Read Iloko Hebrews 2 Bible Online

Hebrews 2 - Iloko bible

Hebrews 2

¹Rebbengtayo ngarud nga imutektekan a naimbag dagiti kinapudno a nangngegtayo tapno saantayo a mayaw-awan.

²Napatalgedan a pudno ti mensahe nga impakaammo dagiti angheles, ket siasinoman a nangsalungasing wenno nangsukir iti daytoy, inawatna ti tumutop a dusa.

³Kasanonto ngarud ti panaglisitayo no ditay ikankano daytoy a naindaklan a pannakaisalakan? Ti Apo a mismo ti immuna a nangipakaammo iti daytoy a pannakaisalakan. Dagiti nakangngeg kenkuana ti nangpatalged kadatayo a pudno daytoy.

⁴Kasta met nga innayon ti Dios ti pammaneknekna babaen kadagiti inaramidna a datdatlag ken nakaskasdaaw a pagilasinan ken kadagiti nadumaduma a kita ti milagro. Nagibunong pay kadagiti sagsagut ti Espiritu Santo kas mayannurot iti pagayatanna.

⁵Saan a dagiti angheles ti pagturayen ti Dios iti baro a lubong a sarsaritaenmi.

⁶Kas kuna ti maysa a paset ti Nasantoan a Surat: “Ania la unay aya ti tao, O Dios, ta silalagipka kenkuana, wenno ti anak ti tao, ta ipategmo unay?

⁷Inaramidmo a nababbaba ngem dagiti angheles iti apagbiit a tiempo; binalangatam iti dayag ken dayaw,

⁸Ket pinagturaymo iti isuamin a banag.” Nalawag ngarud nga awan a pulos ti nailaksid ta naisao ditoy a pinagturay ti Dios ti tao kadagiti isuamin a banag. Ngem saantayo met a makita nga iturturayan ti tao dagiti amin a bambanag.

⁹Makitatayo ketdi ni Jesus a naaramid a nababbaba ngem dagiti angheles iti apagbiit a tiempo, tapno babaen iti parabur ti Dios, mapadasanna ti matay a maipaay kadagiti amin a tattao. Makitatayo a nabalangatan ita iti dayag ken dayaw gapu iti sinagabana a patay.

¹⁰Rumbeng la unay ti inaramid ti Dios a namarsua ken manarawidwid iti amin a bambanag: Pinagbalinna a naan-anay ni Jesus babaen iti panagsagaba tapno iramanna dagiti adu nga annak iti dayagna. Ta ni Jesus ti mangidalan kadakuada iti pannakaisalakan.

¹¹Dalusanna dagiti tattao iti basolda, ket isu ken dagiti nadalusan maymaysa ti Amada. Isut' gapuna a saan a mabain ni Jesus a mangawag a kakabsatna ida,

¹²ket kunana, “Ipakaammokanto kadagiti kakabsatko, O Dios; Idaydayawkanto iti imatang ti gimong.”

¹³Kunana pay, “Agtalekakto kenkuana.” Ket kunana manen, “Adtoyak ken dagiti annak nga inted ti Dios kaniak.”

¹⁴Yantangay ta tattao dagitoy nga annak, kas awagna kadakuada, nagbalin met ni Jesus a tao a kas kadakuada ket nakiraman iti kinataoda. Inaramidna daytoy tapno babaen iti ipapatayna, pukawenna ti Diablo nga adda pannakabalinna ken ni patay,

¹⁵ket wayawayaanna dagiti amin a natagabu iti amin a panagbiagda gapu iti butengda ken patay.

¹⁶Ta nalawag a saan a dagiti angheles ti tulonganna, no di ket “dagiti kaputotan ni Abraham.”

¹⁷Ngarud, masapul a pudpudno a maipada kadagiti kakabsatna tapno agbalin a napudno ken naasi a Kangatoan a Padi iti panagserbina iti Dios. Iti kasta, pakawanen ti Dios dagiti basol ti tao.

¹⁸Ita, matulonganna dagiti masulisog, agsipud ta isu a mismo, nasulisog ken nagsagaba.