Read Iloko 1 Peter 4 Bible Online

1 Peter 4 - Iloko bible

1 Peter 4

¹Gapu ta nagsagaba ni Cristo iti bagi, sisasaganakayo koma nga agsagaba a kas kenkuana, agsipud ta saanen nga agbasol ti siasinoman nga agsagaba iti bagi.

²Ngarud, manipud ita, masapul nga iturayan ti pagayatan ti Dios ti nabati pay nga aldaw ti panagbiagyo ditoy daga, a saan ketdi a dagiti nailubongan a tarigagay.

³Masapul a diyo aramidenen dagidi inar-aramidyo iti napalabas—dagiti pagay-ayat dagiti Hentil nga aramiden. Iwaksiyon ti kinarugit, kinaderrep, panagbartek, kinabuklis, aglablabes a panagrarambak ken ti makarimon a panagrukbab kadagiti didiosen.

⁴Ket ita, masdaawda ta dikay makibunggoyen kadakuada iti aglablabes ken nabarayuboy a panagbiag. Daytoy ti gapuna a padpadaksendakayo.

⁵Ngem dumatagdanto iti Dios a sisasagana a mangukom kadagiti nabiag ken natay.

⁶Isut' gapuna a naikasaba met ti Naimbag a Damag uray kadagiti natay tapno maukomda met a kas kadagiti amin a tattao. Ngem naikasaba kadakuada ti ebanghelio tapno makapagbiagda a naespirituan kas iti pagayatan ti Dios.

⁷Asidegen ti panungpalan dagiti amin a bambanag. Agbiagkayo ngarud a nanakem ken nateppel tapno mabalinyo ti agkararag.

⁸Kangrunaan unay, agiinnayatkayo a sipupudno agsipud ta ti ayat punasenna ti adu a basbasol.

⁹Nabara koma ti panagsisinnangailiyo.

¹⁰Aramaten koma ti tunggal maysa ti bukodna a sagut nga inawatna iti Dios a maipaay iti pagimbagan ti padana a tao, kas naimbag nga agaywan kadagiti nadumaduma a parabur nga inted ti Dios.

¹¹Siasinoman a mangasaba, masapul nga ikasabana ti sao ti Dios. Siasinoman nga agserbi, masapul nga agserbi babaen iti pigsa nga inted ti Dios kenkuana. Iti kasta, iti amin a banag, maidaydayaw koma ti Dios babaen ken ni Jesu-Cristo, nga addaan iti dayag ken pannakabalin iti agnanayon nga awan inggana. Amen.

¹²Gagayyemko, diyo pagsiddaawan ti nasaem a pannakasuot a sagabaenyo a kasla adda karkarna a mapaspasamak kadakayo.

¹³Maragsakankayo koma ketdi ta agsagsagabakay iti wagas a panagsagaba ni Cristo tapno naan-anay ti rag-oyo inton maiparangarang ti dayagna.

¹⁴Nagasatkayo no mapabainankayo gapu ta pasurotnakayo ni Cristo; ta agtaeng kadakayo ti dayag ti Espiritu ti Dios.

¹⁵Awan koma ti agsagaba kadakayo a maigapu iti pammapatay, panagtakaw, panagaramid iti dakes, wenno iti panangpataud iti riri.

¹⁶Ngem no adda agsagaba gapu ken Cristo, dina koma ibain no di ket agyaman iti Dios ta ibaga dagiti tattao nga isu ket pasurot ni Cristo.

¹⁷Dimtengen ti tiempo a panangukom ti Dios ket umunanto nga ukomenna dagiti bukodna a tattao. No datayo ti pangrugian ti panangukomna, anianto ngata ti pagtungpalan dagiti saan nga agtulnog iti ebanghelio ti Dios?

¹⁸Kas kuna ti Nasantoan a Surat: “No narigat a maisalakan ti nalinteg, Anianto ngarud ti pagbanagan dagiti managbasol ken awan Diosna?”

¹⁹Ngarud, no agsagabaka kas pagayatan ti Dios, agaramidka, iti naimbag ket agkammatalekka iti Namarsua, isu a mangtungpal iti karina.