Read Iloko 2 Peter 2 Bible Online

2 Peter 2 - Iloko bible

2 Peter 2

¹Iti napalabas, timmaud dagiti sinan-profeta iti Israel. Kasta met nga addanto dagiti sinan-maestro nga umay kadakayo. Awanto ti makadkadlaw iti panangiserrekda kadagiti makadadael ken saan a pudno a pannursuro ket laksidendanto ti Apo a nangsubbot kadakuada. Iti kasta, kellaatto a dumteng ti pannakadadaelda.

²Uray pay no kasta, adunto ti tumulad iti saan a nasayaat nga aramidda, ket gapu kadakuada, madadaelto ti Dalan ti kinapudno.

³Gapu iti kinaagumda, pagsapuldanto ti panangipakaammoda kadagiti parbo a sarsarita. Ngem nabayagen a nakasagana ti Mangukom kadakuada, ket saan a matmaturog ti Mangdadael kadakuada.

⁴Saan a kinaasian ti Dios dagiti angheles a nagbasol. Intappuakna ketdi ida idiay infierno, iti kasipngetan a lugar a nakakawaranda, a pangur-urayanda iti idadateng ti Aldaw ti Panangukom.

⁵Saanna met a kinaasian dagiti tattao nga awanan-dios iti daydi daan a lubong idi pinaglayusna ti daga. Ni laeng Noe a nangikasaba iti kinalinteg ti insalakanna agraman dagiti pito a tattao.

⁶Dinusa ti Dios dagiti siudad ti Sodoma ken Gomorra. Pinuoranna agingga a dimmapuda ket pinagbalinna ida a pagulidanan ti mapasamakto kadagiti awanan-dios.

⁷Inispalna ni Lot, maysa a nalinteg a tao a nariribuk iti kinadakes dagiti managlabsing iti linteg.

⁸Nagnaed iti sidongda ket inaldaw a natutuok kadagiti dakes a nakita ken nangngegna nga aramidda.

⁹Kas ipaneknek dagitoy, ammo ti Apo nga isalakan dagiti nasingpet a tattao iti pakasuotanda. Ammona met a guardiaan dagiti managdakdakes agingga a dumteng ti Aldaw ti Panangukom a panagsagabada,

¹⁰nangruna unay dagiti sumursurot iti awis ti kinaderrepda ken manglalais iti turay ti Dios. Natured ken napalangguad dagitoy a sinan-maestro. Saanda nga agbuteng a manglais kadagiti nadayag sadi langit.

¹¹Uray dagiti angheles, idinto a napigpigsa ken dakdakkel ti pannakabalinda ngem isuda, dida aramaten ti pammabalaw iti panangidarumda kadakuada iti imatang ti Apo.

¹²Ngem saan a pampanunoten dagitoy a sinan-mamaestro ti aramidenda—kasdala kadagiti atap nga animal a nayanak tapno matiliw ken mapapatayda. Madadaeldanto a kas kadagiti atap nga animal.

¹³Gapu ta pinagsagabada dagiti sabali a tattao, agsagabadanto met. Ta kitaenyo, tapno matungpal dagiti nailasagan a tarigagayda, aggangganasda iti nalabes a panagraragsakda uray tengnga ti aldaw! Dumar-ayda met iti panagsasangoyo iti panganan, ngem nakababain ken nakaal-alas ti aramidda. Maragsakanda la unay iti panangallilawda kadakayo.

¹⁴Kayatda a kaiddaen ti tunggal babai a makitada; saanda a mauma nga agbasol. Iturongda pay dagiti nakapuy iti pakatnagan. Iturayan ida ti kinaagum. Awan duadua a mailunoddanto!

¹⁵Pinanawanda ti pudno a dalan ket nayaw-awanda. Inaramidda ti kas iti inaramid ni Balaam nga anak ni Bosor, a nagbasol gapu iti kinaagumna iti kuarta.

¹⁶Ngem nagballatek kenkuana ti basolna; nagsao a kas tao ti bakodna nga asno ket pinasardengna ti minamauyong nga aramid ti profeta.

¹⁷Mayarig dagitoy a tattao iti namagaan nga ubbog. Kasda la ulep a mayang-angin iti napigsa. Insaganan ti Dios ti pagyananda iti mangliwengliweng a sipnget.

¹⁸Napigsa ti timekda ngem minamaag ken awan serserbi ti sawenda. Babaen kadagiti dakes a tarigagay ken kinaderrep, ipalab-ogda dagiti tattao a mangrugrugi a makaruk-at iti dakes a panagbiag.

¹⁹Ikarida kadakuada ti wayawaya, idinto nga adipen ida dagiti dakes a tarigagayda ta ti aniaman a mangparmek iti tao, iturayan dayta a nangparmek kenkuana.

²⁰Maisalakan dagiti tattao iti kinadakes ti lubong babaen iti pannakaammoda ken ni Jesu-Cristo nga Apo ken Mangisalakan kadatayo. Ngem no makayawan ken agsublida manen iti sigud nga aramidda, dakdakesen ti kasasaadda ngem idi damo.

²¹Naim-imbag pay koma a dida nasursuro ti dalan ti kinalinteg, ngem tallikudanda kalpasan ti pannakaisuro kadakuada ti nasantoan a bilin a naited kadakuada.

²²Ipakita ti napasamak kadakuada a pudno ti pagsasao: “Kanen manen ti aso ti insarruana” ken “Agsubli nga aglugnak ti nadigos a baboy.”