Read Iloko Hebrews 9 Bible Online

Hebrews 9 - Iloko bible

Hebrews 9

¹Adda dagiti alagaden daydi immuna a tulag maipapan iti panagdaydayaw ken iti disso a pagdaydayawan nga aramid ti tao.

²Nabangon ti maysa a tabernakulo, daydi akinruar, a maaw-awagan iti Nasantoan a Disso. Ditoy ti ayan ti kandelero, ken ti lamisaan nga ayan ti tinapay a naidaton iti Dios.

³Iti likudan ti maikadua a kurtina ti tabernakulo, masarakan ti Kasasantoan a Disso.

⁴Ditoy ti ayan ti balitok nga altar a pagpuoran iti insenso ken ti lakasa ti tulag a nakalupkopan iti balitok. Ti lakasa ti nakaikabilan ti balitok a banga a nakaikargaan ti mana, ti nagsaringit a sarukod ni Aaron ken dagiti dua a tapi ti bato a nakaisuratan dagiti bilin.

⁵Iti ngatoen ti lakasa, adda met dagiti kerubim a mangiladawan iti dayag ti Dios. Linlinonganda kadagiti payakda ti disso a pakapakawanan dagiti basbasol. Ngem saan pay nga ita ti pannakailawlawag dagitoy a bambanag.

⁶Kastoy ti urnos dagitoy iti uneg ti tabernakulo ket inaldaw a sumrek dagiti papadi iti akinruar a paset ti tapno aramidenda ti annongda.

⁷Ngem ti laeng Kangatoan a Padi ti sumrek iti akin-uneg a paset, ket maminsan laeng iti makatawen. Itugotna ti dara nga idatonna iti Dios gapu iti basolna ken iti basol dagiti tattao a di makaammo nga agbasbasolda.

⁸Silalawag nga impaawat ti Espiritu Santo babaen kadagitoy a pagannurotan a saan pay a naluktan ti dalan nga agturong iti Kasasantoan a Disso, bayat ti kaadda pay laeng ti akinruar a paset ti tabernakulo.

⁹Daytoy ti mangiladawan iti agdama a panawen. Kayatna a sawen a dagiti sagsagut ken sakrifisio, saanda a maugasan a naan-anay ti konsensia dagiti agdaydayaw.

¹⁰Dagitoy nga alagaden maipapan iti taraon, inumen ken nadumaduma a seremonia ti pannakadalus, agpaayda laeng agingga a dumteng ti tiempo ti panagbalbaliw.

¹¹Ngem immayen ni Cristo a kas Kangatoan a Padi dagiti naimbag a bambanag nga addan. Dakdakkel ken nasaysayaat ti tabernakulo a pagserserbianna, ta saan nga inaramid ti tao, kayatna a sawen, saan a paset daytoy naparsua a lubong.

¹²Idi simrek ni Cristo iti Kasantoan a Disso—naminsan laeng ken para iti agnanayon—saan a dara dagiti kalding ken urbon a baka ti intugotna nga idaton, no di ket ti mismo a darana. Iti kasta, naitrabahona ti agnanayon a pannakaisalakantayo.

¹³Maugasan dagiti tattao a makuna a “saan a nadalus,” babaen iti pannakawarsida iti dara dagiti kalding ken baka ken dagiti dapu ti napuoran nga urbon ti baka.

¹⁴Ngem ad-adda pay ti pannakabalin ti dara ni Cristo! Ta babaen iti agnanayon nga Espiritu, impaayna iti Dios ti bagina a kas daton nga awan pakapilawanna. Ti darana ti mangugas kadagiti konsensiatayo kadagiti awan serserbina a panagdaydayaw tapno aramidentayo ti pagayatan ti sibibiag a Dios.

¹⁵Daytoy ti gapu no apay a ni Cristo ti mangisayangkat iti baro a tulag: tapno awaten dagiti inayaban ti Dios dagiti agnanayon a bendision nga inkari ti Dios. Maaramid daytoy agsipud ta iti ipapatayna, wayawayaanna dagiti tattao kadagiti salungasingda idi adda pay laeng iti babaen ti immuna a tulag.

¹⁶No adda testamento, masapul nga adda pammaneknek a natay ti nagtestamento.

¹⁷Awan bileg ti testamento no sibibiag pay laeng ti nagtestamento. Sa la adda bilegna kalpasan ti ipapatayna.

¹⁸Dayta ti gapuna a napasingkedan ti immuna a tulag babaen iti pannakaaramat ti dara.

¹⁹Impakaammo ni Moises dagiti amin a bilbilin kadagiti amin a tattao kas nailanad iti Linteg. Kalpasanna, innalana ti dara dagiti urbon a baka ken kalding sana inlimog iti danum, ket winarsianna ti libro ti Linteg ken dagiti tattao babaen iti hisopo ken lumabaga a de lana.

²⁰Kunana, “Daytoy ti dara a mangpasingked iti tulag nga imbilin ti Dios a tungpalenyo.”

²¹Winarsianna met ti tabernakulo ken ti isuamin nga alikamen a mausar iti panagdaydayaw.

²²Kinapudnona, kas mayannurot iti Linteg, gistay amin a bambanag maugasanda babaen iti pannakaiparukpok ti dara, ket mapakawan ti basol babaen iti pannakaiparukpok ti dara.

²³Masapul a maugasan kadagitoy a seremonia dagiti bambanag a naadaw kadagiti nailangitan a pagtuladan. Ngem dagiti bambanag a nailangitan, masapulda dagiti nasaysayaat a daton.

²⁴Ta saan a simrek ni Cristo iti Nasantoan a Disso nga aramid ti tao ken ladawan laeng ti napaypayso a disso. Simrek ketdi sadi langit a yanna ita iti sangoanan ti Dios gapu kadatayo.

²⁵Tinawen a sumrek ti Kangatoan a Padi iti Kasasantoan a Disso a mangidaton iti dara ti animal. Ngem saan a namin-adu a simrek ni Cristo a mangidaton iti mismo a bagina.

²⁶Ta no kasta ti naaramid, mamin-adu met koma nga agsagaba manipud iti pannakaparsua ti lubong. Ngem iti kinaagpaysona, iti paggibusan dagiti panawen, naminsan la a nagparang ket saanen a naulit, tapno ikkatenna ti basol babaen iti panangidatonna iti mismo a bagina.

²⁷Naituding a matay ti tao iti maminsan, ket kalpasanna, ukomen ti Dios.

²⁸Kasta met a namimpinsan a naidaton ni Cristo a mangikkat iti basol ti adu. Agparangto iti maikadua a daras, ngem saanen a gapu iti basol, no di ket tapno isalakanna dagiti mangnamnama iti yaayna.