Read Iloko Judges 10 Bible Online

Judges 10 - Iloko bible

Judges 10

¹Idi natay ni Abimelec, adda lalaki a nangwayawaya iti Israel. Isu ni Tola nga anak ni Pua ken apoko ni Dodo. Nagtaud ni Tola iti tribu ti Issacar ket nagnaed idiay Samir iti katurturodan ti Efraim.

²Nagturay iti 23 a tawen iti Israel ket idi matay, naitanem idiay Samir.

³Ni Jair a Galaadita ti simmublat ken ni Tola ket 22 a tawen nga inturayanna ti Israel.

⁴Adda 30 a lallaki nga annakna nga addaan iti saggaysa nga asno. Adda 30 a siudadda idiay Galaad ket napanaganan dagitoy iti il-ili ni Jair. Agpapan kadagitoy nga aldaw, dayta pay laeng ti naganda.

⁵Natay ni Jair ket naitanem idiay Camon.

⁶Nagbasol manen dagiti Israelita ken ni Yahweh. Nagdaydayawda kadagiti Baal ken Astarot agraman dagiti didiosen ti Siria, Sidon, Moab, Ammon ken Filistia. Linaksidda ni Yahweh ket insardengda ti nagdaydayaw kenkuana.

⁷Gapu iti daytoy, nakapungtot ni Yahweh kadagiti Israelita ket binay-anna dagiti Filisteo ken dagiti Ammonita a mangsakup kadakuada.

⁸Iti uneg ti 18 a tawen, pinarparigatda dagiti amin nga Israelita nga agnaed idiay Galaad iti ballasiw ti Karayan Jordan.

⁹Binallasiw met dagiti Ammonita ti Jordan ket ginubatda dagiti tribu ti Juda, Benjamin ken Efraim. Iti kasta, nagsagaba ti Israel iti napalalo.

¹⁰Immawag dagiti Israelita ken ni Yahweh ket kinunada, “Nagbasolkami kenka, O Apo. Linaksiddaka, sika a Diosmi ket nagdaydayawkami kadagiti Baal.”

¹¹Simmungbat ni Yahweh, “Pinarigatdakay idi dagiti Egipcio, Amorreo, Ammonita, Filisteo,

¹²Sidonio, Amalekita ken dagiti Maonita. Gapu ta immawagkayo kaniak, iti kasta, insalakankayo kadakuada.

¹³Ngem kaskasdi a linaksiddak ket nagdaydayawkayo kadagiti didiosen. Ita, saankayo nga isalakanen.

¹⁴Apay a saankayo nga agpatulong kadagiti didiosen a piniliyo tapno ispalendakayo iti panawen ti panagrigatyo?”

¹⁵“Nagbasolkami,” kinuna dagiti Israelita ken ni Yahweh. “Aramidem ti kayatmo kadakami, ngem pangngaasim ta isalakannakam ita nga aldaw.”

¹⁶Imbellengda ngarud dagiti didiosenda ket nagdaydayawda ken ni Yahweh. Naasian ni Yahweh kadagiti Israelita ta dinan maibturan a kitaen ti kasasaadda.

¹⁷Naguummong ti armada dagiti Ammonita ket nagkampoda idiay Galaad. Naguummong met dagiti Israelita ket nagkampoda idiay Mizpa.

¹⁸Nagsasarita dagiti tattao ken dagiti pangulo ti Galaad. Kinunada, “Siasino ti mangidaulo kadatayo a makigubat kadagiti Ammonita? Ti mangidaulo isunto ti bigbigentayo a pangulotayo.”