Read Iloko James 5 Bible Online

James 5 - Iloko bible

James 5

¹Ita, denggendak, dakayo a babaknang! Agsangit ken agdung-awkayo gapu kadagiti didigra a mapagtengyonto.

²Nadadaelen dagiti kinabaknangyo. Sinangan dagiti pagan-anayyo.

³Naglatin dagiti balitok ken pirakyo. Tinto latida ti saksi a maibusor kadakayo ket mayarigda iti apuy a mangibus iti lasagyo. Nagurnongkayo iti adu a kinabaknang kadagitoy maudi nga aldaw.

⁴Diyo pay tinangdanan dagiti pinagtrabahoyo. Denggenyo dagiti angalda. Dimmanonen iti Dios, ti Apo a Mannakabalin-amin, ti ikkis dagiti pinaganiyo.

⁵Ditoy daga, nagbiagkayo a naglaplapunosan iti nam-ay ken ragsak. Nagpalukmegkayo a maisagana iti kaaldawan ti panagparti.

⁶Inukom ken pinatayyo dagiti awan basolna a tattao, uray pay no saanda a simmupiat kadakayo.

⁷Aganuskayo ngarud, kakabsatko, agingga iti yaay ti Apo. Kitaenyo ti anus ti mannalon iti panangurayna kadagiti napateg a bunga dagiti mulana. Siaanus nga aguray iti damo ken iti naladaw a tudo.

⁸Nasken met nga aganuskayo. Papigsaenyo ti namnamayo ta asidegen ti yaay ti Apo.

⁹Kakabsat, dikay agdidinnayamudom tapno dinakayto ukomen ti Dios. Asidegen ti Ukom ket sisasaganan a sumrek.

¹⁰Kakabsat, lagipenyo dagiti profeta a nagsao babaen iti nagan ti Apo. Isuda ti pagulidananyo iti kinaanus nga agibtur iti panagsagaba.

¹¹Gapu ta nakaibturda, kunatayo a naragsakda. Nadamagyon ti kinaanus ni Job nga agibtur ken ammoyo ti pannangted ti Apo kadagiti kasapulanna iti kamaudiananna. Ngamin, manangngaasi ken mannakipagrikna ti Apo.

¹²Kangrunaan ti amin, kakabsatko, dikay agsapata no agkarikayo. Diyo pagsapata ti langit wenno daga, wenno agaramat iti uray ania a kita ti sapata. “Wen,” kunayo no mayatkayo. “Saan,” no madikayo tapno dinakayto ukomen ti Dios.

¹³Adda kadi agsagsagaba kadakayo? Agkararag koma. Adda kadi naragsak? Agkanta koma iti pagdaydayaw.

¹⁴Adda kadi masakit kadakayo? Paayabanna koma dagiti panglakayen ti iglesia tapno ikararagan ken sapsapoanda iti lana iti nagan ti Apo.

¹⁵No mamati dagiti panglakayen nga ipangag ti Dios ti kararagda, umimbagto ti masakit; pasalun-atento ti Apo ket pakawanennanto pay dagiti basolna.

¹⁶Ngarud, ipudnoyo dagiti basbasolyo iti tunggal maysa. Ikarkararaganyo ti tunggal maysa tapno maagasankayto. Adda nabileg a pannakabalin a parnuayen ti kararag ti nalinteg a tao.

¹⁷Padatayo a tao ni Elias. Sipapasnek a nangikararag a di koma agtudo ket saan a nagtudo iti dayta a daga iti tallo ket gudua a tawen.

¹⁸Nagkararag manen ket nagtudo iti napigsa. Nagbunga ti daga.

¹⁹Kakabsatko, no adda sumiasi iti kinapudno ket adda met mangidalan kenkuana nga agsubli,

²⁰laglagipenyo daytoy: ti manggutugot iti managbasol tapno idianna dagiti dakes a kababalin, isalakannanto ti kararua dayta a managbasol, ket isu ti pakaigapuan ti pannakapakawan ti adu a basol.