Read Iloko Judges 11 Bible Online

Judges 11 - Iloko bible

Judges 11

¹Natured a mannakigubat ni Jefte. Taga-Galaad ken anak ti maysa a balangkantis. Amana ni Galaad

²nga addaan pay sabali nga annak a lallaki iti pudno nga asawana. Idi dimmakkel dagitoy nga annak, pinagtalawda ni Jefte. Kinunada kenkuana, “Awanto ti tawidem ken ni tatang, ta anaknaka iti sabali a babai.”

³Pimmanaw ngarud ni Jefte iti sidong dagiti kakabsatna ket napan nagnaed idiay Tob. Sadiay, naawisna ti sumagmamano a lallaki a nadamsak a masansan a kaduana nga agsansaneb.

⁴Iti saan a nabayag, idi rinaut dagiti Ammonita dagiti Israelita,

⁵napan dagiti pangulo ti Galaad idiay Tob tapno ayabanda ni Jefte.

⁶“Umaynakam ipanguloan,” kinunada kenkuana, “tapno mabalintayo ti makiranget kadagiti Ammonita.”

⁷Ngem simmungbat ni Jefte, “Kasta unay ti gurayo kaniak idi, isu a pinapanawdak iti balay ni tatang. Apay nga umaykay ita ta agpeggadkayo?”

⁸Kinunada kenkuana, “Sika ti pangnamnamaanmi itan. Sumurotka kadakami ta gubatentayo dagiti Ammonita. Sikanto ti pangulo dagiti amin a taga-Galaad.”

⁹Kinuna ni Jefte kadakuada, “No ikuyogdak a manggubat kadagiti Ammonita ket ipalubos ti Apo nga agballigiak, siakto ngarud ti mangituray kadakayo.”

¹⁰“Wen, umanamongkami. Ti Apo ti makasaksi,” insungbatda.

¹¹Iti kasta, kimmuyog ni Jefte kadagiti pangulo ti Galaad ket pinagbalinda nga agturay ken panguloda. Idiay Mizpa, imbaga ni Jefte iti imatang ni Yahweh dagiti kondision iti panangawatna iti pagrebbenganna.

¹²Nangibaon ni Jefte kadagiti mangibaga iti ari dagiti Ammonita iti kastoy, “Ania ti guraenyo kadakami? Ania ti panggapuanyo a mangraut kadakami?”

¹³Sinungbatan ti ari ti Ammon dagiti imbaon ni Jefte, “Kayatmi a maisubli kadakami dagiti dagdagami. Idi rimmuar dagiti Israelita idiay Egipto, inagawda dagiti dagdagami manipud Karayan Arnon agingga iti Karayan Jabbok ken Karayan Jordan.”

¹⁴Nangibaon manen ni Jefte kadagiti tattaona a mangibaga iti sungbatna iti ari ti Ammon.

¹⁵Kinunada, “Saan a pudno nga inagaw dagiti Israelita ti daga ti Moab wenno ti daga ti Ammon.

¹⁶Idi pimmanawda idiay Egipto, limmasatda iti let-ang nga agturong iti Baybay Aqaba agingga a dimtengda idiay Kades.

¹⁷Kalpasanna, nangibaonda kadagiti tattao a mangkiddaw iti ari ti Edom a palubosanna koma ida a lumasat iti dagana. Ngem saan a pinalubosan ti ari ida. Dinawatda met ti pammalubos ti ari ti Moab, ngem uray isu dina impalubos. Iti kasta, nagyan dagiti Israelita idiay Kades.

¹⁸Impatuloyda ti limmasat iti let-ang. Linikawda ti daga ti Edom ken ti Moab, agingga a dimmanonda iti akindaya a paset ti Moab, iti ballasiw ti Karayan ti Arnon. Nagkampoda sadiay ngem dida bimmallasiw iti Arnon ta isu ti nagbeddengan ti Moab.

¹⁹Nangibaon manen dagiti Israelita kadagiti mapan ken ni Sihon nga Amorreo nga ari ti Hesbon, ket dinawatda a palasatenna ida iti sakupna ta mapanda iti dagada.

