Read Iloko Judges 2 Bible Online

Judges 2 - Iloko bible

Judges 2

¹Manipud Gilgal, napan ti anghel ni Yahweh idiay Bokim, ket kinunana kadagiti Israelita, “Inruarkay idiay Egipto ket inyegkay iti daga nga inkarik kadagidi kapuonanyo. Kinunak idi a diakto waswasen ti tulagko kadakayo.

²Imbagak pay a dikayo makitulag kadagiti agnaed ditoy a daga; rebbaenyo ketdi dagiti altarda. Ngem diyo inaramid ti imbagak. Kitaenyo ti inaramidyo!

³Ita, ibagak kadakayo a diakto papanawen dagitoy a tattao iti daga a papananyo. Isudanto ti kabusoryo, ket dagiti didiosendanto ti pakadadaelanyo.”

⁴Nagsasangit dagiti Israelita a nakangngeg iti daytoy.

⁵Isut' gapuna a napanaganan daytoy a lugar iti Bokim. Nagidatagda sadiay kadagiti daton iti Apo.

⁶Pinalubosan ni Josue dagiti Israelita ket napan sinakup ti tunggal maysa ti daga a pannakabingayna.

⁷Nagserbi dagiti tattao ken ni Yahweh idi adda pay a biag ni Josue. Ket uray idi natayen ni Josue, intultuloyda ti nagserbi ken ni Yahweh ta sibibiag pay dagiti panguloda a makaammo kadagiti amin nga inaramid ni Yahweh iti Israel.

⁸Natay ni Josue nga adipen ni Yahweh idi agtawen iti 110. Ni Nun ti amana.

⁹Naitanem iti daga a naited kenkuana idiay Timnat-heres iti katurturodan ti Efraim, iti amianan ti Bantay Gaas.

¹⁰Natay met amin dayta a kaputotan, ket nabati ti sumaruno a kaputotan a saan a makaammo ken ni Yahweh ken iti amin nga inaramidna a pagimbagan ti Israel.

¹¹Nagbasol dagiti Israelita ken ni Yahweh. Rinugianda ti nagdaydayaw kadagiti Baal.

¹²Tinallikudanda ni Yahweh a Dios dagiti kapuonanda, ti Dios a nangiruar kadakuada idiay Egipto; nagserbida kadagiti didiosen dagiti tattao iti likmutda. Nagrukbabda kadagitoy a didiosen. Nakapungtot ni Yahweh kadakuada.

¹³Tinallikudanda ni Yahweh ket nagserbida kadagiti Baal ken kadagiti Astarot.

¹⁴Napalalo ti pungtot ni Yahweh iti Israel, isut' gapuna a binay-anna dagiti kabusorda a mangraut kadakuada ken mangsamsam kadagiti sanikuada. Pinagballigi ti Dios dagiti amin a kabusorda iti aglikmut ket dida masalaknibanen dagiti bagbagida.

¹⁵Tunggal mapanda makigubat, busoren ida ni Yahweh kas imbagana nga aramidenna. Napalalo ti pannakariribukda.

¹⁶Kalpasanna, inikkan ni Yahweh dagiti Israelita kadagiti napipigsa a pangulo a nangisalakan kadakuada kadagiti mangraut kadakuada.

¹⁷Ngem saan nga impangag dagiti Israelita dagitoy a pangulo. Tinallikudanda ni Yahweh ket nagdaydayawda ketdi kadagiti didiosen. Nagtungpal idi dagiti kapuonanda kadagiti bilin ni Yahweh, ngem insardeng daytoy baro a kaputotan ti nangsurot iti ulidanda.

¹⁸Tinulongan ni Yahweh ti tunggal pangulo nga intedna kadakuada tapno isalakanna ida kabayatan ti panagbiag daytoy a pangulo. Kaasian ida ni Yahweh no umasugda gapu iti panagsagaba ken pannakaidadanesda.

¹⁹Ngem no matay ti panguloda, agsublida manen iti sigud nga aramidda. Agbalinda a dakdakes ngem ti immuna a kaputotan. Surotenda dagiti didiosen a pagserbian ken pagdaydayawanda. Iti kinasukirda, intultuloyda ti nagaramid iti dakes.

²⁰Kasta unay ti pungtot ni Yahweh kadagiti Israelita ket kinunana, “Sinalungasing dagitoy a tattao ti katulagak kadagiti kapuonanda. Gapu ta didak tinungpal,

²¹diakton papanawen dagiti nasion a saan a pinagtalaw ni Josue idi sibibiag pay.

²²Usarekto ida tapno maammoak no tungpalen dagiti Israelita ti bilinko a kas iti panagtungpal dagidi kapuonanda.”

²³Binay-an ngarud ni Yahweh a nagyan dagitoy a nasion. Dina pinagtalaw ida a dagus kalpasan ti ipapatay ni Josue.