁴Ngem idi naiparang ti asi ken ayat ti Dios a Mangisalakan kadatayo,

⁵insalakannatayo, saan a gapu iti aniaman a nasayaat nga inaramidtayo no di ket gapu iti asina kadatayo. Wen, naisalakantayo babaen iti panangugasna iti danum, ket gapu iti daytoy, naipasngaytay iti baro a biag babaen iti Espiritu Santo.

⁶Sibubuslon nga inted ti Dios ti Espiritu Santo babaen ken ni Jesu-Cristo a Mangisalakan kadatayo

⁷tapno babaen iti paraburna, mapalintegtay iti sangoanan ti Dios ket maaddaantay iti biag nga agnanayon a namnamatayo.

⁸Pudno dagitoy a pannursuro. Kayatko a yunay-unaymo dagitoy a bambanag tapno dagiti mamati iti Dios nareggetda nga agaramid iti naimbag. Nasayaat ken naserbi dagitoy a pammagbaga iti amin.

⁹Ngem adaywam dagiti minamaag a panagsusuppiat, dagiti saan nga aggibus a pakasaritaan dagiti kapuonan, panagsususik ken panagsusuppiat maipapan iti Linteg. Awan serserbi dagitoy ket awan maitedda.

¹⁰No maipapan iti tao a pagtaudan ti panagsisina, ballaagam iti maminsan wenno mamindua ket no di pay la dumngeg, saanmon a pakibiangan.

¹¹Mabigbigmo a dakes ti panagbiag dayta a tao, ket dagiti basolna ti mismo a mangipaneknek iti panagbiddutna.

¹²Apaman a maibaonko kenka ni Artemas wenno ni Tikico, ikarigatam ti umay kaniak idiay Nicopolis, ta napanunotko a palabasen sadiay ti tiempo ti lam-ek.

¹³Ikagumaam a tulongan ni abogado Zenas ken ni Apolos tapno mairubbuatda ti biaheda. Kitaem ta adda koma amin a masapulda.

¹⁴Masapul a sursuroen dagiti tattaotayo nga agaramid iti naimbag tapno makatulongda iti pudno a pakasapulan ken agbiagda a naserbi.

¹⁵Komustaka kano kuna dagiti amin a kakaduak ditoy. Pakomustaam met dagiti gagayyem iti pammati a mangipatpateg kadatayo. Sapay koma ta adda kadakay amin ti parabur ti Dios.