Read Iloko 1 John 2 Bible Online

1 John 2 - Iloko bible

1 John 2

¹Annakko, isuratko daytoy kadakayo tapno dikayo agbasol. Ngem no adda makabasol, adda mangibabaet kadatayo iti Ama—ni Jesu-Cristo a nalinteg.

²Ni Cristo met laeng ti pakapakawanan dagiti basoltayo, ket saan laeng a dagiti basoltayo, no di pay ket dagiti basol ti amin a tao.

³No tungpalentayo dagiti bilbilin ti Dios, awan duadua nga am-ammotayo ti Dios.

⁴No adda agkuna nga am-ammona ti Dios ngem dina met tungpalen dagiti bilinna, ulbod ti kasta a tao ket saan nga agtaeng ti kinapudno kenkuana.

⁵Ngem ti mangtungpal iti sao ti Dios, ipakitana a naan-anay ti ayatna iti Dios. Ti pakapnekan nga agbibiagtayo iti Dios isu daytoy:

⁶Ti agkuna nga agtalinaed iti Dios, masapul nga agbiag a kas iti panagbiag ni Jesu-Cristo.

⁷Ay-ayatek a gagayyem, saan a baro a bilin daytoy isuratko kadakayo. Isu met laeng daydi daan a bilin a naited kadakayo idi damo, daydi mensahe a nangngegyo.

⁸Nupay kasta, makuna a baro a bilin ti isuratko kadakayo ta makita ken ni Cristo, kasta met kadakayo, ti kinapudno daytoy. Ta agpukpukawen ti sipnget, ket agraniagen ti pudno a silaw.

⁹Ti agkuna nga adda iti lawag ngem guraenna met ti kabsatna, adda pay laeng iti sipnget.

¹⁰Ti agayat iti kabsatna, agtalinaed iti lawag, ket awan kenkuana ti pakaigapuan ti panagbasol ti sabali.

¹¹Ngem ti manggura iti kabsatna, adda iti sipnget ken magmagna iti sipnget, ket dina ammo ti turturongenna, agsipud ta kinullaapan ti sipnget dagiti matana.

¹²Annakko, agsuratak kadakayo, agsipud ta napakawanen dagiti basbasolyo gapu ken ni Cristo.

¹³Amma, agsuratak kadakayo, agsipud ta am-ammoyo ti Dios nga addan manipud idi punganay. Agtutubo a lallaki, agsuratak kadakayo, agsipud ta pinarmekyo ti Managdakdakes.

¹⁴Nagsuratak kadakayo, annakko, agsipud ta am-ammoyo ti Ama. Nagsuratak kadakayo, amma, agsipud ta am-ammoyo ti addan manipud idi punganay. Nagsuratak kadakayo, agtutubo a lallaki, agsipud ta napigsakayo, ken agtalinaed kadakayo ti sao ti Dios ken pinarmekyo ti Managdakdakes.

¹⁵Diyo ayaten ti lubong wenno uray ania nga adda iti lubong. No ayatenyo ti lubong, awan ti panagayatyo iti Ama.

¹⁶Ta agtaud iti lubong ti amin nga adda ditoy lubong, a kas iti kinaderrep ti derrep, kinaderrep ti mata ken kinapalangguad. Saanda nga agtaud iti Ama.

¹⁷Agpukaw ti lubong ken ti amin a linaonna nga aguman ti tao. Ngem agtalinaed nga agnanayon ti agaramid iti pagayatan ti Dios.

¹⁸Annakko, asidegen ti panungpalan! Nangngegyo nga umayen ti Anti-Cristo. Ita, nagparangen ti adu a kabusor ni Cristo, ket daytoy ti pakaammoantayo nga asidegen ti panungpalan.

¹⁹Nupay no kaduatayo idi dagitoy a tattao, pinanawandatayo agsipud ta iti kinapudnona, saantayo a kadua ida. No kaduatayo ida, nakipagtaengda koma kadatayo. Ngem pimmanawda tapno nalawag a makita nga awan kaduatayo kadakuada.

²⁰Ngem addan kadakayo ti Espiritu Santo nga inted ni Cristo, isu nga ammoyo amin ti pudno.

²¹Agsuratak ngarud kadakayo, saan a gapu ta diyo ammo ti pudno, no di ket gapu ta ammoyon ti pudno ken ammoyo pay nga awan kinaulbod nga agtaud iti pudno.

²²Siasino ngarud ti ulbod? Ti agkuna a ni Jesus saan nga isu ti Cristo. Kabusor ni Cristo ti kasta a tao, ta dina bigbigen ti Ama ken ti Anak.

²³Ta ti saan a mangbigbig iti Anak, saanna met a bigbigen ti Ama. Ti mangbigbig iti Anak, bigbigenna met ti Ama.

²⁴Ngarud, italimengyo iti pusoyo ti nangngegyo manipud idi damo. No salimetmetanyo daytoy a mensahe, awan duadua a makipagtaengkayo nga agnanayon iti Anak ken iti Ama,

²⁵ket daytoy ti inkari ni Cristo kadatayo—ti biag nga agnanayon.

²⁶Isuratko dagitoy maipapan kadagiti mangal-allilaw kadakayo.

²⁷Ngem no maipapan kadakayo, agtalinaed ti Espiritu nga inted ni Cristo ket saanyon a masapul ti sabali a mangisuro. Ta ti Espirituna ti mangisuro kadakayo iti amin. Pudno ti isurona, saan a kinaulbod. Ngarud, kas mayannurot iti pannursurona, agtalinaedkayo ken ni Cristo.

²⁸Wen, annakko, agtalinaedkayo kenkuana tapno naturedtayo ket ditayto mabain a sumango kenkuana iti dayta nga Aldaw a yaayna.

²⁹Ammoyo a nalinteg ni Cristo. Masapul nga ammoyo met nga annak ti Dios ti amin nga agaramid iti nalinteg.