Read Iloko Hebrews 3 Bible Online

Hebrews 3 - Iloko bible

Hebrews 3

¹Isut' gapuna, kakabsatko a napili, dakayo nga inayaban met ti Dios, panunotenyo ni Jesus nga imbaon ti Dios ken agakem a Kangatoan a Padi ti pammatitayo.

²Kas iti kinapudno ni Moises kadagiti tattao ti Dios, napudno met ni Jesus iti nangdutok kenkuana a mangakem iti daytoy.

³Dakdakkel ti dayaw ti mangbangon iti balay ngem ti mismo a balay. Kasta met a maikari ni Jesus iti dakdakkel a dayaw ngem ni Moises.

⁴Agpayso nga adda mangbangon iti tunggal balay, ngem ti Dios ti nangbangon kadagiti amin.

⁵Napudno ni Moises iti trabahona a kas agserserbi iti entero a balay ti Dios. Nagsao iti maipapan kadagiti bambanag nga ipakaammo ti Dios iti masakbayan.

⁶Ngem napudno ni Cristo a kas Anak a mangaywan iti balay ti Dios. Datayo ti balay ti Dios no agtalinaedtayo a natured ken natalged iti namnamatayo.

⁷Ngarud, kas kuna ti Espiritu Santo: “Ita nga aldaw, no mangngegyo ti timek ti Dios,

⁸Dikay agsuksukir a kas kadagidi kapuonanyo, Dida tinungpal ti bilinna kadakuada iti daydi tiempo a sinuotda idiay let-ang.

⁹Sinuotdak sadiay dagiti ammayo, kuna ti Dios Uray nakitada ti inaramidko iti uppat a pulo a tawen.

¹⁰Isut' gapuna a nagpungtotak kadagidiay a tattao, Ket kinunak, ‘Naglikudandak, ket dida tinungpal dagiti bilinko.’

¹¹Nagpungtotak ket insapatak: ‘Pulos a didanto sumrek iti daga a pangtedak kadakuada iti panaginana!’”

¹²Kakabsatko iti pammati, agannadkayo tapno awan kadakayo ti agbalin a dakes ken awanan iti pammati ket laksidenna ti sibibiag a Dios.

¹³Agtitinnulongkayo koma iti inaldaw bayat ti kaadda ti tiempo a makuna nga “ita nga aldaw” tapno awan ti maallilaw kadakayo babaen iti basol ket agbalin a nasukir.

¹⁴Ta kaduanatayo ni Cristo no la ket agtalinaedtayo a natibker iti panagtalek kas naipakita idi damo a namatitayo.

¹⁵Kastoy ti kuna ti Nasantoan a Surat: “Ita nga aldaw, no mangngegyo ti timek ti Dios, Dikay agsuksukir kas iti inaramid dagidi kapuonanyo.”

¹⁶Siasino dagiti nakangngeg iti timek ti Dios ken bimmusor kenkuana? Isuda amin nga impanaw ni Moises idiay Egipto.

¹⁷Siasino dagiti nagpungtotan ti Dios iti uneg ti 40 a tawen? Dagiti tattao a nagbasol, isuda a napasag idiay let-ang.

¹⁸Siasino dagiti nangisapataan ti Dios a dida makastrek a pulos iti daga a pangitedanna kadakuada iti inana? Dagiti bimmusor kenkuana.

¹⁹Makitatayo ngarud a dida nakastrek agsipud ta dida namati.