Read Iloko Judges 13 Bible Online

Judges 13 - Iloko bible

Judges 13

¹Nagbasol manen dagiti Israelita ken ni Yahweh. Impalubosna nga iturayan ida dagiti Filisteo iti 40 a tawen.

²Iti dayta a tiempo, adda lalaki nga agnagan iti Manoa a taga-Zora a nagtaud iti tribu ti Dan. Saan nga aganak idi ti asawa ni Manoa.

³Nagparang ti anghel ni Yahweh iti babai. Kinunana, “Saanka a naganak idi ngem agsikogkanto ket ipasngaymonto ti maysa a lalaki.

⁴Manipud ita, saankan nga uminum iti arak ken dika met mangmangan iti uray ania a maiparit a taraon.

⁵Kalpasan ti pannakaipasngay ti anakmo, dimonto pukpukisan, agsipud ta manipud iti aldaw a pannakayanakna, maidatonto iti Dios a kas maysa a Nazireo. Isunto ti mangispal kadagiti Israelita iti ima dagiti Filisteo.”

⁶Napan ti babai iti asawana ket imbagana daytoy, “Immay kaniak ti maysa a tao ti Dios; napabutnganak ta kasla anghel ti Dios. Diak sinaludsod no sadino ti naggapuanna ket dina met imbaga ti naganna.

⁷Ngem imbagana nga agsikogakto ket aganakakto iti lalaki. Imbagana pay a diak umin-inum iti arak wenno naingel nga inumen wenno mangan iti uray aniaman a maiparit a taraon, ta maidatonto ti ubing iti Dios a kas Nazireo bayat ti panagbiagna.”

⁸Iti kasta, nagkararag ni Manoa ken ni Yahweh, ket kinunana, “Pagsubliem kadi, Apo, ti tao ti Dios nga imbaonmo kadakami ta ibagana no ania ti aramidenmi iti ubing inton mayanak.”

⁹Pinatgan ti Dios ti dawat ni Manoa, ket napan ti anghel ni Yahweh iti babai idi adda nga agtugtugaw iti talon. Awan idi ni Manoa iti ayanna.

¹⁰Dagus a nagtaray a napan ken ni asawana ket kinunana, “Adda manen ti lalaki a nagparang kaniak idi naminsan nga aldaw.”

¹¹Timmakder ni Manoa ket sinurotna ti asawana. Napan iti ayan ti lalaki ket sinaludsodna, “Sika kadi daydi lalaki a nakisao iti asawak?” “Wen, siak,” insungbatna.

¹²“Inton matungpal ti imbagam,” kinuna ni Manoa, “kasanonto ti pannakapatanor ti ubing? Anianto ti aramidenna?”

¹³Kinuna ti anghel, “Masapul nga aramiden ni asawam ti amin nga imbagak kenkuana.

¹⁴Maiparit a mangan iti uray ania nga agtaud iti ubas; saan nga uminum iti arak wenno naingel nga inumen wenno mangan iti aniaman a maiparit. Masapul a tungpalen ni asawam ti amin nga imbagak nga aramidenna.”

¹⁵Gapu ta saan nga ammo ni Manoa nga anghel ni Yahweh ti kasasaona, kinunana kenkuana, “Pangngaasim ta dika pay pumampanaw ta isaganaandaka iti urbon a kalding.” “No agbatiak,” kinuna ti anghel kenkuana, “saanak a mangan iti isaganayo. Ngem no kayatmo ti mangisagana, puoram a kas daton iti Apo.”

¹⁷Kinuna ni Manoa iti anghel, “Ibagam man kadakami ti naganmo tapno padayawandakanto inton matungpal ti imbagam.”

¹⁸“Apay a kayatmo a maammoan?” sinaludsod ti anghel. “Maysa a pagsidsiddaawan ti naganko.”

¹⁹Nangala ni Manoa iti urbon a kalding ken daton a makan sana indaton iti altar ni Yahweh a nakaskasdaaw dagiti aramidna.

²⁰Idi agpangpangato ti apuy manipud iti altar, nakita ni Manoa ken ti asawana ti anghel ni Yahweh. Adda iti apuy nga agpangpangato nga agturong iti tangatang. Nabigbig ni Manoa nga anghel ni Yahweh ti lalaki ket nagpaklebda iti daga. Saandan a nakita ti anghel.

²²Kinuna ni Manoa iti asawana, “Mataytan, ta nakitata ti Dios!”

²³Ngem simmungbat ti asawana, “No agpayso a kayatnata a patayen ti Apo, dina koma inawat dagiti datonta; dina koma impakita amin dagitoy wenno imbaga kadata dagitoy.”

²⁴Impasngay ti babai ti maysa a lalaki ket pinanagananna iti Samson. Dimmakkel ti ubing ket binendisionan ni Yahweh.

²⁵Rinugian ti Espiritu ni Yahweh a pinapigsa ni Samson idi adda iti Kampo ti Dan iti nagbaetan ti Zora ken Estaol.