Read Iloko Judges 15 Bible Online

Judges 15 - Iloko bible

Judges 15

¹Iti saan a nabayag, iti panagani iti trigo, napan sinarungkaran ni Samson ti asawana. Insangpetanna iti urbon a kalding. Imbagana iti ama ti babai, “Kayatko ti sumrek iti kuarto ti asawak.” Ngem saan nga impalubos ti katuganganna.

²Kinunana, “Impagarupko idi a kaguram ti asawam, isu nga intedko iti gayyemmo. Uray ta napimpintas ti adina. Isu laengen ti asawaem.”

³“Ita,” kinuna ni Samson, “saankon a basol no ania ti aramidek kadagiti Filisteo.”

⁴Iti kasta, napan nagtiliw iti 300 a musang. Sinagduduana a rineppet dagiti ipusda sa nangikabil iti aluten iti nagrinneppet nga ipus.

⁵Pinasgedanna dagiti aluten sana binulosan dagiti musang iti katrigoan dagiti Filisteo. Napuoran amin a naani a trigo agraman dagiti saan pay a naani iti talon. Nauram pay dagiti kaoliboan.

⁶“Siasino ti nangaramid iti daytoy?” sinaludsod dagiti Filisteo. Naammoanda a ni Samson ti akin-aramid agsipud ta innala ti katuganganna a taga-Timna ti asawa ni Samson ket impaasawana iti gayyem met laeng ni Samson. Napan ngarud pinuoran dagiti Filisteo ti babai agraman ti balay ni amana.

⁷“Kastoy gayam ti aramidyo!” kinuna ni Samson kadakuada. “Isapatak a diakto sumardeng agingga iti maibalesko daytoy kadakayo.”

⁸Pinarigat ni Samson dagiti Filisteo ket adu ti pinatayna kadakuada. Kalpasanna, napan nagnaed iti rukib iti rangkis ti Etam.

⁹Dimteng idiay Juda dagiti Filisteo ket nagkampoda sadiay; rinautda ti ili ti Lehi.

¹⁰Sinaludsod dagiti taga-Juda, “Apay a rinautdakami?” “Umaymi baluden ni Samson ta ibalesmi ti inaramidna kadakami,” insungbatda.

¹¹Napan ti 3,000 a lallaki ti Juda iti rukib iti rangkis idiay Etam ket kinunada ken ni Samson, “Dimo aya ammo a dagiti Filisteo ti mangituray kadatayo? Kitaem ti inaramidmo kadakami?” “Inaramidko laeng kadakuada ti kas iti inaramidda kaniak,” insungbatna.

¹²“Immaykami ditoy tapno reppetendaka sadakanto yawat kadagiti Filisteo,” kinunada kenkuana. “Ikariyo a saan a dakayo a mismo ti mangpatay kaniak,” kinuna ni Samson.

¹³“Reppetendaka laeng ta yawatdaka kadagiti Filisteo,” kinunada. “Saandaka a patayen.” Rineppetda ni Samson iti dua a baro a tali ket inruarda iti rukib.

¹⁴Idi sumangpet ni Samson idiay Lehi, sinabat dagiti Filisteo nga agtataray ken agririaw. Pagammoan, bimmaba kenkuana ti pannakabalin ti Espiritu ni Yahweh. Pimmigsa ni Samson; kasla napuoran a sinulid a pinugsapugsatna dagiti tali a nangreppet kadagiti ima ken takiagna.

¹⁵Nakasarak iti pangal ti asno, a nabiit pay a natay ket pinidutna a pinangpapatay iti 1,000 a tattao.

¹⁶Iti kasta, inkanta ni Samson, “Iti pangal ti asno, pinatayko ti sangaribu a tattao; iti pangal ti asno, pinempenko ida.”

¹⁷Kalpasanna, imbellengna ti pangal. Napanaganan dayta a lugar iti Ramat Lehi.

¹⁸Napalalo ti waw ni Samson. Immawag ken ni Yahweh ket kinunana, “Intedmo kaniak ti dakkel a balligi. Matayak kadi iti napalalo a waw ket kemmegendak dagitoy pagano a Filisteo?”

¹⁹Pinagrengngat ti Dios ti lungog ti daga idiay Lehi ket pimsuak ti danum. Imminum ni Samson ket simmaranta ti riknana. Daytoy ti gapuna a napanaganan ti ubbog iti Enhacorre. Adda pay la ita idiay Lehi.

²⁰Duapulo a tawen nga impanguloan ni Samson ti Israel bayat ti panagturay dagiti Filisteo iti daga.