Read Iloko James 2 Bible Online

James 2 - Iloko bible

James 2

¹Kakabsatko, kas mamati ken ni Apotayo a Jesu-Cristo, ti nadayag nga Apo, awan koma ti idumdumayo.

²Kas pangarigan, dumar-ay iti taripnongyo ti nabaknang ken ti napanglaw. Nagsingsing ti baknang iti balitok ken nagaruat iti napintas idinto a rutayrutay ti pagan-anay ti napanglaw.

³No ad-adda a bigbigenyo ti nabaknang ket kunayo, “Agtugawka ditoy nasayaat a lugar,” ngem kunayo iti napanglaw, “Agtakderka wenno agdalupisakka iti sakaanak,”

⁴nagbasolkayon iti panangidumduma ken panangukom a maibatay iti dakes a panggep.

⁵Dumngegkayo, ingungotek a kakabsat! Dagiti napanglaw ditoy lubong ti pinili ti Dios tapno mapabaknang ti pammatida ken agbalinda a kameng ti Pagarian nga inkarina kadagiti agayat kenkuana.

⁶Ngem pabainanyo met ti napanglaw! Sinno kadi ti mangirurumen ken mangidarum kadakayo? Dagiti babaknang!

⁷Isuda ti mangpilpiltak iti mararaem a nagan a naited kadakayo.

⁸Masarakan daytoy iti Nasantoan a Surat: “Ayatem ti padam a tao a kas iti panangayatmo iti bagim.” No tungpalenyo daytoy, nasayaat ti aramidenyo.

⁹Ngem agbasolkayo no mangidumdumakayo babaen iti posturada. Iti imatang ti Linteg, maibilangkayon a managbasol.

¹⁰Ti siasinoman a mangsalungasing iti maysa a bilin, salungasingenna metten ti sibubukel a linteg.

¹¹Ta ti nagkuna, “Dika makikamalala,” kinunana pay, “Dika mamapatay.” Uray no dika makikamalala, no pumatayka, sinalungasingmon ti linteg.

¹²Ngarud, agsao ken agaramidkayo a kas parsua nga ukomento ti linteg a mangwayawaya iti tao.

¹³Ta dinto mangngaasi ti Dios inton ukomenna ti tao a di nangngaasi; ngem inton oras ti panangukom, agballiginto ti kaasi.

¹⁴Kakabsatko, ania ti magunggona ti agkuna nga adda pammatina no dina met ipakita kadagiti aramidna? Saannaka a maisalakan ti kasta a pammati.

¹⁵Kas pangarigan ta adda kakabsat a makasapul unay iti lupot ken kanen iti inaldaw,

¹⁶ket diyo ikkan ida kadagiti kasapulan ti biag, awan serserbi ti panagkunayo kadakuada, “Bendisionannakayo ti Dios! Agpapudotkayo ken kaaduenyo ti mangan.”

¹⁷Kasta met ti pammati: awan serserbina no di mabuyogan iti aramid.

¹⁸Ngem addanto agkuna, “Adda pammati ti maysa a tao; adda met aramid ti sabali.” Kastoy ti sungbatko: “Ipakitam kaniak no kasano nga adda ti pammati ti siasinoman a dina pakuyogan iti aramid, ket iparangko met ti pammatik babaen iti aramidko.”

¹⁹Mamatikayo kadi a maymaysa ti Dios? Nasayaat! Ngem laglagipenyo a mamati met dagiti demonio—ket agpigergerda pay iti buteng.

²⁰Sika a maag, kayatmo a mapaneknekan nga awan pagmamaayan ti pammati a di mabuyogan iti aramid?

²¹Kasano a napalinteg idi ni amatayo nga Abraham iti imatang ti Dios? Napalinteg babaen iti aramidna! Iti rabaw ti altar, indatonna ni Isaac nga anakna.

²²Dimo aya maawatan? Nagtunos ti aramid ken ti pammati ni Abraham. Dagiti aramidna ti nangpunno iti pammatina.

²³Ket pimmudno ti maysa a paset ti Nasantoan a Surat: “Namati ni Abraham iti Dios, ket imbilang ti Dios a nalinteg gapu iti pammatina.” Isut' gapuna a naawagan ni Abraham a “gayyem ti Dios.”

²⁴Ngarud, mapalinteg ti maysa a tao iti imatang ti Dios gapu iti aramidna, saan la a gapu iti pammatina.

²⁵Kastoy met idi ken ni Rahab a babai a dakes ti panagbiagna. Pinalinteg ti Dios gapu iti inaramidna idi pinasangbayna dagiti espia a Judio ket tinulonganna ida a makalibas babaen iti panangipatuldona iti sabali a dalan a pagnaanda.

²⁶Ngarud, kas ti bagi a makuna a bangkay no awan espirituna, maibilang met a natay ti pammati a di mabuyogan iti aramid.