Read Iloko 1 Peter 3 Bible Online

1 Peter 3 - Iloko bible

1 Peter 3

¹Dakayo a babbai a naasawaan, masapul a paiturayankayo kadagiti assawayo tapno iti panagbiagyo, maguyugoyyonto a mamati iti sao ti Dios dagiti saan pay a mamati kadakuada. Saanen a masapul nga agsaokayo

²ta makitadanto ti kinasingpet ken kinatakneng ti panagbiagyo.

³Dikay koma aglablabes nga agpapintas kas iti nagarbo a panagbubuok, panagalahas ken panagkawes.

⁴Ngem buklen koma ti pintasyo iti nasayaat a panagpuspuso, ti di agkupas a libnos ti kinaemma ken kinatalna ti espiritu. Isu daytoy ti kinapintas nga ibilang ti Dios a kapapatgan.

⁵Kastoy ti panagpapintas dagiti nasantoan a babbai idi un-unana: nagtalekda iti Dios ket pinaiturayanda kadagiti assawada.

⁶Kasta idi ni Sara. Nagtulnog ken ni Abraham ket inawaganna nga apona. Dakayo ita dagiti annak ni Sara no agaramidkayo iti naimbag ken awan koma ti pagbutengan-yo.

⁷Kasta met kadakayo a lallaki a naasawaan. Iti pannakitaktakunaynayyo kadagiti assawayo, masapul a bigbigenyo a nakapkapsutda ngem dakayo. Isut' gapuna nga agraemkayo kadakuada, agsipud ta kas kadakayo, awatendanto met ti agnanayon a biag a sagut ti Dios. Aramidenyo daytoy tapno maipangagto dagiti kararagyo.

⁸Kamaudiananna, agmaymaysakay iti panunot ken rikna. Agiinnayatkayo a kas agkakabsat. Manangngaasi koma ti tunggal maysa ket saankayo nga agpalpalangguad.

⁹Diyo balsen dagiti agaramid kadakayo iti dakes. Diyo ilunod dagiti mangilunod kadakayo. Dawatenyo ketdi a bendisionan ida ti Dios agsipud ta idi ayabannakayo ti Dios inkarina a bendisionannakayo.

¹⁰Kas kuna ti Nasantoan a Surat: “Siasinoman nga agtarigagay iti naragsak ken narang-ay a panagbiag, masapul a saan a mamadpadakes, saan nga agulbod.

¹¹Adaywanna ti dakes ket agaramid iti naimbag. Birokenna ti kappia iti amin a kabaelanna.

¹²Ta siiimatang ti Apo kadagiti nalinteg, ket dengdenggenna dagiti kararagda; ngem busorenna dagiti agaramid iti dakes.”

¹³Adda aya mangranggas kadakayo no nareggetkayo nga agaramid iti naimbag?

¹⁴Ngem uray no agsagabakayo gapu iti panagaramidyo iti naimbag, nagasatkayo. Dikay agbuteng kadagiti tattao. Ket diyo ipalubos nga adda mangted iti pagdanaganyo.

¹⁵Ngem iti pusoyo, raemenyo ni Cristo a kas Apo. Sisasaganakayo koma a kanayon nga agpalawag no saludsodenda maipapan iti namnama nga adda kadakayo, ngem agsaokayo a sipapakumbaba ken napnoan dayaw. Pagtalinaedenyo a nadalus ti konsensiayo tapno mabainan dagiti nangibagbaga a dakes dagiti aramidyo kas pasurot ni Cristo.

¹⁷Ta naim-imbag ti agsagaba gapu iti panagaramid iti naimbag, no isut' pagayatan ti Dios, ngem ti agsagaba gapu iti panagaramid iti dakes.

¹⁸Naminsan a natay ni Cristo a maipaay iti amin tapno mapakawan dagiti basbasoltayo. Natay ti nalinteg a tao gapu kadagiti nakillo tapno yasidegnakayo iti Dios. Napapatay iti bagi ngem napagungar iti espiritu,

¹⁹ket iti daytoy a kasasaadna napan nangasaba kadagiti naibalud nga espiritu.

²⁰Dagitoy ti espiritu dagiti saan a nagtulnog idi tiempo ni Noe idinto a siaanus ti Dios a nangur-uray kadakuada bayat ti pannakaaramid ti daong. Walo amin dagiti tattao nga adda iti daong. Naisalakanda iti danum.

²¹Mayasping daytoy a danum iti buniag a makaisalakan ita kadakayo. Saan a babaen iti pannakaugas ti rugit ti bagi, no di ket iti panagkari iti Dios babaen iti nadalus a konsensia. Isalakannakayo ti buniag babaen iti panagungar ni Jesu-Cristo

²²a napan sadi langit. Adda itan iti makannawan ti Dios, ket iturayanna dagiti amin nga angheles, dagiti nailangitan nga agtuturay ken pannakabalin.