Read Iloko Judges 18 Bible Online

Judges 18 - Iloko bible

Judges 18

¹Awan ti ari ti Israel kadagidi a panawen. Agsapsapul idi ti tribu ti Dan iti sakup a tagikuaen ken pagnaedanda ta awan pay naited kadakuada a daga a kas kadagiti dadduma a tribu ti Israel.

²Iti kasta, pimmili dagiti kaputotan ti Dan iti lima a natured a lallaki manipud iti amin a familia ti tribu ket naibaonda a mangsukimat ken mangsiim iti daga. Manipud kadagiti ili ti Zora ken Estaol, napanda kadagiti katurturodan ti Efraim ket nagdagusda iti balay ni Mica.

³Idi addada sadiay, nailasinda ti bengngat ti agtutubo a Levita ket sinaludsodda kenkuana, “Apay nga addaka ditoy? Ania ti ar-aramidem ditoy?”

⁴“Agtartrabahoak ken ni Mica a kas padina,” insungbat ti Levita.

⁵Kinunada kenkuana, “Pangngaasim ta saludsodem iti Dios no agbanagto a naimbag ti biahemi.”

⁶“Dikay agdanag,” insungbat ti padi. “Aywanannakayto ti Apo iti panagdaliasatyo.”

⁷Iti kasta, pimmanaw dagiti lima a lallaki ket napanda iti ili ti Lais. Nakitada a natalged ti panagbiag dagiti tattao a kas kadagiti Sidonio. Natalna ken naulimekda ket awan ti agririri kadakuada. Adda amin a masapulda. Adayoda iti ili ti Sidon ket awan ti pannakilangenda kadagiti sabali a tattao.

⁸Idi agsubli dagiti lima idiay Zora ken Estaol, sinaludsod dagiti kailianda no ania ti nasarakanda.

⁹Kinunada, “Nakitami ti daga ket nasayaat. Umaykayo, ta intay rauten ida. Dikay agyan ditoy nga awan ti ar-aramidenna; darasenyo, intayo tagikuaen ti daga.

¹⁰Makitayonto a naulimek ken natalna dagiti tattao. Nalawa ti daga ket adda amin a masapul ti tao. Inyawat ti Dios kadakayo dayta a lugar.”

¹¹Ngarud, nagrubbuat ti 600 a mannakigubat iti tribu ti Dan a naggapu idiay Zora ken Estaol.

¹²Napanda nagkampo iti laud ti Kiriat Jearim idiay Juda. Isut' gapuna a napanaganan dayta a lugar iti Mahane-Dan agingga ita.

¹³Manipud sadiay, simmang-atda iti katurturodan ti Efraim, ket dimtengda iti balay ni Mica.

¹⁴Kinuna kadakuada dagiti lima a lallaki a napan nagsiim idi iti lawlaw ti Lais, “Ammoyo kadi nga adda iti maysa kadagiti balbalay ti efod ken terafim ken ti nasukog a ladawan a nakalupkopan iti pirak? Adda pay dadduma a ladawan a nasukog. Ania ti aramidentayo?”

¹⁵Iti kasta, napanda iti balay ni Mica a pagnaedan ti agtutubo a Levita. Sinaludsodda no kasano ti kasasaad daytoy.

¹⁶Kabayatanna, adda iti ruangan dagiti 600 a mannakigubat agraman ti Levita. Nagtartarus iti balay dagiti lima nga espia ket innalada ti nasukog a ladawan, efod, terafim ken dagiti dadduma pay a ladawan a nasukog.

¹⁸Idi alaen dagiti lallaki dagiti nasagradoan a banag, kinuna ti padi, “Ania ti ar-aramidenyo?”

¹⁹Insungbatda, “Dika agtagtagari. Dika agsasao. Surotennakami ketdi ta sikanto ti padimi ken mammagbaga kadakami. Dimo kayat aya a sika ti padi ti maysa a tribu ti Israel a saan ket a ti familia ti maymaysa a tao?”

²⁰Naragsakan ti padi iti daytoy, isu nga innalana dagiti nasukog a ladawan ket simmurot kadakuada.

²¹Nagrubbuatda agraman dagiti baka ken al-alikamenda; immuna a nagna dagiti ubbing.

²²Dida pay unay nakaadayo idi inummong ni Mica dagiti kaarrubana tapno makigubatda. Nakamakamda dagiti Danita

²³ket pinukkawanda ida. Timmalliaw dagiti Danita ket sinaludsodda ken ni Mica, “Apay, ania ti napasamak? Apay nga adda dagitoy a tattao?”

²⁴Kinunana kadakuada, “Apay a saludsodenyo pay laeng idinto ta innalayo ti padik ken dagiti didiosen nga inaramidko? Ania pay ti natda kaniak?”

²⁵Imbaga kenkuana dagiti Danita, “Naim-imbag laengen nga agulimekka amangan no makapungtot dagitoy a lallaki ket darupendaka. Awan duadua a matayka agraman ti familiam.”

²⁶Nabigbig ni Mica a dina kabaelan ida isut' gapuna a nagawid. Intuloy met dagiti Danita ti panagdaliasatda.

²⁷Kalpasan ti panangala dagiti Danita iti padi ken dagiti nasukog a ladawan a kukua ni Mica, napanda rinaut ti Lais. Natalna dagiti umili ti Lais nga adda iti isu met laeng a tanap ti Betrehob. Pinatayda amin a tattao ket pinuoranda ti siudad. Awan ti mangsalaknib kadakuada ta adayoda iti Sidon ken awan pannakainaigda kadagiti sabali a nasion. Binaliwan dagiti Danita a binangon ti siudad ket nagnaedda sadiay.

²⁹Binaliwanda ti nagan ti siudad ket pinanagananda iti Dan a nagan ti kapuonanda ken maysa kadagiti annak ni Israel.

³⁰Impasdek dagiti Danita ti pagdaydayawan a nangikabilanda iti imahen. Ni Jonatan nga anak ni Gersom ken apoko ni Moises ti nagserbi a padida. Dagiti met kaputotan ni Jonatan ti nagserbi a padi agingga a naitalaw dagiti tattao.

³¹Nagtalinaed sadiay ti nasukog a ladawan nga inaramid ni Mica kabayatan ti kaadda ti Templo ti Dios idiay Silo.