Read Iloko Judges 14 Bible Online

Judges 14 - Iloko bible

Judges 14

¹Iti maysa nga aldaw, simmalog ni Samson idiay Timna a nakakitaanna iti maysa a Filistia.

²Nagawid ket kinunana kadagiti nagannak kenkuana, “Adda nasirpatko a Filistia idiay Timna a magustoak unay. Kayatko nga asawaen, isu nga inkay koma kasao.”

³Ngem kinuna dagiti nagannak kenkuana, “Apay a mangasawaka iti puli dagiti saan a kugit a Filisteo? Awan aya ti mapilim kadagiti kabagiantayo wenno maysa kadagiti kadaraantayo?” Ngem kinuna ni Samson ken ni amana, “Isu ti kayatko nga alaenyo nga asawaek.”

⁴Saan nga ammo dagiti nagannak kenkuana a ni Yahweh ti mangiturturong ken ni Samson iti daytoy nga aramidna. Agbirbirok ngamin ni Yahweh iti gundawayna a makigubat kadagiti Filisteo. Iti dayta a panawen, dagiti Filisteo ti mangituray iti Israel.

⁵Iti kasta, napan ni Samson idiay Timna a kinakuyogna dagiti nagannak kenkuana. Idi magmagnada kadagiti kaubasan sadiay, nangngegna ti agngerngernger a bumaro a leon.

⁶Pagammoan, bimmaba ti Espiritu ni Yahweh ken ni Samson. Pimmigsa ni Samson, ket babaen kadagiti imana, rinangrangkayna ti leon a kas iti panangrangkayna iti maysa nga urbon a kalding. Ngem dina imbaga kadagiti nagannak kenkuana ti inaramidna.

⁷Napanna ngarud kinasarita ti babai, ket nagustoanna.

⁸Kalpasan ti sumagmamano nga aldaw, nagsubli ni Samson a mangasawa kenkuana. Idi magmagna, simmiasi iti dalan tapno mapanna kitaen ti leon a pinatayna. Nasdaaw a nakakita iti adu nga uyokan ken diro iti uneg ti bangkay.

⁹Inakuyna ti diro kadagiti imana ket nangan iti daytoy bayat ti pannagnana. Nagtarus iti ayan dagiti nagannak kenkuana ket inikkanna ida. Nanganda ngem dina imbaga nga innalana ti diro iti bangkay ti leon.

¹⁰Napan ni amana iti balay ti babai ket nagpadaya ni Samson sadiay. Daytoy ti ugali dagiti babbaro idi.

¹¹Idi makita dagiti Filisteo ni Samson, nangipanda iti 30 a lallaki a mangadkadua kenkuana.

¹²Kinuna ni Samson kadakuada, “Burburtiaankayo. No mapugtoanyo ti kaipapananna sakbay a malpas ti padaya, ikkankayo iti 30 a kawes a linen ken 30 a pagan-anay a pagsukatan.

¹³Ngem no diyo mapugtoan ti kaipapananna sakbay a malpas ti boda, dakayo ti mangted iti 30 a kawes a linen ken 30 a pagan-anay a pagsukatan.” “Ala ngarud,” insungbatda, “ibagamon ta denggenmi.”

¹⁴Kinunana, “Iti mangmangan, rimmuar ti makan; iti napigsa, rimmuar ti nasam-it.” Kalpasan ti tallo nga aldaw, dida pay la napugtoan ti kayat a sawen ti burburtia.

¹⁵Iti maikapat nga aldaw, kinunada iti asawa ni Samson, “Sikapam ni asawam tapno ibagana kenka ti kaipapanan ti burburtiana. No madika, puorandaka ken ti balay ni amam. Inawisdakami kadi tapno pagpanglawendakami?”

¹⁶Iti kasta, napan kenkuana ti asawana. Agsangsangit a nagkuna, “Dinak gayam ay-ayaten! Kagurguranak! Nagburburtiaka kadagiti gagayyemko ket dimo pay imbagbaga kaniak ti kaipapananna!” Kinuna ni Samson kenkuana, “No diak pay imbaga kadagiti dadakkelko ti kaipapananna, apay ketdin nga ibagak kenka?”

¹⁷Daytoy ti nagsangsangitan ti babai bayat ti boda. Ngem iti maikapito nga aldaw, imbaga ni Samson agsipud ta pinilit ni asawana nga ibagana. Ket imbaga ti asawana daytoy kadagiti kailianna.

¹⁸Iti maikapito nga aldaw sakbay ti ipapan ni Samson iti kuarto, kinuna kenkuana dagiti lallaki ti siudad, “Ania pay ti nasamsam-it ngem ti diro? Ania pay ti napigpigsa ngem ti leon?” Simmungbat ni Samson: “No diyo pinagarado ti bakak, diyo koma naammoan ti burburtiak.”

¹⁹Pagammoan, bimmaba ti Espiritu ni Yahweh ken ni Samson ket pimmigsa. Simmalog a napan idiay Askelon. Sadiay, 30 a lallaki ti pinapatayna; innalana dagiti pagan-anayda sana inted kadagiti nangipatarus iti burburtiana. Gapu iti pungtotna iti inaramid ni asawana, nagawid iti balay ni amana.

²⁰Naited ti asawa ni Samson iti maysa kadagiti lallaki a bayabayna iti panagkasarda.