Read Iloko Judges 1 Bible Online

Judges 1 - Iloko bible

Judges 1

¹Kalpasan ti ipapatay ni Josue, nakiuman dagiti Israelita ken ni Yahweh. Sinaludsodda, “Siasino kadagiti tribumi ti umuna a mapan mangraut kadagiti Cananeo iti masakupanmi?”

²“Dagiti tattao ti Juda,” insungbat ni Yahweh. “Ipasakupko kadakuada ti daga.”

³Kinuna dagiti tattao ti Juda kadagiti tattao ti Simeon, “Tulongandakami a mapan manggubat kadagiti Cananeo iti sakup a naited kadakami, ket kuyogendakayto met a mapan iti sakup a naituding kadakayo.” Iti kasta, nagkukuyog dagiti tribu ti Simeon

⁴ken Juda a napan nakigubat. Pinagballigi ida ni Yahweh. Inyawatna kadakuada dagiti Cananeo ken Perezeo ket pinarmekda ti 10,000 a lallaki idiay Bezek.

⁵Nasarakanda sadiay ni Adonibezek ket ginubatda.

⁶Naglibas ni Adonibezek, ngem kinamatda agingga a natiliwda. Pinutedda dagiti tangan dagiti ima ken sakana.

⁷Kinuna ni Adonibezek, “Inikkatko ti tangan ti ima ken saka dagiti 70 nga ar-ari ket nagpidpidutda iti murkat iti sirok ti lamisaanko. Binalesnakon ti Dios gapu iti inaramidko kadakuada.” Naipan ni Adonibezek idiay Jerusalem, ket sadiay ti nakatayanna.

⁸Rinaut dagiti tattao ti Juda ti Jerusalem ket sinakupda. Pinapatayda dagiti tattao sada pinuoran ti siudad.

⁹Insarunoda a napan ginubat dagiti Cananeo nga agnaed iti katurturodan, idiay Negeb ken iti tanap.

¹⁰Ginubatda met dagiti Cananeo idiay Hebron a maaw-awagan idi iti Kiriat-Arba. Pinarmekda dagiti siudad da Sesai, Ahiman ken Talmai.

¹¹Manipud sadiay, napan ginubat dagiti tattao ti Juda ti siudad ti Debir a maaw-awagan idi iti siudad ti Sefer.

¹²Kinuna ni Caleb, “Yasawakto ni Acsa nga anakko iti siasinoman a makaparmek iti siudad ti Sefer.”

¹³Ni Otniel nga anak ni Kenaz nga adien ni Caleb ti nakaparmek iti siudad ket isu ti nangasawa ken ni Acsa.

¹⁴Iti aldaw a panagkasarda, binilin ni Otniel ni Acsa a dumawat ken ni amana iti talon. Napan ngarud ni Acsa ken ni Caleb. Apaman a nakadissaag iti asnona, dinamag ni amana no ania ti gagarana.

¹⁵“Kayatko nga ikkannak kadagiti ubbog,” kinunana. “Ngamin, natikag ti daga nga intedmo kaniak.” Inted ngarud ni Caleb kenkuana ti maysa a disso a yan ti akingngato ken akimbaba nga ubbog.

¹⁶Pimmanaw dagiti kaputotan ti Kineo a katugangan ni Moises ken dagiti tattao ti Juda idiay Jerico a siudad ti palma. Napanda idiay let-ang ti Juda nga abagatan ti Arad ket nakipagnaedda kadagiti Amalekita.

¹⁷Nagtipon dagiti tattao ti Juda ken Simeon a napan nanggubat kadagiti Cananeo nga agnaed iti siudad ti Sefat ket pinarmekda ida. Inlunod ken dinadaelda ti siudad ken binaliwanda ti naganna. Pinanagananda iti Horma.

¹⁸Tinulongan ni Yahweh dagiti tattao ti Juda ket sinakupda ti katurturodan. Ngem dida sinakup ti Gaza, Askelon wenno Ekron ken dagiti kabangibangda a lugar. Adda dagiti lugan a landok dagitoy a tattao nga agnaed iti igid ti baybay, isu a dida kabaelan a pinapanaw ida.

²⁰Kas imbilin ni Moises, naited ti Hebron ken ni Caleb a nangpaksiat kadagiti tallo a familia a nagtaud kadagiti annak ni Anak.

²¹Ngem saan a pinapanaw dagiti kameng ti tribu ti Benjamin dagiti Jebuseo nga agnanaed idiay Jerusalem. Agpapan ita, makipagnaed dagiti Jebuseo kadagiti Benjaminita.

²²Napan met ginubat dagiti tribu ti Efraim ken Manases ti Betel a maaw-awagan idi iti Luz. Tinulongan ida ni Yahweh. Pinasiimda ti siudad.

²⁴Nakakita dagitoy iti lalaki a naggapu iti siudad ket kinunada kenkuana, “Isurom no kasano ti iseserrekmi iti siudad tapno saandaka a dangran.”

²⁵Iti kasta, impakitana ti dalan. Pinapatayda amin a tattao iti siudad, malaksid iti daytoy a lalaki ken ti familiana.

²⁶Kalpasanna, napan daytoy a lalaki iti daga dagiti Heteo. Nangbangon iti siudad sadiay a pinanagananna iti Luz a naganna pay laeng agpapan ita.

²⁷Saan a pinapanaw ti tribu ti Manases dagiti agnaed kadagiti siudad ti Bet-sean, Taanac, Dor, Ibleam, Megiddo ken kadagiti kabangibang nga il-ili. Nagtultuloy ti panagnaed dagiti Cananeo sadiay.

²⁸Idi pimmigsan dagiti Israelita, pinilitda nga agtrabaho kadakuada dagiti Cananeo, ngem dida pinapanaw ida.

²⁹Di met pinapanaw ti tribu ti Efraim dagiti Cananeo nga agnaed idiay siudad ti Gezer, ket nakipagnaedda kadagiti Israelita.

³⁰Saan a pinapanaw ti tribu ti Zabulon dagiti agnaed kadagiti siudad ti Kitron ken Naalol. Nakipagtaeng dagiti Cananeo kadakuada, ket pinagtrabaho ida dagiti Israelita.

³¹Saan a pinagtalaw ti tribu ti Aser dagiti agnaed kadagiti siudad ti Acco, Sidon, Alab, Aksib, Helba, Afic ken Rehob.

³²Nakipagnaed dagiti Aserita kadagiti Cananeo a tubo sadiay agsipud ta dida pinapanaw ida.

³³Saan a pinagtalaw ti tribu ti Neftali dagiti agnaed kadagiti siudad ti Betsemes ken Bet-anat. Nakipagyanda kadagiti Cananeo nga agnaed sadiay ngem pinagtrabaho ida dagiti Israelita.

³⁴Sinunson dagiti Amorreo ti tribu ti Dan iti katurturodan ket dida intulok a sumalogda iti tanap.

³⁵Nagtultuloy a nagnaed dagiti Amorreo iti bantay Heres, Aijalon ken Saalbin. Ngem inturayan ida dagiti tribu ti Efraim ken Manases, ket pinilitda ida nga agtrabaho kadakuada.

³⁶Daytoy ti sakupen dagiti Amorreo: ti sang-atan ti Akrabim manipud Sela nga agpangato.