Read Iloko Judges 6 Bible Online

Judges 6 - Iloko bible

Judges 6

¹Nagbasol manen dagiti Israelita ken ni Yahweh, ket binay-anna nga iturayan ida dagiti Midianita iti uneg ti pito a tawen.

²Saan a kabaelan dagiti Israelita a sarangten dagiti Midianita, isu a kapilitan a nagkamang dagiti Israelita kadagiti rukib ken kadagiti natalged a luglugar iti kabambantayan.

³Tunggal agmula dagiti Israelita, rauten ida dagiti Midianita, dagiti Amalekita ken dagiti dadduma a tribu a taga-daya.

⁴Pagkampoanda dagiti dagdaga ket dadaelenda dagiti mulmula agingga iti abagatan iti asideg ti Gaza. Awan a pulos ti ibatida a kanen dagiti Israelita; awan uray karnero, baka wenno asno.

⁵Umayda agraman bakbaka ken toldada ket kasla dudon ti kaaduda. Saan a mabilang ti kaaduda agraman kamelioda. Dadaelenda ti daga.

⁶Awan ti maaramid dagiti Israelita, isu nga immawagda iti tulong ni Yahweh.

⁷Idi mangngeg ni Yahweh ti panagasug kenkuana dagiti Israelita gapu iti panangparparigat kadakuada dagiti Midianita,

⁸nangibaon iti profeta a nangibaga kadakuada: “Kastoy ti kuna ni Yahweh a Dios ti Israel, ‘Inruarkay idiay Egipto a nakaadipenanyo.

⁹Insalakankayo kadagiti Egipcio ken kadagiti nangidadanes kadakayo. Pinagtalawko ida ket intedko ti dagada kadakayo.

¹⁰Imbagak kadakayo a siak ti Apo a Diosyo, ket dikay agdaydayaw kadagiti didiosen dagiti Amorreo nga akindaga iti pagtataenganyo ita. Ngem didak met impangag.’”

¹¹Dimteng ti anghel ni Yahweh idiay Ofra ket nagtugaw iti sirok ti kayo a lugo a kukua ni Joas iti kaputotan ni Abiezer. Agir-irik idi ni Gideon nga anakna iti ayan ti pagpespesan iti ubas; ilemlemmengna ti panagirikna tapno saan a makita dagiti Midianita.

¹²Nagparang sadiay ti anghel ni Yahweh ket kinunana, “Adda kenka ti Apo, sika a natured a mannakigubat.”

¹³“Apo,” kinuna ni Gideon kenkuana, “no agpayso nga adda kadakami ti Apo, apay a kastoy ti mapaspasamak kadakuada? Yanna dagidi imbagbaga dagidi kapuonanmi a datdatlag nga ar-aramiden ti Apo—no kasano nga inruarna ida idiay Egipto? Binaybay-annakamin ti Apo ket inyawatnakami kadagiti Midianita a mangparparigat kadakami.”

¹⁴Binilin ni Yahweh ni Gideon, “Agrubbuatka ket aramaten ti amin a pigsam a mangisalakan kadagiti Israelita iti pannakabalin dagiti Midianita. Siak a mismo ti mangibaon kenka.”

¹⁵“Ngem, Apo,” kinuna ni Gideon, “kasano a maisalakanko ti Israel? Ti partidok ti kabassitan iti tribu ti Manases, ket siak ti kanumoan a kameng ti familiak.”

¹⁶Kinuna ni Yahweh kenkuana, “Kabaelam nga isalakan ti Israel ta tulonganka. Laklakaemto a parmeken dagiti Midianita ta kasdanto la maymaysa a tao.”

¹⁷“No adda pannakaikarik iti imatangmo,” insungbat ni Gideon, “ikkannak iti pammaneknek a sika a mismo ti Apo.

¹⁸Pangngaasim ta dika pay la pumampanaw ta innak mangala iti kanen nga idatonko kenka.” “Agyanak ditoy; ur-urayenka,” insungbatna.

¹⁹Iti kasta, napan nangparti ni Gideon iti urbon a kalding ket linutona. Nanggamay iti sangasalup nga arina ket inaramidna a tinapay nga awan lebadurana. Inkabilna ti karne iti basket ken ti digo iti banga sana impan dagitoy iti anghel nga adda iti sirok ti kayo a lugo.

²⁰Imbaga ti anghel kenkuana, “Ikabilmo ti karne ken ti tinapay iti rabaw daytoy a bato ket ibuyatmo ti digo iti tinapay ken karne.” Inaramid ni Gideon ti naibaga kenkuana.

²¹Kalpasanna, insagid ti anghel ni Yahweh ti murdong ti sarukod nga ig-iggamanna iti karne ken tinapay. Rimmuar ti apuy iti bato ket inuramna ti karne ken ti tinapay. Pagammoan ta nagpukaw ti anghel.

