Read Iloko Judges 19 Bible Online

Judges 19 - Iloko bible

Judges 19

¹Kadagidi nga aldaw nga awan ari ti Israel, adda maysa a Levita nga agnanaed iti katurturodan ti Efraim. Nangala iti kabbalayna a babai a taga-Betlehem iti Juda.

²Naminsan, gimmura ti babai ket nagsubli iti balay ni amana idiay Betlehem. Uppat a bulan a nagyan sadiay.

³Napanunot ti Levita a suroten ti kabbalayna tapno ay-aywenna nga agsubli kenkuana. Inrubbuatna ti dua nga asnona ket napan a kaduana ti maysa a tagabu. Idi sumangpet idiay Betlehem, pinadanon ti babai iti balay, ket siraragsak ti katuganganna a nangpasangbay kenkuana.

⁴Agawidda koman ngem inggawid ti katuganganna, isu a nagyanda pay sadiay iti tallo nga aldaw. Nangan dagiti agassawa ken naturogda sadiay.

⁵Iti kabigatan ti maikapat nga aldaw, nasapada a bimmangon ket nagrubbuatda nga agawid. Ngem kinuna ti ama ti babai iti Levita, “Mangankayo pay tapno adda pamigsayo iti dalan. Inkayto inton madamdama.”

⁶Iti kasta, nagtugaw dagiti dua a lallaki a nangan ken imminum. Kalpasanna, imbaga kenkuana ti katuganganna, “Pangngaasim ta ummiankayo pay ket agragragsaktayo.”

⁷Nagrubbuat ti Levita ngem inuyotan ti katuganganna ket immian manen.

⁸Iti maikalima nga aldaw, nasapada a bimmangon ngem kinuna manen ti ama ti babai, “Pangngaasiyo ta mangankay pay. Inkayto la no malemen.” Nagkalanglang manen dagiti dua a lallaki.

⁹Idi agrubbuat manen ti Levita, ti babai ken ti tagabuna, kinuna ti ama ti babai, “Mumalemen! Ummiankayo pay ita a rabii, ket aglang-aykayo. Sapaenyonto laengen ti agawid inton bigat.”

¹⁰Ngem saandan a kayat ti ummian, isu a nagrubbuatda ket napandan agraman ti tagabuda ken dagiti dua nga asnoda. Rumabiin idi makadanonda iti asideg ti Jebus (isu ti Jerusalem) ket kinuna ti tagabuna, “Apay a ditay pay la ummian ditoy siudad dagiti Jebuseo?”

¹²Ngem kinuna ti apona, “Saantayo a mabalin ti agdagus iti siudad a saan nga Israelita dagiti agnaed. Agtuloytayo laengen ta intay ummian idiay Gabaa wenno idiay Rama.”

¹⁴Iti kasta, linabsanda ti Jebus ket intuloyda ti nagna. Sumipngeten idi makadanonda idiay Gabaa a masakupan ti tribu ti Benjamin.

¹⁵Simmiasida iti dalan tapno umianda sadiay. Simrekda iti ili ket napanda nagtugaw iti plasa. Ngem awan ti siasinoman a nangawis kadakuada nga umian iti balayna.

¹⁶Idi addada sadiay, adda lakay a limmabas. Kagapgapuna iti talon a nagtrabahoanna a nagmalem. Nagnaed idi ti lakay iti katurturodan ti Efraim ngem agnanaeden iti Gabaa. Kameng ti tribu ti Benjamin dagiti tattao sadiay.

¹⁷Nadlawna a biahero dagiti adda iti plasa ket sinaludsodna, “Sadino ti naggapuanyo? Sadino ti papananyo?”

¹⁸“Naggapukam idiay Betlehem ti Juda,” insungbat ti Levita. “Agsublikamin iti katurturodan ti Efraim a pagnaedak. Ngem awan mangpadagus kadakam ita a rabii,

¹⁹uray no adda ruot ken garami para kadagiti asnomi, agraman tinapay ken arak a para kaniak ken iti kabbalayko ken iti tagabuk. Adda amin a masapulmi.”

²⁰Kinuna ti lakay, “Umaykay agdagus idiay balay. Siak ti makaammo kadakayo. Dikay maturog ditoy plasa.”

²¹Innalana ngarud ida iti balayna ket pinakanna ti asnoda. Binuggoan dagiti sangaili ti sakada sada nangan.

²²Madamada nga agraragsak idi pagammoan la ta dimteng dagiti derrep a lallaki iti ili. Linawlawda ti balay ket nagtugtogda iti ruangan. Kinunada iti lakay, “Iruarmo ti lalaki a nagdagus ditoy balaymo ta kayatmi a kaiddaen.”

²³Ngem rimmuar ti lakay ket kinunana, “Saan, kakabsatko! Pangngaasiyo ta dikay agaramid iti kasta a kinadakes ken kinaderrep. Sangailik daytoy a lalaki.

²⁴No kayatyo, adtoy ti kabbalayna ken ti balasang nga anakko. Paruarek ida ket aramidenyo kadakuada ti kaykayatyo. Ngem diyo koma aramiden ti kasta a nakababain a banag iti daytoy a tao.”

²⁵Ngem saan nga inkaskaso dagiti lallaki ti sao ti lakay. Pinaruar ngarud ti Levita ti asawana ket intedna kadakuada. Nagpatnag a rinamesda ti babai.

²⁶Idi pumarbangon, nagsubli ti babai iti balay ti lakay a yan ti Levita. Napasag iti sango ti ruangan ket sadiayna agingga iti aglawag.

²⁷Bimmangon ti Levita ket idi luktanna ti ruangan tapno ituloyna ti agbiahe, nakitana ti kabbalayna a napasag sadiay a kasla gumawgaw-at iti ruangan.

²⁸Kinunana, “Bumangonkan ta intayon.” Ngem saan a simmungbat, isu nga insakayna ti bangkay iti asno ket intuloyna ti panagdaliasatna.

²⁹Idi sumangpet iti balayna, nangala iti buneng, sana innala ti bangkay ket rinangrangkayna iti nagkasangapulo ket dua sana pinaiwaras iti amin a lugar iti Israel.

³⁰Kinuna ti amin a nakakita iti daytoy, “Awan pay nadamagmi a kastoy nga aramid manipud ipapanaw ti Israel iti Egipto. Ania aya ti nasayaat nga aramidentayo?”