Read Iloko Philemon 1 Bible Online

Philemon 1 - Iloko bible

Philemon 1

¹Patgenmi a Filemon a gayyem ken katrabahoanmi, Sapay koma ta adda kadakayo ti parabur ken talna nga aggapu iti Dios nga Amatayo ken ni Apo Jesu-Cristo. Agpaay daytoy a surat kenka, kadagiti kameng ti iglesia nga aggigimong iti balaymo, kasta met ken ni Apia a kabsattayo a babai, ken ni Arkipo a kaduami a soldado ni Cristo. Dakami ti nagsurat—ni Timoteo a kabsattay iti pammati ken siak, ni Pablo a balud a maigapu ken ni Cristo Jesus.

⁴Kabsat a Filemon, diak liwayan ti agyaman iti Diosko ket ibabaetka tunggal agkararagak.

⁵Ta madamdamagko ti ayatmo kadagiti amin a tattao ti Dios, kasta met ti pammatim ken ni Apo Jesus.

⁶Ikarkararagko a ti panaglalangentayo iti pammati, agbunga koma iti naun-uneg pay a pannakaawat kadagiti amin a bendision nga adda kadatayo iti panagbiagtayo ken ni Cristo.

⁷Pinaragsak ken pinaregtanak ti ayatmo, ingungotek a kabsat. Pinaragsakmo dagiti amin a tattao ti Dios.

⁸Kas kabsatmo ken ni Cristo, agturedak a mangbilin kenka iti rumbeng nga aramidem.

⁹Ngem gapu ta napategka kaniak, kaykayatko ti agpakpakaasi kenka. Aramidek daytoy, nupay siak, ni Pablo, maysaak a pannakabagi ni Cristo Jesus, ken agdama met a balud gapu kenkuana.

¹⁰Agdawatak ngarud kenka gapu ken ni Onesimo nga anakko ken ni Cristo. Ta kabayatan ti kaaddak iti pagbaludan, nagbalinak a pannakaamana iti pannakainaigmi ken ni Cristo.

¹¹Awan idi ti serserbi ni Onesimo kenka ngem ita, makatulongen kadata.

¹²Pagsubliekon kenka ni Onesimo nga ikuyogna daytoy pusok.

¹³Kayatko koma a makipagyan pay kaniak ditoy bayat ti pannakaibaludko gapu iti ebanghelio, tapno isu ti sunom a tumulong kaniak.

¹⁴Nupay kasta, dika piliten a tumulong kaniak, no di ket kayatko koma nga aramidem daytoy nga agubbog iti nakemmo. Isut' gapuna a diak aramiden ti aniaman no dika umanamong.

¹⁵Nalabit nga immadayo kenka ni Onesimo iti apagbiit tapno agsubli met laeng kenka iti agnanayon.

¹⁶Ket itan, saan laengen a kas tagabu, no di ket nangatngato pay ngem tagabu: Maysan a napateg a kabsat ken ni Cristo. Napateg unay kaniak, ket ad-adda pay koma ti panangipategmo kenkuana a kas tao itan ta kabsatmo iti Apo.

¹⁷No ibilangnak met la a kaduam, awatem ngarud ti isusubli ni Onesimo kenka a kas iti panangawatmo koma kaniak.

¹⁸No adda basol wenno utangna kenka, siakto ti singirem.

¹⁹Kitaem, siak a mismo ti agsurat ken agfirma iti daytoy: Siak ni Pablo. Agbayadakto kenka. (Saanen a masapul nga ipalagipko kenka nga utangmo kaniak dayta biagmo.)

²⁰Isut' gapuna, kabsatko, a patgam kadi daytoy dawatko, ket ipagpagapum iti Apo. Kas maysa a kabsat ken ni Cristo, paragsakennak kadi.

²¹Bayat ti panangisuratko iti daytoy, kapkapnekak a patgamto daytoy a dawatko. Kinapudnona, ammok nga aramidemto ti nasursurok pay ngem ti dawatko.

²²Maysa pay, di la mabalin nga isaganaannak iti kuarto a pagyanak? Mangnamnamaak nga ipangagto ti Dios dagiti karkararagyo amin, ket pagsubliennakto kadakayo.

²³Komustakayo kano kuna ni Epafras a kaduak ditoy pagbaludan gapu ken ni Cristo Jesus.

²⁴Agpakomusta met dagiti katrabahoak, da Marcos, Aristarco, Demas, ken Lucas.

²⁵Sapay koma ta adda kadakayo amin ti parabur ni Apo Jesu-Cristo.