Read Iloko Hebrews 1 Bible Online

Hebrews 1 - Iloko bible

Hebrews 1

¹Kadagidi un-unana nga aldaw, nagsao ti Dios kadagidi kapuonantayo iti namin-adu a daras ken iti nadumaduma a wagas babaen kadagiti profeta.

²Ngem kadagitoy maudi nga aldaw, nagsao kadatayo babaen iti Anakna. Pinarsua ti Dios ti amin a lubong babaen kenkuana, ket isu ti pinilina nga agtagikua kadagiti amin a banag.

³Ti Anak ti mangipakita iti dayag ti Dios. Isu ti napaypayso a ladawan ti kinadiosna. Isu pay ti mangtartarawidwid iti amin a lubong babaen iti mannakabalin a saona. Kalpasan ti pananggun-odna iti pannakapakawan ti basol ti sangkataoan, nagtugaw sadi langit iti makannawan ti Kangatoan a Pannakabalin.

⁴Naaramid ti Anak a naturturay ngem dagiti angheles. Nadaydayaw met ti naganna nga inted ti Dios ngem ti naganda.

⁵Awan a pulos kadagiti angheles ti nangibagaan ti Dios, “Sika ti Anakko; Ita nga aldaw, nagbalinak nga Amam.” Awan met ti anghel a nangikarianna, “Siakto ti Amana, Ket isunto ti Anakko.”

⁶Ngem kuna ti Dios idi dandanina ibaon ti inauna nga Anakna ditoy lubong, “Masapul nga agdaydayaw kenkuana dagiti amin nga angheles ti Dios.”

⁷Daytoy ti kuna ti Dios no maipapan kadagiti angheles: “Pagbalinen ti Dios nga angin dagiti anghelesna. Pagbalinenna met a sumsumged nga apuy dagiti adipenna.”

⁸Ngem no maipapan iti Anak, kunana daytoy: “Ti tronom, O Dios, agnanayon nga awan patinggana! Agturayka a sililinteg iti pagariam.

⁹Inayatmo ti kinalinteg ket ginuram ti kinadakes. Isut' gapuna a pinilinaka ti Dios; wen, ti Diosmo. Ket linanaannaka iti rag-o—inikkannaka iti dayaw a dakdakkel ngem ti intedna kadagiti kakaduam.”

¹⁰Kunana pay, “Sika, Apo, ti nangparsua iti daga idi punganay, Ket dagiti langit aramid dagiti imam.

¹¹Mapukawdanto, ngem mataginayonka. Dumaandanto amin a kas pagan-anay.

¹²Kupinemto ida a kas iti kagay, ket masukatandanto a kas pagan-anay, ngem pulos a dika agbalbaliw, ket ti biagmo dinto agpatingga.”

¹³Awan a pulos kadagiti angheles ti nagkunaan ti Dios iti kastoy: “Agtugawka ditoy makannawanko, agingga a maparmekko dagiti kabusormo ket addada iti babaem.”

¹⁴Siasino ngarud dagiti angheles? Espirituda nga agserserbi iti Dios ket imbaonna ida a tumulong kadagiti umawat iti pannakaisalakan.