²²Nabigbig ni Gideon a ti anghel ti Apo ti nakitana ket agpigpigerger a nagkuna, “O Apo Dios! Nakitak ti anghelmo iti rupanrupa!”

²³Ngem kinuna ni Yahweh kenkuana, “Talna ti adda kenka. Dika agbuteng. Awan pakaan-anoam. Saanka a matay.”

²⁴Nangaramid sadiay ni Gideon iti altar nga agpaay ken ni Yahweh ket pinanagananna iti “Yahweh-salom.” Agpapan ita, adda pay laeng ti altar idiay Ofra a kukua ti kaputotan ni Abiezer.

²⁵Iti dayta a rabii, kinuna ni Yahweh ken ni Gideon, “Alaem ti bumaro a baka ni amam, ken sabali pay a toro nga agtawen iti pito. Rebbaem ti altar ni Baal nga inaramid ni amam ket pukanem ti simbolo ni diosa nga Asera iti abayna.

²⁶Mangbangonka iti nalagda nga altar iti Apo a Diosmo iti rabaw ti bunton. Alaem ti maikadua a toro ket puoram a kas daton; usarem a sungrod ti nasagradoan nga adigi a pinukanmo.”

²⁷Nangala ngarud ni Gideon iti sangapulo nga adipenna ket inaramidna ti imbilin ni Yahweh. Agsipud ta mabuteng la unay ni Gideon iti familiana ken kadagiti tattao, isu a rabii idi aramidenna daytoy.

²⁸Iti agsapa, idi nakariing dagiti tattao iti dayta nga ili, nakitada ti narakrak nga altar ni Baal ken ti napukan a simbolo ni Asera iti abayna. Nakitada ti naaramid nga altar ken ti toro a napuoran iti rabawna.

²⁹Nagsisinnaludsodda, “Siasino ngata ti akin-aramid iti daytoy?” Inusigda ket natakuatanda a ni Gideon nga anak ni Joas ti akin-aramid iti daytoy.

³⁰Kinunada ken ni Joas, “Iruarmo ti anakmo ta patayenmi agsipud ta rinakrakna ti altar ni Baal ket pinukanna ti simbolo ni Asera iti abayna.”

³¹Ngem kinuna ni Joas kadagiti amin a bumusor kenkuana, “Isakityo aya ni Baal? Wenno ikalinteganyo? Saan a mabigatan ti siasinoman a mangisakit kenkuana. No dios ni Baal, bay-anyo nga ikalinteganna ti bagina, yantangay ta altarna ti narakrak.”

³²Manipud iti dayta nga aldaw, napanaganan ni Gideon iti Jerubbaal, ta kinuna ni Joas, “Bay-anyo nga ikalintegan ni Baal ti bagina. Ti altarna ti narakrak.”

³³Kalpasanna, nagtitipon dagiti amin a Midianita, dagiti Amalekita ken dagiti dadduma pay a tribu iti daya ket binallasiwda ti Karayan Jordan. Nagkampoda iti tanap ti Jezreel.

³⁴Ti Espiritu ni Yahweh ti nangidalan ken ni Gideon. Nagtangguyob ni Gideon a pangayabna kadagiti lallaki iti familia ni Abiezer a makigubat.

³⁵Nangibaon kadagiti mapan iti amin a masakupan ti dua a paset ti Manases tapno ayabanna ida a sumurot kenkuana a makigubat. Nangibaon kadagiti mangayab kadagiti tribu ti Aser, Zabulon ken Neftali ket napanda met timmipon kenkuana.

³⁶Kinuna ni Gideon iti Dios, “Apo, kinunam nga inkeddengmo a siak ti aramatem a mangisalakan kadagiti Israelita.

³⁷Yaplagko ngarud daytoy lupot a de lana iti daga a pagir-irikan iti trigo. Inton bigat, no ti lupot a de lana laeng ti malinnaawan ket namaga ti daga, isunto ti pakaammoak nga aramatennak a mangisalakan kadagiti Israelita.”

³⁸Kasta ti naaramid. Iti agsapa ti sumuno nga aldaw, innala ni Gideon ti de lana ket idi pinespesna, nakaurnong iti linnaaw nga umanay a nangpunno iti maysa a malukong.

³⁹Kinuna manen ni Gideon iti Dios, “Apo, dinak kadi kaunget ta adda pay dawatek kenka. Pangngaasim ta mangaramidak pay iti maysa a pammaneknek iti daytoy a de lana. Kayatko a namaga ti lupot idinto a nabasa ti daga iti lawlawna.”

⁴⁰Kasta ti inaramid ti Dios iti dayta a rabii. Kabigatanna, ti de lana laeng ti namaga ngem naslep ti daga iti linnaaw.