Read Iloko Judges 16 Bible Online

Judges 16 - Iloko bible

Judges 16

¹Iti maysa nga aldaw, napan ni Samson idiay Gaza, maysa a siudad dagiti Filisteo. Adda naam-ammona a balangkantis a babai ket kinaiddana.

²Idi maammoan dagiti taga-Gaza nga adda ni Samson iti siudad, linakubda ti ayanna. Nagpatpatnag a nagurayda kenkuana iti ruangan ti siudad. Iti dayta a rabii, naulimekda ta kinunada iti nakemda, “Urayentayo nga aglawag satayto papatayen.”

³Ngem naturog laeng ni Samson agingga iti tengnga ti rabii. Idi makariing, iniggamanna ti ruangan ti siudad sana pinarut agraman ridaw, poste, balunet ken amin-amin. Binaklayna ket insang-atna iti rabaw ti turod a tumannawag iti Hebron.

⁴Kalpasan daytoy a pasamak, nagayat ni Samson iti maysa a babai nga agnagan Delila nga agnaed iti Tanap ti Sorec.

⁵Napan dagiti lima a pangulo dagiti Filisteo ken ni Delila ket kinunada, “Sikapam ni Samson tapno ibagana kenka no apay a napigsa, ken no kasano a maparmek ken mareppetmi ket iti kasta, awan ti maaramidna. Tunggal maysa kadakami, ikkandakanto iti 1,100 a bagi ti pirak.”

⁶Iti kasta, kinuna ni Delila ken ni Samson, “Pangngaasim ta ibagam kaniak no apay a nakapigpigsaka. No adda mangreppet kenka tapno awan ti maaramidmo, kasano ti pamay-anna?”

⁷“No reppetendak iti pito a di pay nagango a lubid ti bai ti pana, kumapuyak a kas iti kadawyan a tao,” insungbat ni Samson.

⁸Nangyeg ngarud dagiti ari dagiti Filisteo iti pito a lubid ti bai a di pay nagango ket intedda ken ni Delila a pinangreppetna ken ni Samson.

⁹Adda lallaki a pinaglemmeng ni Delila iti sabali a kuarto, isu nga impukkawna, “Samson, umayen dagiti Filisteo!” Ngem pinugsat ni Samson ti lubid a kasla nangpugsat iti panait. Iti kasta, dida pay la naammoan ti palimed ti pigsana.

¹⁰Kinuna ni Delila ken ni Samson, “Apay a nagang-angawan ken inulbodnak? Pangngaasim ta ibagam no kasano ti pannakabalin ti siasinoman a mangreppet kenka.”

¹¹Kinuna ni Samson, “No reppetendak iti baro a tali a di pay naar-aramat, kumapuyak a kas iti kadawyan a tao.”

¹²Nangala ngarud ni Delila kadagiti baro a tali ket rineppetna ni Samson sana impukkaw, “Samson, umayen dagiti Filisteo!” Ngem kasla panait a pinugsapugsat ni Samson dagiti tali.

¹³Kinuna manen ni Delila, “Pagang-angawan ken ul-ulbodennak pay laeng. Ibagam man no kasano ti pannakabalin ti siasinoman a mangreppet kenka?” Kinuna ni Samson, “No sallapidem iti pito a punggos ti buokko ket pairutam babaen iti pasok, kumapuyak a kas iti kadawyan a tao.”

¹⁴Ngarud, pinaturog ni Delila ni Samson sa inabelna dagiti pito a punggos a buokna. Pinairutanna babaen iti pasok sana impukkaw, “Samson, umayen dagiti Filisteo!” Ngem nakariing ni Samson ket ginuyodna ti buokna iti pasok.

¹⁵Kinuna manen ni Delila ken ni Samson, “Kasano a kunam nga ay-ayatennak ket di met pudno ti ibagbagam? Namitlon a nagang-angawannak. Dimo met la ipudnon no apay a napigsaka.”

