Read Iloko 1 Peter 1 Bible Online

1 Peter 1 - Iloko bible

1 Peter 1

¹Patgek a Kakabsat: Kablaawankayo a napili a tattao ti Dios a naiwaraswaras a kas ganggannaet nga agnanaed iti Ponto, Galacia, Capadocia, Asia ken Bitinia. Napilikayo a kas mayannurot iti panggep ti Dios Ama ken napasantokayo babaen iti Espirituna ken tapno agtulnogkayo ken ni Jesu-Cristo ket madalusankay iti darana. Sapay koma ta maaddaankay iti naan-anay a parabur ken talna. Siak ni Pedro nga apostol ni Jesu-Cristo.

³Madaydayaw ti Dios ken Ama ni Apotayo a Jesu-Cristo! Gapu iti dakkel a kaasina, naipasngaytayo iti baro a biag babaen iti panagungar ni Jesu-Cristo. Sibibiag a namnama ti impaay kadatayo daytoy baro a biag.

⁴Namnamaentayo ngarud a tawidentayo dagiti nawadwad a bendision a di agrupsa, di madadael wenno mapukaw nga iduldulin ti Dios sadi langit.

⁵Agpaay dagitoy kadakayo. Babaen iti pammati, aywanannakayo ti Dios agingga a dumteng ti pannakaisalakan a naisagana a maipaduyakyak iti kamaudianan a tiempo.

⁶Agragsakkay iti daytoy, nupay masapul nga aglidaykay ita iti apagbiit gapu iti adu a kita ti panagsagaba a paglasatanyo.

⁷Nairanta dagitoy a pangpaneknek iti kinapudno ti pammatiyo. Uray pay ti balitok a madadael, magugoran iti apuy. Ket ti pammatiyo a napatpateg ngem balitok, masapul met a masuot tapno mataginayon. Iti kasta, awatenyonto ti dayaw, dayag ken tan-ok inton maiparangarang ni Jesu-Cristo.

⁸Ay-ayatenyo nupay diyo nakita. Uray ita, mamatikayo kenkuana nupay saanyo a makita, ket agrag-okayo iti dakkel ken nagloriaan a ragsak a di mayebkas,

⁹ta gapu iti pammatiyo, magun-odyo ti pannakaisalakan dagiti kararuayo.

¹⁰Daytoy a pannakaisalakan ti inam-amiris ken sinuksukimat dagiti profeta a nangipadto iti sagut nga ited ti Dios kadakayo.

¹¹Inkagumaanda idi nga ammoen no kaano ken kasano ti pannakapasamakna. Daytoy ti tiempo nga imbagbaga ti Espiritu ni Cristo nga adda kadakuada, idi impakaammoda dagiti panagsagaba a lak-amen ni Cristo ken ti dayag nga umay kalpasanna.

¹²Impakaammo ti Dios kadagitoy a profeta a saan nga agpaay a pagimbaganda dagiti ar-aramidenda no di ket agpaay a pagimbaganyo. Naibagan kadakayo ti maipapan kadagitoy a bambanag. Impakaammo ida dagiti nangikasaba iti Naimbag a Damag, isuda nga indalan ti Espiritu Santo a naibaon manipud langit. Dagitoy dagiti bambanag a kayat a maawatan uray pay dagiti angheles.

¹³Isaganayo ngarud dagiti panunotyo nga agtignay. Agsalukagkayo ket mangnamnamakay iti bendision a maited kadakayo inton maiparangarang ni Jesu-Cristo.

¹⁴Kas natudio nga annak, agtulnogkayo iti Dios. Diyo ipalubos ti biagyo nga iturayan ti kinaderrep a kas idi saanyo pay nga ammo ti pudno.

¹⁵Nasantoankayo koma iti amin nga aramidyo, a kas iti kinasanto ti Dios a nangayab kadakayo.

¹⁶Kas nailanad iti Nasantoan a Surat: “Agsantokayo, agsipud ta nasantoanak.”

¹⁷Awan idumduma ti Dios. Ukomenna dagiti tattao kas mayannurot iti aramidda. Kunayo, “Amami” no agkararagkayo iti Dios. Ngarud, no kasta ti awagyo, masapul nga agbuteng ken agraemkayo kenkuana bayat ti panagbiagyo ditoy daga.

¹⁸Ta ammoyo no ania ti naibayad tapno mawayawayaankay iti awan serserbina a panagbiag a tinawidyo kadagiti kapuonanyo. Saankayo a nagatang babaen iti banag a madadael, kas iti pirak wenno balitok.

¹⁹Nawayawayaankayo ketdi babaen iti pannakaidaton iti napateg a dara ni Cristo a mayarig iti kordero nga awan mulit ken tulawna.

²⁰Sakbay a pinarsua ti Dios ti lubong, pinilina ni Cristo ket naiparangarang kadagitoy maudi nga aldaw tapno maisalakankayo.

²¹Gapu ta namatikayo kenkuana, nagtalekkay iti Dios a namagungar ken namagbalin kenkuana a mannakabalin unay. Naiturong iti Dios ti pammati ken namnamayo.

²²Babaen iti panagtungpalyo iti kinapudno, napakawan dagiti basbasolyo ket nadalusankayo. Gapu ta addan pudno a panagayatyo kadagiti kakabsatyo iti pammati, agiinnayatkayo ngarud iti amin a pusoyo.

²³Naipasngaykayo manen saan a babaen iti agrupsa a bukel no di ket babaen iti sibibiag ken agnanayon a sao ti Dios.

²⁴Kas kuna ti Nasantoan a Surat: “Kasla ruot dagiti amin a tattao Ket mayarig kadagiti sabong ti dayagda, Magango ti ruot, ket maregreg ti sabongna

²⁵Ngem ti sao ti Apo agtalinaed nga agnanayon.” Daytoy a sao isu ti Naimbag a Damag a naikasaba kadakayo.