Read Iloko Hebrews 10 Bible Online

Hebrews 10 - Iloko bible

Hebrews 10

¹Saan a naan-anay ti Linteg dagiti Judio; saan met a pudno a pagtuladan kadagiti napaypayso a bambanag. Anniniwanda laeng dagiti naimbag a bambanag nga umayto. Tinawen a maidatag ti isu met laeng a kita ti daton. Ni kaanoman saan a kabaelan ti Linteg a pagbalinen a naan-anay dagiti tattao nga umasideg iti Dios babaen kadagitoy a daton.

²Ta no agpayso a maugasan ti basol dagiti agdaydayaw iti Dios, awan koman ti riknada a nakabasol, ket agsardengda metten nga agidaton.

³Nupay kasta, tinawen nga ipalagip dagitoy a daton ti basol dagiti tattao.

⁴Saan a kabaelan ti dara dagiti baka ken kalding nga ikkaten dagiti basol.

⁵Daytoy ti gapuna nga idi umayen ni Cristo ditoy lubong, kinunana iti Dios: “Dimo tarigagayan dagiti sakrifisio ken daton, ngem insaganaannak iti maysa a bagi.

⁶Dika maragsakan kadagiti daton a mapuoran iti altar, wenno dagiti daton a mangikkat kadagiti basbasol.

⁷Iti kasta, kinunak, ‘Adtoyak, O Dios, a mangaramid iti pagayatam, Kas naisurat iti maipapan kaniak iti libro ti Linteg.’”

⁸Umuna, kinunana, “Dimo tarigagayan ken dika maragsakan kadagiti sakrifisio ken datdaton ken animal a mapuoran iti altar ken kadagiti daton a mangikkat kadagiti basbasol.” Kunana daytoy nupay maidaton amin dagitoy kas mayannurot iti Linteg.

⁹Kalpasanna, kinunana, “Adtoyak, O Dios, a mangaramid iti pagayatam.” Iti kasta, waswasen ti Dios ti immuna ket insukatna ti pannakaidaton ni Cristo!

¹⁰Babaen iti pagayatan ti Dios, nadalusantayo iti basoltayo babaen iti namimpinsan a panangidaton ni Jesu-Cristo iti mismo a bagina.

¹¹Inaldaw nga agserbi ti tunggal padi ket mamin-adu nga idatagna dagiti isu met laeng a kita ti daton. Ngem pulos a saan a kabaelan dagitoy a daton nga ikkaten dagiti basol.

¹²Nupay kasta, indatag ni Cristo ti maymaysa a daton a maipaay iti agnanayon gapu kadagiti basol, ket kalpasanna, nagtugaw iti makannawan ti Dios.

¹³Agur-uray ita sadiay agingga a maparmek ti Dios dagiti kabusorna ket addada iti babaenna.

¹⁴Ngarud, babaen iti maymaysa a daton, pinagbalinna a naan-anay iti amin a tiempo dagiti mapagsanto.

¹⁵Paneknekan met daytoy kadatayo ti Espiritu Santo. Umuna, kunana:

¹⁶“Daytoy ti tulag nga aramidekto kadakuada, Kadagiti masakbayan nga aldaw, kuna ti Apo: Ikabilkonto dagiti lintegko kadagiti puspusoda, Ket isuratkonto dagitoy kadagiti pampanunotda.”

¹⁷Kunana pay, “Diakto lagipenen dagiti basbasol ken kinadakesda.”

¹⁸Ngarud, no napakawanen dagitoy, saanen a masapul ti daton a mangikkat iti basol.

¹⁹Isut' gapuna, kakabsat, nga adda wayawayatayo a sumrek a situtured iti Kasasantoan a Disso gapu iti dara ni Jesus.

²⁰Inlukatna kadatayo ti baro ken nabiag a dalan a lumasat iti kurtina, kayatna a sawen, ti bagina met laeng.

²¹Maysa pay, adda naindaklan a paditayo nga agay-aywan iti balay ti Dios.

²²Umasidegtayo ngarud iti Dios iti napudno a puso ken natalged a pammati. Wen, umasidegtayo a nadalus ti pusotayo—nadalusan iti dakes a konsensia—ken ti bagitayo a naugasan iti nadalus a danum.

²³Agtalinaedtayo ngarud a natibker iti namnamatayo agsipud ta mapagtalkan ti Dios a mangtungpal iti karina.

²⁴Panunotentayo no kasano ti panagtitinnulongtayo iti panagayat ken panagaramid iti naimbag.

²⁵Ditayo liwayan ti panaggigimongtayo, kas ar-aramiden dagiti dadduma. Ad-adda pay koma ti panagpipinnaregtatayo, ita ta makitayo nga umasidegen ti Aldaw.

²⁶No itultuloytayo pay laeng ti agbasol kalpasan ti pannakaammotay iti pudno, awanen ti uray ania a daton a makaikkat kadagiti basbasol.

²⁷Awanen ti maaramidtayo no di aguray iti nakabutbuteng a pannakaukom ken ti gumilgil-ayab nga apuy a mangikisap kadagiti bumusor iti Dios.

²⁸Mapapatay nga awan asi ti siasinoman a mangsalungasing iti Linteg ni Moises no dua wenno tallo a tattao ti mangted iti pammaneknek a maibusor iti dayta a tao ket masentensiaan a nakabasol gapu iti panagsaksida.

²⁹Panunotenyo no kasano ti kadagsen ti dusa ti tao a manglalais iti Anak ti Dios, mangumsi iti dara a nangpatalged iti tulag a nangugas kenkuana iti basol ken agsao iti maibusor iti managparabur nga Espiritu!

³⁰Ta ammotayo ti nagkuna, “Siakto ti agibales, siakto ti agdusa.” Ammotayo no siasino pay ti nagkuna, “Ukomento ti Apo dagiti tattaona.”

³¹Nakabutbuteng ti matnag iti ima ti sibibiag a Dios.

³²Ngem lagipenyo ti kasasaadyo iti napalabas. Kadagidi nga aldaw, adu ti sinagabayo kalpasan ti pannakalawlawagyo, ngem saankayo a naparmek.

³³Adda dagidi tiempo a nalalais ken naparparigatkayo iti publiko. No dadduma, siaayatkayo a nakipagsagaba kadagiti kasta ti pannakaidadanesda.

³⁴Ta nakipagriknakayo kadagiti naibalud. Idi nasamsam dagiti sanikuayo, inibturanyo a siraragsak ti pukawyo ta ammoyo nga addaankay iti nasaysayaat ken mataginayon a sanikua.

³⁵Isut' gapuna a diyo pukawen ti namnamayo, ta yegna ti dakkel a gunggona.

³⁶Masapul nga agibturkayo tapno maaramidyo ti pagayatan ti Dios, ket awatenyo ti inkarina.

³⁷Kas nailanad iti Nasantoan a Surat, “Iti bassit laengen a tiempo, Umayen daydiay umayto; dinto agtaktak.

³⁸Nupay kasta, agbiagto ti nalinteg a taok babaen iti pammati; ngem no pagpanawanna ti pammati, saan a maragsakan 'toy kararuak kenkuana.”

³⁹Saantayo a kas kadagiti nangiwaksi iti pammatida ket napukawda. Addaantayo ketdi iti pammati ket maisalakan ti kararuatayo.