Read Iloko Hebrews 5 Bible Online

Hebrews 5 - Iloko bible

Hebrews 5

¹Mapili ti tunggal kangatoan a padi kadagiti kailianna ket matudingan nga agserbi iti Dios iti nagan dagiti tattao tapno idatagna dagiti sagsagut ken sakrifisio gapu kadagiti basbasol.

²Yantangay ta adda met pagkapuyanna, naanus kadagiti agaramid iti dakes gapu ta dida ammo a dakes ti ar-aramidenda.

³Gapu ta nakapuy, masapul a mangipaay kadagiti datdaton, saan laeng a gapu kadagiti basbasol dagiti tattao, no di ket gapu met iti basolna.

⁴Awan ti mangdutok iti bagina a kangatoan a padi. Ti laeng Dios ti makabalin, kas iti panangdutokna ken ni Aaron.

⁵Kasta met a saan a dinutokan ni Cristo ti bagina a Kangatoan a Padi. Kinuna ketdi ti Dios kenkuana, “Sika ti Anakko; Ita nga aldaw, nagbalinak nga Amam.”

⁶Kinunana pay iti sabali a paset, “Padika nga agnanayon A kas iti kinapadi ni Melkisedec a padi.”

⁷Bayat ti panagbiag ni Jesus ditoy daga, inyikkis ken insangitna ti nagkararag ken nagdawat iti Dios a makaisalakan kenkuana iti patay. Impangag ti Dios agsipud ta natulnog ken napakumbaba.

⁸Ngem uray pay no Anak ti Dios, nasursurona ti agtulnog babaen kadagiti sinagabana.

⁹Idi naaramidnan ti panggepna, nagbalin a pakaisalakanan nga agnanayon dagiti agtulnog kenkuana,

¹⁰ket dinutokan ti Dios a Kangatoan a Padi a kas ken ni Melkisedec.

¹¹Adu ti maibagami maipapan iti daytoy a banag, ngem saan a nalaka nga ilawlawag kadakayo agsipud ta kasapulanyo ti adu a tiempo sakbay a maawatanyo ti kaipapananna.

¹²Adun ti limmabas a panawen ket rebbengna koma metten a dakayo ti mangisuro. Ngem saan met, ta masapulyo pay laeng ti sabali a mangisuro manen kadakayo kadagiti nasken a sursuroenyo maipapan iti Sao ti Dios. Imbes koma a ti taraon ti nataengan ti kanenyo, saan ta gatas pay laeng ti masapul nga inumenyo.

¹³Siasinoman a gatas ti pagbibiagna, ubing pay laeng a dina ammo ti pagdumaan ti naimbag ken dakes.

¹⁴Iti sabali a bangir, ti natangken a taraon, agpaay kadagiti nataengan, isuda a nasursuroan a mangaramat kadagiti panunotda a mamaglasin iti naimbag ken dakes.