Read Iloko 1 John 1 Bible Online

1 John 1 - Iloko bible

1 John 1

¹Isuratmi kadakayo ti nangngeg ken nakitami maipapan iti Sao ti biag nga addan manipud idi punganay. Nangngeg ken nakitami; wen, nakita ken nasagidmi.

²Idi naiparangarang daytoy a biag, nakitami; iti kasta, paneknekan ken ipakaammomi kadakayo ti naipakaammo kadakami maipapan iti agnanayon a biag nga addan idi iti Ama.

³Ngarud, ibagami ti nakita ken nangngegmi tapno mairamankayo met iti pannakikadkaduami iti Ama ken ni Jesu-Cristo nga Anakna.

⁴Isuratmi daytoy tapno naan-anay ti rag-omi.

⁵Daytoy ti mensahe a nangngegmi iti Anakna ken ipakaammomi kadakayo: Ti Dios ket silaw; awan a pulos ti sipnget kenkuana.

⁶No kunatayo a makikadkaduatayo kenkuana, ngem agbibiagtayo met iti sipnget, ulbodtayo iti sao ken aramid.

⁷Ngem no agbiagtayo iti lawag, a kas iti kaaddana iti lawag, agkakaduatayo ngarud, ket ti dara ni Jesus nga Anakna ugasannatayo iti amin a basol.

⁸No kunatayo nga awan basoltayo iti Dios, allilawentayo ti bagitayo ket saan nga agtaeng ti kinapudno kadatayo.

⁹Ngem no ipudnotayo dagiti basbasoltayo, tungpalenna ti karina ket aramidenna ti maitutop. Pakawanenna dagiti basoltayo ket ugasannatayo iti amin a kinadakestayo.

¹⁰No kunatayo a ditay nagbasol, pagbalinentayo nga ulbod ti Dios, ket saan nga agtaeng ti saona kadatayo.