Read Iloko Judges 4 Bible Online

Judges 4 - Iloko bible

Judges 4

¹Kalpasan ti ipapatay ni Ehud, nagbasol manen dagiti Israelita iti Apo.

²Iti kasta, impalubosna a parmeken ida ni Jabin a Cananeo a nagari idiay Hasor. Ni Sisera ti pangulo ti armadana ket agnaed idiay Haroset-hagoiim.

³Adda 900 a lugan a pakigubat ni Jabin. Naranggas unay ti panangiturayna kadagiti Israelita. Pinarigatna ida iti uneg ti 20 a tawen. Idi agangay, nagpatulongda ken ni Yahweh.

⁴Kadagidi a tiempo, ni Debora a profeta ti ukom dagiti Israelita. Isu ti asawa ni Lappidot.

⁵Masansan nga agtugaw iti sirok ti palma nga adda iti nagbaetan ti Rama ken Betel iti katurturodan iti Efraim. Ditoy ti papanan dagiti Israelita a pangrisutan kadagiti parikutda.

⁶Iti maysa nga aldaw, pinaayabanna ni Barac nga anak ni Abinoam a taga-siudad ti Kedes idiay Neftali ket kinunana kenkuana, “Ti Apo a Dios ti Israel imbilinna kenka daytoy, ‘Mangayabka iti 10,000 a lallaki kadagiti tribu ti Neftali ken Zabulon ket ipanguloam ida a mapan idiay Bantay Tabor.

⁷Ibaonkonto idiay Karayan Kison ni Sisera a pangulo ti armada ni Jabin tapno makiranget kenka. Addanto luglugan a pakigubat ken soldadona, ngem agballigikanto a mangparmek kenkuana.’”

⁸Kinuna ni Barac ken ni Debora, “Mapanak no kuyogennak, ngem no saan, diak mapan.”

⁹Simmungbat ni Debora, “Ala, wen, kuyogenka, ngem saanto a sika ti mapadayawan no agballigika ta yawatto ti Apo ni Sisera iti maysa a babai.” Nagrubbuat ngarud ni Debora ket nagkuyogda ken ni Barac a napan idiay Kedes.

¹⁰Inayaban ni Barac dagiti tattao kadagiti tribu ti Zabulon ken Neftali ket 10,000 a lallaki ti simmurot kenkuana. Napan met ni Debora.

¹¹Kabayatanna, binangon ni Heber a Kineo ti toldana iti asideg ti Kedes, iti asideg ti kayo a lugo idiay Zaananim. Simmina kadagiti dadduma a Kineo a kaputotan ni Hobab a katugangan ni Moises.

¹²Idi maammoan ni Sisera a napan ni Barac idiay Bantay Tabor,

¹³inummongna dagiti 900 a landok a luganna a pakigubat ken dagiti amin a tattaona. Nagrubbuatda idiay Haroset-hagoiim ket napanda idiay Karayan Kison.

¹⁴Kinuna ni Debora ken ni Barac, “Inkan! Iti daytoy nga aldaw, pagballigiennaka ti Apo. Idalannaka tapno parmekem ni Sisera.” Simmalog ngarud ni Barac idiay Bantay Tabor agraman dagiti 10,000 a tattaona.

¹⁵Idi dimmarup ni Barac ken dagiti buyotna, kinibur ni Yahweh dagiti lugan ken tattao ni Sisera. Dimsaag ni Sisera iti luganna a pakigubat ket nagtartaray a pimmanaw.

¹⁶Kinamat da Barac dagiti lugan a pakigubat ken ti buyot ni Sisera agingga idiay Haroset-hagoiim. Awan nakalasat iti entero nga armada ni Sisera—napapatay amin a buyot.

¹⁷Nagkamang ni Sisera iti tolda ni Jael nga asawa ni Heber a Kineo. Agkappia ngamin idi da Jabin nga ari ti Hasor ken ti familia ni Heber.

¹⁸Sinabat ni Jael ni Sisera iti ruar ket kinunana kenkuana, “Sumrekka, apo, sumrekka iti toldak. Dika agbuteng.” Simrek ni Sisera ket inlemmeng ni Jael iti linged ti kurtina.

¹⁹Kinuna ni Sisera kenkuana, “Pangngaasim ta painumennak ta mawawak unay.” Linuktan ni Jael ti lalat a supot a nakargaan iti gatas, pinainumna ni Sisera sana kinumotan manen.

²⁰Kinuna ni Sisera, “Agyanka iti ridaw. No adda umay agsaludsod no adda immay a tao ditoy, ibagam nga awan.”

²¹Nakaturog ni Sisera gapu iti kasta unay a bannogna. Nangala ni Jael iti martilio ken maysa a pasok ti tolda. Nagin-inayad nga immasideg kenkuana sana pinatay babaen iti panangpasokna iti pispisna agingga a nagsalput iti daga.

²²Idi mapan agsapul ni Barac iti yan ti tolda, sinabat ni Jael ket kinunana, “Sumrekka ta ipakitak ti lalaki a sapsapulem.” Simmurot kenkuana iti uneg ket nakitana a natayen ni Sisera. Napasukan ti pispisna.

²³Iti dayta nga aldaw, babaen iti tulong ti Dios, nagballigi dagiti Israelita a nangparmek ken ni Jabin nga ari ti Canaan.

²⁴Intuloyda a sinunson ni Jabin agingga a naparmekda.