Read Iloko James 3 Bible Online

James 3 - Iloko bible

James 3

¹Kakabsatko, sumagmamano la koma kadakayo ti mangisuro. Kas ammoyo, naing-inget ti pannakaukommi a mamaestro ngem dagiti dadduma.

²Masansan nga agbidduttay amin. Naan-anay ti tao a pulos a di agbiddut iti isaona, ket kabaelanna a gawidan ti bagina.

³No busalantayo ti kabalio tapno agtungpal kadatayo, mabalintayo nga iturong iti sadinoman.

⁴Wenno alaentayo a pangarigan ti barko: idinto a kasta unay ti kadakkelna nga iduron ti angin, bassit laeng a timon ti aramaten ti piloto tapno iturongna iti sadinoman.

⁵Kastoy met ti dila: Idinto a bassit a paset ti bagi, mabalinna a pagpalangguad dagiti dadakkel a bambanag. Kitaenyo laengen no kasano ti kalawa ti bakir nga uramen ti bassit la nga apuy.

⁶Mayarig ti dila iti apuy. Kasla lubong a napnoan iti biddut. Adda naituding a lugarna iti bagitayo, ket isaknapna ti kinadakes iti entero a kinataotayo. Bayat ti panagbiagtayo, puorannatay iti apuy a kasla aggapu iti infierno met laeng.

⁷Kabaelan ti tao ti mangpaamo iti amin a kita ti atap nga ayup, dagiti tumatayab, agraman dagiti agkarkarayam iti daga ken dagiti nabiag a parsua iti taaw. Kinapudnona, napaamona aminen ida.

⁸Ngem awan pay ti nakapaamo iti dila. Nakadakdakes ken di magawidan ket makapatay a kas iti gita ti uleg.

⁹Aramatentayo a pagyaman iti Apo ken Amatayo, pagilunodtayo pay iti padatayo a tao a naparsua a kalanglanga ti Dios.

¹⁰Maymaysa a ngiwat ti paggapuan dagiti balikas a pagyaman ken pagilunod. Kakabsatko, saan koma a kasta!

¹¹Saan a mabalin nga ipussuak ti maymaysa nga ubbog ti nasam-it ken napait a danum.

¹²Kakabsatko, saan nga agbunga ti igos iti olibo wenno ti ubas iti igos. Di met mabalin ti naapgad nga ubbog ti mangted iti danum a mabalin nga inumen.

¹³Adda kadi masirib ken mannakaawat kadakayo? No adda, masapul nga ipakitana babaen iti nadalus a panagbiagna ken dagiti nasayaat nga aramidna a mabuyogan iti kinapakumbaba ken kinasirib.

¹⁴Ngem no imon, pait ken kinaimut ti agturay iti pusoyo, dikay agpasindayag ken agsao iti ulbod a maibusor iti kinapudno.

¹⁵Saan nga aggapu sadi langit daytoy a kinasirib, no di ket agtaud ditoy lubong. Nagtaud iti demonio ken saan a naespirituan daytoy a kinasirib.

¹⁶Iti sadinoman a yan ti apas ken panagririri, masarakan met ti di panagtutunos ken amin a kita ti kinadakes.

¹⁷Ngem, umuna unay, nasin-aw ken awan mulitna ti kinasirib nga aggapu iti ngato. Natalna, naalumamay ken mannakigayyem. Mannakipagrikna ket agbunga iti nasayaat nga aramid. Di mangidumduma ken di aginkukuna.

¹⁸Kinaimbag met ti apiten dagiti mamagkakappia manipud kadagiti bukel nga itukitda iti nagan ti kappia.