Read Iloko Judges 5 Bible Online

Judges 5 - Iloko bible

Judges 5

¹Iti dayta nga aldaw, nagkanta da Debora ken Barac a lalaki nga anak ni Abinoam. Daytoy ti kantada:

²Idaydayawyo ti Apo! Napinget a nakigubat dagiti Israelita. Siaayat dagiti tattao a nangidaton iti biagda.

³Dakayo nga ari, dumngegkayo! Dakayo nga agtuturay, denggenyo! Kantaak ken tokarak ti Apo, ti Dios dagiti Israelita.

⁴O Apo, idi pinanawam dagiti bantay ti Seir, idi rimmuarka iti sakup ti Edom, nagginggined ti daga; nagtudo wen, nagibuyat iti danum dagiti ulep ti langit.

⁵Nagkintayeg dagiti bantay iti imatang ti Apo, idiay Sinai, nagkintayeg dagiti bantay; wen, iti imatang ti Apo a Dios ti Israel.

⁶Idi panawen ni Samgar a lalaki nga anak ni Anat, kadagiti aldaw ni Jael, saanen a mapagnaan dagiti nalatak a daldalan ta magna dagiti agdaldaliasat kadagiti desdes ken bet-ang.

⁷Pinanawan dagiti Israelita dagiti ilida, awan nagnaed kadakuada inggat immayka, Debora, Debora, immayka iti Israel kas pannakainada.

⁸Adda gubat iti daga idi pilien dagiti Israelita ti sabali a diosda. Kadagiti 40,000 a lallaki ti Israel, adda aya nagiggem iti kalasag wenno pika?

⁹Kimmanunongak kadagiti pangulo dagiti Israelita, kadagiti tattao a siaayat a nangidaton iti biagda. Idaydayawyo ti Apo!

¹⁰Ipakaammoyo daytoy, dakayo a nakasakay, iti nasilyaan nga asno, kastakayo met a magmagna a mapan iti papananyo.

¹¹Denggenyo dagiti umariwawa a bunggoy dagiti tattao iti lawlaw dagiti bubon; sarsaritaenda dagiti balligi ti Apo, wen, dagiti balligi dagiti Israelita. Manipud kadagiti siudadda, rimmuar dagiti tattao ti Apo.

¹²Tumakderka, Debora, tumakderka! Sika ti mangidalan! Agkantaka! Barac, a lalaki nga anak ni Abinoam, bumangonka, ipanawmo dagiti baludmo.

¹³Napan dagiti napudno nga Israelita kadagiti panguloda; sisasagana a makigubat dagiti tattao ti Apo a dimmatag kenkuana.

¹⁴Naggapuda idiay Efraim ket iti tanap ti napananda; sumursurotda iti tribu ni Benjamin ken dagiti tattaona. Simmalog dagiti pangulo manipud Makir naggapu met dagiti ofisiales idiay Zabulon.

¹⁵Nakikuyog dagiti pangulo ti Issacar ken ni Debora; wen, immay ni Issacar agraman ni Barac, simmurotda kenkuana idiay tanap. Ngem nabingaybingay ti tribu ti Ruben; ta dida matinong no umayda.

¹⁶Apay a nagbatida iti ayan dagiti karnero? Tapno denggenda ti agpaspastor iti arban? Wen, nabingaybingay ti tribu ti Ruben; ta dida matinong no umayda.

¹⁷Nagyan ti tribu ti Gad iti daya ti Jordan, ket nagbati ti tribu ti Dan kadagiti pagpastoran. Nagyan met ti tribu ti Aser iti igid ti baybay; wen, nagbatida iti igid ti baybay.

¹⁸Ngem dagiti tattao ti Zabulon ken Neftali ti biagda iti paggugubatan inda impatli.

¹⁹Napan dagiti ari idiay Taanac, iti asideg ti waig idiay Megiddo napanda nakigubat. Nakigubat dagiti ari ti Canaan ngem awan pirak nga inda sinamsam.

²⁰Manipud langit, dagiti bituen nakigubatda; kabayatan ti panagdaliasatda, ginubatda ni Sisera.

²¹Ti Karayan Kison inyanudna ida; wen, ti napegges a Karayan Kison. Magnaak, magnaak a sipipigsa!

²²Ket dagiti kabalio nagtatarayda, dumalagudog dagiti sakada iti daga.

²³Kuna ti anghel ti Apo, “Ilunodyo ti Meroz, ilunodyo dagiti agnaed sadiay. Ta dida immay tinulongan ti Apo, dida immay nakigubat a kas soldadona.”

²⁴Kagasatan ni Jael a ni Heber a Kineo ti asawana; wen, ti kagasatan kadagiti babbai nga agnaed iti tolda.

²⁵Dimmawat ni Sisera iti danum ngem gatas ti intedna, iti napintas a malukong nagbalay a gatas ti inkargana.

²⁶Nangala iti maysa a pasok ti tolda, ket nakaiggem iti martilio ti maysa nga imana. Minartiliona ti ulo ni Sisera, pinasukanna ket naburburak ti ulona.

²⁷Nakusbo ken napasag ni Sisera, ket iti sakaanan ni Jael ti nakatayanna. Iti sakaanan ni Jael, nakusbo ken natumba; napasag a natay iti daga.

²⁸Timman-aw iti tawa ti ina ni Sisera; simmirip iti rehas ket kinunana: “Apay ngata a naladaw ti luganna? Nagbuntog ketdin dagiti kabaliona.”

²⁹Simmungbat dagiti kasiriban a babbai a bayabayna, ket inulit-ulitna a kinuna iti bagina,

³⁰“Nalabit agsapsapulda laeng iti samsamenda wenno bingbingayendan ti nasamsamda. Nangingina a lupot para ken ni Sisera, ken nabordaan a lupot para iti tengngedko.”

³¹Iti kasta, O Apo, matay koma amin a kabusormo, ngem agraniag a kas sumingising nga init dagiti gagayyemmo! Ket adda talna iti daga iti uneg ti 40 a tawen.