¹⁶Inaldaw a kastoy ti salsaludsoden ni Delila agingga a nauma ni Samson iti panangrengrengna kenkuana,

¹⁷isut' gapuna nga iti kamaudiananna, imbagana ti pudno. Kinunana, “Saanak a pulos a napukisan. Naidatonak iti Dios a kas Nazireo manipud pannakayanakko. No mapukisanak, mapukaw ti pigsak ket agbalinak a kas iti kadawyan a tao.”

¹⁸Idi kapnekanen ni Delila nga imbagana ti pudno, nangibaon iti mapan kadagiti ari a Filisteo ket pinaibagana, “Agsublikayo pay iti maminsan ta imbagan ni Samson ti pudno.” Dimteng dagiti ari a nangitugot iti kuarta nga ibayadda ken ni Delila.

¹⁹Pinaturog ni Delila ni Samson iti saklotna. Kalpasanna, nangayab iti lalaki a mangkartib iti pito a punggos a buok ni Samson. Ket rinugianna a pinarigat ta napukawen ni Samson ti pigsana.

²⁰Impukkaw ni Delila, “Samson! Adtoyen dagiti Filisteo!” Nakariing ni Samson ket kinunana iti nakemna, “Makalapsutak ket mawayawayaanak a kas iti kallabes.” Dina ammo a pinanawanen ti Apo.

²¹Tiniliw dagiti Filisteo, sinuatda dagiti matana, sada impan idiay Gaza. Kinawaranda iti bronse, impanda iti pagbaludan, ket nagbalin a para giling.

²²Ngem sadiay, in-inut a nagtubo manen ti buokna.

²³Naguummong dagiti ari a Filisteo tapno agrambakda ken mangidatagda iti daton ken ni Dagon a diosda. Daytoy ti kantada, “Impalubos ti diostayo a maparmek ni Samson a kabusortayo.”

²⁴Kasta unay ti panagraragsakda, isu a kinunada, “Ayabanyo man ni Samson ta rayray-awennatayo!” Idi nairuarda ni Samson iti pagbaludan, pinilitda a rayray-awenna ida sada pinagtakder iti baet ti dua nga adigi. Idi makita dagiti tattao ni Samson, nagkantada iti pagdaydayawda iti diosda. Kinunada, “Pinagballiginatayo ti diostayo iti kabusor, isu a mangdadael iti dagatayo ken nangpatay iti adu.”

²⁶Kinuna ni Samson iti ubing a mangkibkibin kenkuana, “Kayatko ti agsadag; ipaarikapmo man dagiti poste a nakaisaadan ti pasdek.”

²⁷Napno ti pasdek iti adu a tattao. Adda met sadiay dagiti lima nga ari dagiti Filisteo. Agarup 3,000 dagiti lallaki ken babbai iti tuktok ti pasdek a mangbuybuya iti panangrabrabakda ken ni Samson.

²⁸Nagkararag ni Samson: “Apo Dios, laglagipennak kadi. O Dios, ikkannak pay maminsan iti pigsak tapno mabalesko dagiti Filisteo gapu iti panangikkatda kadagiti matak.”

²⁹Tinengngel ni Samson dagiti dua a poste a nagsaadan ti pasdek. Nagsinsinan dagiti dua nga imana dagiti adigi, impanna ti amin a pigsana,

³⁰sana impukkaw, “Dakayo a Filisteo, agkukuyogtayo amin a matay!” Induronna dagiti poste iti amin a pigsana. Narba ti pasdek ket natupakan dagiti lima a pangulo ken amin nga adda sadiay. Ad-adu ti napatayna iti daytoy a gundaway ngem dagiti pinatpatayna iti napalabas.

³¹Dimteng dagiti kakabsat ken familia ni Samson. Inyawidda ti bangkayna, ket intabonda iti tanem ni Manoa nga amana, iti nagbaetan ti Zora ken Estaol. Duapulo a tawen nga impanguloan ni Samson ti Israel.