²⁰Ngem saan a pinalubosan ida ni Sihon. Inummongna ketdi ti entero nga armadana, nagkampoda idiay Jaaz ket rinautda ti Israel.

²¹Ngem inyawat ti Apo a Dios ti Israel ni Sihon ken dagiti tattaona iti pannakabalin ti Israel. Ngarud, tinagikua dagiti Israelita ti amin a sakup dagiti Amorreo nga agnaed sadiay.

²²Tinagikuada amin a daga dagiti Amorreo manipud Arnon iti abagatan agingga iti Jabbok iti amianan ken manipud iti let-ang iti daya agingga iti Jordan iti laud.

²³Iti kasta, ti Apo a Dios ti Israel ti nangpapanaw kadagiti Amorreo tapno tagikuaen dagiti Israelita ti dagada.

²⁴Kayatmo a maisubli kenka dagitoy a daga? Kukuam laeng ti inted ni Kemos a diosmo, ngem kukuami met ti inted ti Apo a Diosmi.

²⁵Nalalaingka aya ngem ni Balac nga anak ni Sefor nga ari ti Moab? Uray isu dina kinarit ti Israel. Dinakam ginubat.

²⁶Tallo gasut a tawen a sinakup ti Israel ti Hesbon ken Aroer ken dagiti il-ili iti lawlawda ken dagiti amin a siudad iti igid ti Karayan Arnon. Apay a dimo innala ida bayat dagita a tawen?

²⁷Awan ti dakes nga inaramidko kenka. Sika ti adda basolna ta gubatennakami. Ti Apo ti Ukom. Ita nga aldaw, ukomenna dagiti Israelita ken dagiti Ammonita.”

²⁸Ngem saan nga impangag ti ari dagiti Amorreo ti pinaibaga ni Jefte.

²⁹Ket dimteng ken ni Jefte ti pannakabalin ti Espiritu ni Yahweh. Linasatna ti Galaad ken Manases sa nagsubli idiay Mizpa ti Galaad. Manipud sadiay, napan idiay Ammon.

³⁰Inkari ni Jefte ken ni Yahweh: “No maparmekko dagiti Ammonita,

³¹ket agsubliak, puorakto a kas daton kenka ti umuna a sumabat kaniak nga aggapu iti balayko.”

³²Binallasiw ngarud ni Jefte ti karayan tapno gubatenna dagiti Ammonita ket pinagballigi ni Yahweh.

³³Dinarup ni Jefte ida manipud Aroer agingga iti Mennit—20 nga il-ili amin agingga iti Abel-keramim. Pinarmek ida dagiti Israelita, ket adu ti napapatay kadagiti Ammonita.

³⁴Ket idi nagawid ni Jefte iti balayna idiay Mizpa, sinabat ti anakna a babai nga agsalsala ken agtuktokar iti pandereta. Isu ti kakaisuna nga anakna.

³⁵Idi makita ni Jefte ti anakna, rinay-abna ti pagan-anayna gapu iti ladingitna. Kinunana, “Ay, anakko! Pagladingitem 'toy pusok. Apay a sika ti pakaigapuan ti panagleddaangko? Nagsapataak iti Apo ket diak maibabawi!”

³⁶“No nagsapataka iti Apo,” kinuna ti anakna, “tungpalem ti karim, ta pinagballiginaka a nangparmek kadagiti Ammonita a kabusormo.”

³⁷Ngem kinunana ken ni amana, “Adda la kiddawek kenka: palubosannak koma nga ikuyogko dagiti gagayyemko a mapan kadagiti bambantay tapno dung-awak iti dua a bulan ti ipapatayko a balasang.”

³⁸Pinalubosanna ti anakna a napan iti bambantay agraman dagiti gagayyemna ket nagdung-awda, agsipud ta matay a birhen.

³⁹Kalpasan ti dua a bulan, nagsubli ti balasang ken ni amana. Tinungpal ni Jefte ti inkarina ken ni Yahweh, ket natay a birhen pay laeng ti anakna. Daytoy ti nangrugian ti ugali idiay Israel

⁴⁰a tinawen a rummuar dagiti babbai nga Israelita ket uppat nga aldaw nga agdung-awda a kas panglagip iti anak ni Jefte.