Read Iloko Judges 8 Bible Online

Judges 8 - Iloko bible

Judges 8

¹Napan dagiti tattao ti Efraim ken ni Gideon ket sinaludsodda, “Apay a dinakam inayaban idi napanmo ginubat dagiti Midianita? Apay a kastoy ti inaramidmo kadakami?” Napalalo ti sakit ti nakemda gapu iti daytoy.

²Ngem kinuna ni Gideon, “Saan a maipada ti inaramidko iti inaramidyo. Uray ti bassit nga inaramidyo nga Efraimita, napatpateg nga adayo ngem ti inaramidmi amin nga agkakabagian.

³Inyawat ti Dios kadakayo da Oreb ken Zeeb a pangulo dagiti Midianita. Adda aya pakaipadaan ti inaramidko iti inaramidyo?” Bimmaaw ti pungtot dagiti Efraimita a nakangngeg iti saona.

⁴Dimteng ni Gideon ken dagiti 300 a tattaona idiay Jordan ket bimmallasiwda. Nabannogdan ngem kamkamatenda pay laeng ti kabusor.

⁵Nagdawat ni Gideon kadagiti umili iti Succot. Kinunana, “Pangngaasiyo, ta ikkanyo dagiti tattaok iti kanenda. Agkakapsutdan. Kamkamatek dagiti ari ti Midian, da Zeba ken Salmunna.”

⁶Ngem kinuna dagiti pangulo ti Succot, “Apay nga ikkanmi dagiti buyotmo iti kanenda? Naparmekmo kadin da Zeba ken Salmunna?”

⁷“Dakayo ti makaammo,” kinuna ni Gideon, “ngem inton matiliwko da Zeba ken Salmunna, parigatenkayto babaen iti panangsaplisaplitko kadakayo kadagiti sisiit ti let-ang.”

⁸Nagtuloy ni Gideon idiay Penuel ket nagpatulong kadagiti tattao sadiay, ngem kas met la iti insungbat dagiti taga-Succot ti insungbatda.

⁹Gapu itoy, kinunana kadakuada, “Agsubliakto nga awan pakaan-anoak ket rebbaekto daytoy a torre.”

¹⁰Adda idiay Carcor da Zeba ken Salmunna agraman armadada. Iti entero a buyot a buklen dagiti kameng ti tribu ti let-ang, agarup 15,000 laengen ti natda; natay ti 120,000 a soldado.

¹¹Tinaraigid da Gideon ti dalan ti let-ang, iti daya ti Noba ken Jogbea, ket kinellaatda a dinarup ti armada.

¹²Nagtaray dagiti dua nga ari ti Midian, da Zeba ken Salmunna, ngem kinamat ida ni Gideon agingga a natiliwda, ket nagbuteng metten ti armadada.

¹³Idi nagsubli ni Gideon manipud iti paggugubatan, nagna iti Bessang Heres.

¹⁴Sadiay, adda agtutubo a taga-Succot a natiliwna. Sinaludsodna kenkuana no siasino dagiti panglakayen ti Succot. Sinaggaysa ti agtutubo nga insurat ti nagan dagiti 77 a panglakayen.

¹⁵Napan ni Gideon kadagiti taga-Succot ket sinaludsodna kadakuada, “Malagipyo daydi panagkedkedyo a tumulong kaniak? Kinunayo a diyo ikkan iti taraon dagiti nabannog a tattaok agsipud ta diak pay naparmek da Zeba ken Salmunna? Ita, adtoydan.”

¹⁶Nangala ni Gideon kadagiti sisiit iti let-ang a pinangdusana kadagiti pangulo ti Succot.

¹⁷Rinebbana pay ti torre ti Penuel ket pinatayna dagiti lallaki iti siudad.

¹⁸Kalpasanna, sinaludsodna kada Zeba ken Salmunna, “Ania ti langa dagiti tattao a pinatayyo idiay Tabor?” “Kalanglangam amin ida,” insungbatda. “Kasda la annak ti ari.”

¹⁹“Kakabsatko ida,” kinuna ni Gideon. “Annak amin ida ni inak. No diyo pinatay ida, dikay met koma patayen.”

²⁰Binilinna ni Jeter nga inauna nga anakna a lalaki, “Patayem ida.” Ngem saan nga inasut ni Jeter ti kampilanna. Mabuteng agsipud ta ubing pay laeng.

²¹Ngem kinuna da Zeba ken Salmunna ken ni Gideon, “Sikan ti mangpatay kadakami. Aramid ti lalaki dayta.” Pinatay ngarud ida ni Gideon sana innala dagiti arkos a nayukkor kadagiti kamelioda.

²²Kinuna dagiti Israelita ken ni Gideon, “Sikan ti mangituray kadakami—sika ken dagiti sumarsaruno a kaputotam. Insalakannakami kadagiti Midianita.”

²³“Saan a siak ti agturay kadakayo,” kinuna ni Gideon. “Saan met a ti anakko. Ti Apo ti agturay kadakayo.”

²⁴Ngem intuloy ni Gideon ti nagsao, “Adda la kiddawek kadakayo. Tunggal maysa itedna kaniak dagiti aritos a sinamsamna.” (Agar-aritos idi iti balitok dagiti Midianita, kas kadagiti dadduma a tattao iti let-ang.)

²⁵“Siraragsakkami a mangited kenka,” insungbatda. Nangyaplagda iti lupot a nangikabilan ti tunggal maysa iti aritos a sinamsamna.

²⁶Aginnem a pulo a libra ti dagsen dagiti aritos a balitok nga innala ni Gideon. Saan a naitimbang dagiti arkos, kuentas ken lupot nga ube nga arruaten dagiti ari dagiti Midianita ken dagiti ukkor dagiti kamelioda.

²⁷Inaramid ni Gideon dagitoy a balitok a sinan-dios sana inkabil idiay Ofra a siudadna. Tinallikudan dagiti amin nga Israelita ti Dios ket napanda idiay Ofra tapno agdaydayawda iti a sinan-dios. Nagbalin daytoy a pakaitibkolan ni Gideon ken ti familiana.

²⁸Naan-anay ti panangparmek dagiti Israelita iti Midian ket pulos a saanen a bimmangon dagiti Midianita. Nagturay ti urnos ken talna iti Israel iti unos ti 40 a tawen bayat ti panagbiag ni Gideon.

²⁹Nagsubli ni Gideon iti balayna ket nagnaed sadiay.

³⁰Pitopulo a lallaki ti putotna ta adu ti assawana.

³¹Adda met kamalalana idiay Sikem a naganak iti lalaki ket pinanagananna iti Abimelec.

³²Lakay unayen ni Gideon idi matay. Intabonda iti tanem ni Joas nga amana idiay Ofra a siudad dagiti kakabagian ni Abiezer.

³³Kalpasan ti pannakatay ni Gideon, binaybay-an manen dagiti Israelita ti Dios ket nagdaydayawda kadagiti Baal. Pinagbalinda ni Baal-berit a diosda.

³⁴Saandan a nagdaydayaw ken ni Yahweh a Diosda, a nangisalakan kadakuada kadagiti kabusor iti likmutda.

³⁵Saanda a nangipakita iti panagyaman iti familia ni Gideon iti amin a kinaimbag nga impaayna iti Israel.