Read Iloko Hebrews 7 Bible Online

Hebrews 7 - Iloko bible

Hebrews 7

¹Ari idi idiay Salem daytoy a Melkisedec ken maysa a padi a nagserbi iti Dios a Kangatoan. Idi aggapu ni Abraham iti paggugubatan a nangparmekanna iti uppat nga ari, sinabat ni Melkisedec sana inkararagan a bendisionan koma ti Dios.

²Inted ni Abraham kenkuana ti apagkapullo ti amin a sinamsamna. (“Ari ti Kinalinteg” ti kayat a sawen ti nagan a Melkisedec. “Ari ti Kappia” ti kayatna pay a sawen gapu ta ni Melkisedec ti ari ti Salem.)

³Awan ti naisurat maipapan iti kinasiasino dagiti nagannak kenkuana wenno kapuonanna. Awan met pakakitaan no kaano ti pannakayanak wenno ipapatayna. Mayarig ni Melkisedec iti Anak ti Dios. Agtalinaed a padi iti agnanayon.

⁴Makitayo ngarud no kasano ti kangato ti saad ni Melkisedec! Inted kenkuana ni Abraham nga ama ti nasiontayo ti apagkapullo ti amin a nasamsamna iti gubat.

⁵Ket kas sagudayen ti Linteg, naibilin kadagiti papadi a nagtaud iti kaputotan ni Levi nga awatenda a kas daton ti apagkapullo nga aggapu kadagiti tattao ti Israel, kayatna a sawen, kadagiti kailianda met laeng uray no kaputotan met ida ni Abraham.

⁶Saan a nagtaud ni Melkisedec iti kaputotan ni Levi, ngem inawatna ti apagkapullo ken ni Abraham. Inkararaganna pay a mabendisionan koma daytoy a tao a nagkarian ti Dios.

⁷Di pagduaduaan a nangatngato ti mangbendision ngem ti mabendisionan.

⁸Iti biang dagiti papadi, dagiti tattao a matayto iti kamaudianan ti umawat iti apagkapullo. Ngem iti biang ni Melkisedec, ti sibibiag ket isu ti umawat iti apagkapullo a kas kuna ti Nasantoan a Surat.

⁹Mabalin pay a kuna nga idi inted ni Abraham ti apagkapullo, nangted met ni Levi (a naibilin kadagiti kaputotanna nga awatenda met ti apagkapullo.)

¹⁰Ta saan pay a nayanak idi ni Levi, no di ket, kastay kunadan, adda pay laeng iti bagi ni Abraham a kapuonanna idi sabaten ni Melkisedec.

¹¹Adda nasken nga akem dagiti papadi a Levita kas sagudayen ti Linteg a naipaulog nga annuroten dagiti Israelita. Ita, no nagun-od ti awan pagkuranganna babaen iti kinapadi dagiti Levita, saan koman a kasapulan ti sabali a padi a kas ken ni Melkisedec, a saan a padi a nagtaud iti kaputotan ni Aaron.

¹²No agbaliw ti kapuonan dagiti papadi, masapul met a mabaliwan ti linteg.

¹³Nagtaud iti sabali a tribu ti Apotayo ket awan ti uray maysa a katribuanna ti nagserbi a kas padi.

¹⁴Nalawag a nagtaud ti Apotayo iti tribu ti Juda, ket awan ti nadakamat ni Moises maipapan iti daytoy a tribu idi nagsao maipapan kadagiti papadi.

¹⁵Nalawlawag pay a makita daytoy iti kaadda ti sabali a padi a kas ken ni Melkisedec.

¹⁶Nagbalin a padi babaen iti pannakabalin ti biag nga awan patinggana, saan a babaen iti paglintegan maipapan iti panagtaud iti maysa a kapuonan.

¹⁷Ta kuna ti Nasantoan a Surat, “Padika nga agnanayon a kas iti kinapadi ni Melkisedec.”

¹⁸Naiwaksi ngarud daydi daan a sagudayen gapu ta agkurang ken awan serserbina.

¹⁹Ta awan ti inaramid ti Linteg a nagbalin a naan-anay. Ket ita, naited kadatayo ti nasaysayaat a namnama a mangyasideg kadatayo iti Dios.

²⁰Saan la a dayta. Adda pay sapata ti Dios. Awan ti kasta a sapata idi nagpadi dagiti sabsabali.

²¹Ngem idi nagbalin ni Jesus a padi, insapata ti Dios: “Siak nga Apo Dios, insapatak, Ket dinto agbaliw ti panunotko: ‘Padika nga agnanayon.’”

²²Daytoy ngarud ti namagbalin ken ni Jesus a mamatalged iti nasaysayaat a tulag.

²³Adda pay sabali a paggiddiatan: Adu dagiti papadi a nagsasaruno a nadutokan, ngem natayda ket dida nagtalinaed iti saadda.

²⁴Ngem sibibiag nga agnanayon ni Jesus, ket saan nga agsardeng ti panagserbina a kas padi.

²⁵Isut' gapuna a kabaelanna nga isalakan dagiti umasideg iti Dios babaen kenkuana agsipud ta agbiag nga agnanayon a mangibabaet kadakuada iti Dios.

²⁶Ngarud, ni Jesus ti Kangatoan a Padi a makaaramid iti amin a kasapulantayo. Nasantoan, awan tulaw wenno basolna, naisina kadagiti managbasol ket naipangato sadi langit.

²⁷Saan a kas kadagiti dadduma a kangatoan a papadi a masapul nga inaldaw a mangipaay iti daton a maigapu, umuna, iti bukodna a basol, ket kalpasanna, maipuon met kadagiti basol dagiti tattao. Naminsan a nagidaton ni Jesus ket daytoy para iti agnanayon—idi indatonna a mismo ti bagina iti Dios.

²⁸Kas mayannurot iti Linteg ni Moises, adda dagiti matudingan nga agbalin a nangato a padi, uray no adda pakapilawanda; ngem babaen iti kari a sinapataan ti Dios, a naud-udi nga immay ngem ti Linteg, matudingan ti Anak, isu a naaramid nga awan pakapilawanna iti agnanayon.