Read Iloko 1 Peter 5 Bible Online

1 Peter 5 - Iloko bible

1 Peter 5

¹Agdawatak kadakayo, padak a panglakayen ti iglesia. Maysaak a saksi iti panagsagaba ni Cristo, ken mairamanakto met iti dayag a maiparangarang. Igunamgunamko ngarud kadakayo nga

²aywananyo ti grupo dagiti mamati, ti arban nga inted ti Dios kadakayo, kas iti panangaywan ti maysa a tao iti arban ti karnero. Aywananyo a siaayat ti arban a kas iti kayat ti Dios nga aramidenyo. Saankayo koma a mapilpilit. Agtrabahokayo, saan a gapu iti tangdan, no di ket gapu iti pudno a tarigagay iti panagserbi.

³Diyo adipenen dagiti naitalek kadakayo. Agbalinkayo koma ketdi a pagwadanda.

⁴Ket inton agparang ti Pangulo a Pastor, awatenyonto ti nadayag a korona a dinto agpukaw ti raniagna.

⁵Dakayo nga agtutubo, paiturayankayo met kadagiti nataengan. Dakay amin, agtitinnulongkayo kas napakumbaba nga adipen, ta kuna ti Nasantoan a Surat, “Busoren ti Dios dagiti natangsit, ngem paraburanna dagiti napakumbaba.”

⁶Awatenyo a sipapakumbaba ti mannakabalin nga ima ti Dios tapno itan-oknakay inton dumteng ti tiempona.

⁷Itaklinyo kenkuana dagiti amin a pakaringgoranyo gapu ta ipatpategnakayo.

⁸Agsalukagkayo. Agsiputkayo. Agdakdakiwas ti Diablo a kabusoryo—kasla leon a ngumerngernger nga agsapsapul iti alun-onenna.

⁹Agtalinaedkayo a natibker iti pammati ket saankay a sumuko kenkuana. Kas ammoyo, saan laeng a dakayo ti agsagsagaba iti kastoy a rigat no di pay ket dagiti kakabsatyo iti pammati iti entero a lubong.

¹⁰Ngem kalpasan ti mabiit a panagsagabayo, pagbalinennakayto a naan-anay ti Dios. Wen, ti Dios ti amin a parabur a nangayab kadakayo a makiranud iti agnanayon a dayagna babaen iti pannakikaysayo ken Cristo. Patibkerennakay iti pammati, papigsaenna ti pakinakemyo ken ipasdeknakay iti nalagda a fondasion.

¹¹Sapay koma ta agturay iti agnanayon awan inggana! Amen.

¹²Insuratko daytoy babaen iti tulong ni Silvano nga imbilangko a mapagtalkan a kabsat. Sinuratankayo ta kayatko a papigsaen ti pakinakemyo ken paneknekan a daytoy ti pudno a parabur ti Dios. Agtalinaedkayo a natibker iti daytoy.

¹³Pakomustaannakayo ti iglesia iti Babilonia a pinili met ti Dios a kas kadakayo. Agpakomusta met ni Marcos nga anakko.

¹⁴Agkikinnablaawkay iti nakristianoan nga agek. Sapay koma ta adda kadakay amin ti talna ken ni Cristo.