Read Iloko Hebrews 12 Bible Online

Hebrews 12 - Iloko bible

Hebrews 12

¹No maipapan kadatayo, nalikmuttayo kadagitoy nakaad-adu a saksi. Ikkatentayo ngarud dagiti amin a makasali iti dalan ken ti basol a mangsimbalud kadatayo, ket agtaraytayo a sipipinget iti lumba a pakisalipantayo.

²Ditay isinsina ti matatayo ken ni Jesus a pangulo ken mangpunno iti pammati. Saan a naupay ni Jesus gapu iti krus. Ngem gapu iti rag-o nga agur-uray kenkuana, dina pinampanunot ti pannakaibabain iti ipapatay iti krus. Adda itan a situtugaw iti makannawan ti trono ti Dios.

³Tapno dikay agkapuy wenno maupay, panunotenyo no kasano ti panagsagabana gapu iti napalalo a panangbusor kenkuana dagiti managbasol.

⁴Di pay nagsayasay ti darayo iti pannakidangadangyo iti basol.

⁵Nalipatanyo kadin ti sao ti Dios iti panangbalakadna kadakayo a kas annakna—dagiti balikas a mangpapigsa iti pakinakemyo? Kunana: “Anakko, ipangagmo a naimbag ti Apo no ipakitana kenka a nagbiddutka Ket di koma kumapsut ti pakinakemmo no ipatayna kenka ti pannusa.

⁶Ngamin, babalawenna ti ayatenna ken saplitenna ti awatenna a kas anakna.”

⁷Ibturanyo ti panagsagabayo ket ibilangyo a kas iti panangdisiplina ti maysa nga ama. Ipakita ti panagsagabayo nga ibilangnakayo ti Dios a kas annakna. Adda aya anak a saan nga aturen ti amana?

⁸No saannakayo nga aturen a kas kadagiti amin nga annakna, kayatna a sawen a bastardokayo ket saannakayo a napaypayso nga annak.

⁹Panunotentayo ti maipapan kadagiti bukodtayo nga amma: dinisiplinaandatayo ket nagraemtayo kadakuada. Ngarud, saan kadi nga ad-adda a rumbeng laeng nga awatentayo ti pannusa nga ipatay ti naespirituan nga Amatayo tapno agbiagtayo? Iti las-ud ti ababa a tiempo, dinusadatayo dagiti bukodtayo nga amma, kas maibatay iti ipagarupda a naimbag. Ngem no maipapan iti panagsagaba nga ipalak-am ti Dios, aramidenna daytoy a pagimbagantayo tapno agbalintayo a nasagradoan a kas kenkuana.

¹¹Bayat ti pannakadisiplinatayo, saantayo a maragsakan no di ket agladingittayo. Ngem kalpasanna, sagrapentayo ti kappia ken talna a bunga ti nalinteg a biag: ti gunggona dagiti dusaen ti Dios tapno ipakitana kadakuada a nagbiddutda.

¹²Ingatoyo ngarud dagiti naktang nga imayo! Papigsaenyo dagiti nakapsut a tumengyo!

¹³Magnakayo iti nasimpa a dalan tapno saan a madegdegan no di ket maimbagan ti napilay a sakayo.

¹⁴Ikagumaanyo ti makikappia iti amin a tattao. Ikagumaanyo met ti agbiag a nasantoan amangan no diyonto makita ti Apo.

¹⁵Agannadkayo tapno awan ti mangtallikud iti managparabur a Dios. Kitaenyo nga awan ti agbalin a kas iti napait a mula nga agtubo ken mangdadael iti biag ti tunggal maysa. Awan koma ti agbalin nga immoral wenno di agraem kadagiti nasantoan a bambanag a kas ken ni Esau. Insukat ni Esau iti sangamalukong a linugaw ti kalinteganna a kas inauna nga anak.

¹⁷Kas pagaammoyo, kayatna idi a maited koma met laeng ti pamendision ni amana, ngem napaay gapu ta awan ti mabirokanna a pamuspusan a mangbaliw iti inaramidna, uray no nagsangsangit a nangsapul iti daytoy.

¹⁸Saankayo a kas kadagiti Israelita, isuda nga immasideg iti mabalin a sagiden—iti Bantay Sinai nga adda idi gumilgil-ayab nga apuy, ti sipnget ken ti lidem, ti bagio,

¹⁹ti makatitileng nga uni ti trumpeta ken ti maysa a timek. Idi mangngeg dagiti tattao ti timek, impakpakaasida a sumardeng nga agsao kadakuada

²⁰agsipud ta saanda a mabalin a tungpalen ti naibilin: “No adda bumaddek iti bantay, uray animal, masapul a bato-batoenyo agingga a matay.”

²¹Nakabutbuteng daydi a buya, isut' gapuna a kinuna ni Moises, “Agpigpigergerak iti buteng!”

²²Immasidegkayo ketdi iti Bantay Sion ken iti siudad ti sibibiag a Dios, ti nailangitan a Jerusalem a yan dagiti rinibribu nga angheles.

²³Immasidegkayo iti naragsak a taripnong dagiti inauna nga annak ti Dios, isuda a naisurat ti naganda sadi langit. Immasidegkayo iti Dios a mangukom iti sangkataoan ken kadagiti espiritu dagiti nalinteg a tattao a naaramid nga awan pagkuranganna.

²⁴Immasidegkayo ken ni Jesus a nangisayangkat iti baro a tulag ken iti naiparukpok a darana a mangipanamnama kadatayo kadagiti bambanag a nasaysayaat ngem ti dara ni Abel.

²⁵Agannadkayo ngarud ket ipangagyo ti agsasao. No saan a nakalisi dagidi saan a nangipangag iti nasantoan a mensahe, ad-addanto pay a ditayo makalisi no tallikudantayo ti agsasao manipud langit!

²⁶Gapu iti timekna, nadayyeg idi ti daga ngem ita inkarina, “Maminsan pay a dayyegek saan laeng a ti daga no di pay ket ti langit.”

²⁷Ti sao a “maminsan pay” ipakitana a silalawag a madayyeg ken maikkatto dagiti naparsua a bambanag tapno dagitinto laeng saan a madayyeg ti mabati.

²⁸Agyamantayo ngarud agsipud ta awatentayo manipud iti Dios ti pagarian a saan a madayyeg. Agyamantayo iti Dios ket agdaydayawtayo kenkuana iti wagas a makaparagsak kenkuana a buyogan ti panagraem ken panagbuteng.

²⁹Ngamin, mayarig ti Diostayo iti apuy a mangibus.