Read Iloko 1 John 4 Bible Online

1 John 4 - Iloko bible

1 John 4

¹Ay-ayatek a gagayyem, diyo patien ti amin nga agkuna nga adda ti Espiritu kadakuada, ngem suotenyo ida no agtaud iti Dios ti espiritu nga adda kadakuada. Ta nagwarasen ditoy lubong ti adu a sinan-profeta.

²Daytoy ti pakaammoanyo iti Espiritu ti Dios: Siasinoman a mangbigbig nga immay ni Jesu-Cristo iti lasag, adda kenkuana ti Espiritu nga agtaud iti Dios.

³Ngem siasinoman a di mangbigbig a nagbalin ni Jesus a tao, awan kenkuana ti Espiritu nga agtaud iti Dios. Agtaud iti Anti-Cristo ti espiritu nga adda kenkuana. Naibagan kadakayo ti isasangpetna ket ita addan ditoy lubong.

⁴Ngem kukuanakayo ti Dios, annakko, ket naparmekyon dagiti sinan-profeta, agsipud ta nabilbileg ti Espiritu nga adda kadakayo ngem ti espiritu nga adda kadagiti taga-lubong.

⁵Nailubongan dagiti sarsaritaen dagitoy a sinan-profeta, ket denggen ida ti lubong agsipud ta kukua ida ti lubong.

⁶Ngem datayo, kukuanatayo ti Dios. Dumngeg kadatayo ti tao a makaammo iti Dios. Saan a dumngeg kadatayo ti saan a kukua ti Dios. Daytoy ngarud ti pakaammoantayo iti paggiddiatan ti espiritu ti kinapudno ken ti espiritu ti kinaulbod.

⁷Ay-ayatek a gagayyem, agiinnayattayo, agsipud ta ti ayat agtaud iti Dios. Anak ti Dios ti siasinoman nga agayat, ket am-ammona ti Dios.

⁸Ti saan nga agayat, saanna nga ammo ti Dios, ta ti Dios ket ayat.

⁹Kastoy ti panangipakita ti Dios nga ay-ayatennatayo: Imbaonna ditoy lubong ti bugbugtong nga Anakna tapno maaddaantayo iti biag babaen kenkuana.

¹⁰Daytoy ti pudno a kaipapanan ti ayat: Saan a gapu ta inayattayo ti Dios, no di ket inayatnatayo, ta imbaonna ti Anakna a pakapakawanan dagiti basbasoltayo.

¹¹Patpatgek a gagayyem, no kastoy ti panagayat ti Dios kadatayo, rebbengna met nga agiinnayattayo.

¹²Awan pay ti nakakita iti Dios. Ngem no agiinnayattayo, agtaeng ti Dios kadatayo ket maan-anay ti ayatna kadatayo.

¹³Inted ti Dios ti Espirituna kadatayo. Ngarud, awan duadua nga agtaengtayo iti Dios ket agtaeng met ti Dios kadatayo.

¹⁴Nakita ken paneknekanmi nga imbaon ti Ama ti Anakna a Mangisalakan iti lubong.

¹⁵No ipaduyakyak ti maysa a tao a ni Jesus ket Anak ti Dios, agtaeng iti Dios ket agtaeng met kenkuana ti Dios.

¹⁶Ammo ken mamatikami nga ay-ayatennatayo ti Dios. Ti Dios ket ayat! Agtaeng iti Dios ti agtaeng iti ayat, ket agtaeng met kenkuana ti Dios.

¹⁷Agbalin a naan-anay ti ayat kadatayo tapno awan ti panagbutengtayo inton dumteng ti Aldaw ti Panangukom. Maaddaantayto iti tured agsipud ta ti panagbiagtayo ditoy lubong kas met idi ken ni Cristo.

¹⁸No adda ayat, awan panagbuteng, ta paksiaten ti naan-anay nga ayat ti amin a panagbuteng. Ngarud, saan pay a naan-anay ti ayat ti siasinoman nga agbuteng, agsipud ta agkuykuyog ti buteng ken ti dusa.

¹⁹Agayattayo agsipud ta immuna nga inayatnatayo ti Dios.

²⁰Ulbod ti agkuna nga ay-ayatenna ti Dios ngem guraenna met ti kabsatna. Ta dina mabalin nga ayaten ti Dios a dina makita, no dina ayaten ti kabsatna a makitana.

²¹Ngarud, daytoy ti bilin ni Cristo kadatayo: Ti agayat iti Dios, rebbengna met nga ayaten ti kabsatna.