Read Iloko Hebrews 6 Bible Online

Hebrews 6 - Iloko bible

Hebrews 6

¹Ngarud, umaddangtayo iti nangatngato a tukad ti sursuro ni Cristo ket ditayo pagsasaritaan manen dagiti umuna a pannursuro maipapan ken ni Cristo. Ditay agsubli manen iti nangrugiantayo a sursuro, kayatna a sawen, ti panangtallikudtayo kadagiti ubbaw nga aramid ken panamatitayo iti Dios;

²pannursuro maipapan iti buniag ken ti seremonia ti panangipatay iti ima; ti panagungar dagiti natay ken ti agnanayon a pannakaukom.

³Wen, umaddangtayo, ket aramidentayo daytoy no tulongannatayo ti Dios.

⁴Saanen a mapagbabawi dagiti simmina iti pammati tapno agsublida manen. Addada idin iti silaw ti Dios. Linak-amda ti nailangitan a sagut. Inawatda ti pannakabagida iti Espiritu Santo.

⁵Manipud iti padasda, natakuatanda a naimbag ti sao ti Dios ket nariknada ti pannakabalin ti mapasungad a panawen.

⁶Kalpasanna, simminada iti pammati! Pulos a saandan a mapagsubli tapno agbabawida manen, gapu ta arigna nga ilanlansada manen iti krus ti Anak ti Dios ken ibabainda iti imatang dagiti tattao.

⁷Paraburan ti Dios ti daga a mangsagepsep iti tudo a masansan nga agtinnag ken mangpatubo kadagiti mulmula a pagtaudan iti taraon kadagiti pakaipaayanna.

⁸Ngem no agtubo dagiti sisiitan ken barsanga iti dayta a daga, awan serserbina ket awan duadua nga ilunod ti Dios—dadaelento ti apuy.

⁹Uray no kastoy ti kunami, patgenmi a gagayyem, saankami a madanagan kadakayo. Ammomi ngamin a nasayaat ti kasasaadyo ket mangnamnamakam iti pannakaisalakanyo.

¹⁰Nalinteg ti Dios. Dinanto lipaten ti aramidyo, kayatna a sawen, ti ayat nga impaayyo kenkuana babaen iti panangtulongyo ken ti panangtultulongyo pay laeng kadagiti kakabsatyo iti pammati.

¹¹Tarigagaymi nga ituloy ti tunggal maysa kadakayo ti sigud a regtana agingga iti panungpalan tapno magun-odyo ti namnamaenyo.

¹²Dimi kayat nga agbalinkayo a nasadut. Kayatmi ketdi a tuladenyo dagiti namati ken nagan-anus ket inawatda ti inkari ti Dios.

¹³Idi nagkari ti Dios ken ni Abraham, insapatana a tungpalenna ti karina. Yantangay ta awan ti nangatngato a pannakabalin ngem isu, inaramatna ti bukodna a nagan iti dayta a sapata.

¹⁴Kinunana, “Ikarik a bendisionankanto ket paaduekto ti kaputotam.”

¹⁵Naawat ni Abraham ti inkari ti Dios gapu ta nagur-uray a siaanus.

¹⁶No agsapata ti tao, aramatenna ti nagan ti natantan-ok ngem isu, ket dayta a sapata ti mangrisut iti amin a pagsusuppiatan.

¹⁷Agsipud ta kayat ti Dios nga ipakita a silalawag kadagiti umawat iti karina a dina baliwan ti panggepna, pinatalgedanna ti kari babaen iti panagsapatana.

¹⁸Saan nga agbalbaliw dagitoy dua: ti kari ti Dios ken ti sapatana. Gapu kadagitoy, dinatayo mabalin nga ulboden ti Dios. Isut' gapuna a datayo a nagkamang kenkuana, mapapigsatayo nga agtalinaed a natibker iti namnama nga adda iti masangoanantayo.

¹⁹Adda kadatayo daytoy a namnama a kas angkla ti kararua. Natalged ken natibker daytoy a namnama ket sumrek iti kurtina iti nailangitan a templo agingga iti akin-uneg a santuario.

²⁰Tapno matulongannatayo, immun-una ni Jesus ngem datayo a simrek sadiay agsipud ta nagbalin a Kangatoan a Padi iti agnanayon a kas ken ni Melkisedec a padi.