Read Iloko Judges 9 Bible Online

Judges 9 - Iloko bible

Judges 9

¹Napan ni Abimelec nga anak ni Jerubbaal idiay Sikem a pagnaedan dagiti amin a kakabagian ni inana. Imbagana kadakuada

²a saludsodenda kadagiti taga-Sikem, “Ania ti kaykayatyo? Iturayannakayo dagiti amin a 70 a lallaki nga annak ni Gideon wenno maysa laeng a tao? Laglagipenyo a nagtaudak iti lasag ken darayo.”

³Nakisao dagiti kabagian ni inana kadagiti taga-Sikem maipapan iti daytoy. Iti kasta, inkeddengda a suroten ni Abimelec agsipud ta kabagianda.

⁴Inikkanda iti 70 a bagi ti pirak a naggapu iti templo ni Baal-berit. Daytoy ti intangdan ni Abimelec kadagiti nadamsak a lallaki a simmurot kenkuana.

⁵Napan iti balay ni amana idiay Ofra ket iti rabaw ti maysa a bato, pinatayna dagiti kakabsatna nga annak ni Gideon, malaksid ken ni Jotam nga inaudi ta nakapaglemmeng.

⁶Kalpasanna, naguummong dagiti amin a taga-Sikem ken Betmillo sada napan iti ayan ti kayo iti lugo idiay Sikem ket insaadda ni Abimelec nga arida.

⁷Idi nadamag ni Jotam daytoy, napan nagtakder iti tapaw ti bantay Gerizim ket impukkawna, “Kakabsatko a taga-Sikem, denggendak tapno ipangagnakayo ti Dios!

⁸Idi un-unana a panawen, nagsasarita dagiti kayo tapno pumilida iti arida. Kinunada iti olibo, ‘Sika ti mangituray kadakami.’

⁹“Insungbat ti olibo, ‘No iturayankayo, kasapulan nga isardengkon ti agparnuay iti lana a mausar a pammadayaw kadagiti didiosen ken kadagiti tattao.’

¹⁰“‘Umayka ta sika ti agbalin nga arimi,’ kinunada met iti kayo ti igos.

¹¹“Ngem insungbat ti igos, ‘Tapno maiturayankayo, kasapulan nga isardengkon ti agbunga iti nasam-it.’

¹²“Iti kasta, kinuna dagiti kayo iti ubas, ‘Umayka ta iturayannakami.’

¹³“Ngem insungbat ti ubas, ‘Tapno maiturayankayo, kasapulan nga isardengkon ti agparnuay iti arakko a mangparagsak kadagiti didiosen ken iti tao.’

¹⁴“Kinunada ngarud iti sisiitan a kayo, ‘Umayka ta sika ti agbalin nga arimi.’

¹⁵“Simmungbat ti sisiitan a mula, ‘No pudno a kayatdak nga agbalin nga ariyo, umaykayo ngarud aglinong kaniak. No madikayo, rummuar ti apuy kadagiti sisiitan a sangak ket puoranna ti sedro ti Libano.’

¹⁶“Ita,” kinuna ni Jotam, “napudno ken nalinteg kadi met laeng ti panggepyo a namagbalin ken ni Abimelec nga ariyo? Nainkalintegan kadi met laeng ti ar-aramidenyo ken ni Gideon ken ti familiana?

¹⁷Laglagipenyo a nakigubat idi ni amak gapu kadakayo. Impustana ti biagna tapno isalakannakayo kadagiti Midianita.

¹⁸Ngem ita, binusoryo ti familiana. Pinatayyo iti rabaw ti maysa a bato dagiti 70 nga annakna ket gapu ta kabagianyo ni Abimelec nga anakna iti babai a tagabuna, insaadyo nga ari iti Sikem.

¹⁹Ita ngarud, no nadayaw ken nainkalintegan ti inaramidyo ken ni Gideon ken iti familiana, makipagragsakkayo ken ni Abimelec ket isu makipagragsak met kadakayo.

²⁰Ngem no saan, rummuar koma ti apuy ken ni Abimelec ket puoranna dagiti taga-Sikem ken dagiti taga-Betmillo. Rummuar koma met ti apuy kadagiti taga-Sikem ken kadagiti taga-Betmillo ket puoranna ni Abimelec.”

²¹Kalpasanna, naglibas ni Jotam ket napan naglemmeng idiay Beer agsipud ta mabuteng ken ni Abimelec a kabsatna.

²²Kalpasan ti tallo a tawen a panangituray ni Abimelec iti Israel,

²³nangibaon ti Dios iti dakes nga espiritu a nangdadael iti panaglangen da Abimelec ken dagiti taga-Sikem. Iti kasta, binusorda ni Abimelec.

²⁴Naaramid daytoy tapno mabales da Abimelec ken dagiti lallaki a taga-Sikem a nangsugsog kenkuana a mangpapatay kadagiti 70 nga annak ni Gideon.

²⁵Nangibaon dagiti taga-Sikem kadagiti lallaki iti tapaw ti bantay tapno sanebenda ni Abimelec. Inarangda dagiti amin a tattao a lumabas sadiay. Nadamag ni Abimelec daytoy.

²⁶Napan idiay Sikem ni Gaal nga anak ni Ebed ken dagiti kakabsatna ket nagtalek kenkuana dagiti taga-sadiay.

²⁷Simrekda kadagiti kaubasanda sada nagburas iti ubas nga inaramidda nga arak. Nagrarambakda, napanda iti templo ti diosda, ket sadiay, nagkakaan ken nagiinumda bayat ti pananglalaisda ken ni Abimelec.

²⁸Kinuna ni Gaal, “Ania ti katataotayo a taga-Sikem? Apay nga agserbitayo ken ni Abimelec? Siasino aya ni Abimelec? Saan kadi nga anak laeng ni Gideon? Ket uray ni Zebul agtulnog kenkuana! Ngem apay nga agserbitayo ken ni Abimelec? Diyo ibabain ni Hamor a nagtaudan ti kaputotanyo!

²⁹No siak la koma ti mangituray kadakayo, ikkatek ni Abimelec. Ibagak ken ni Abimelec, ‘Papigsaem ti armadam ket rummuarka a makigubat!’”

³⁰Nakapungtot ni Zebul nga agturay iti siudad idi nangngegna ti sinao ni Gaal.

³¹Nangibaon iti mapan ken ni Abimelec nga adda idiay Aruma ket kinunana, “Adda ditoy Sikem ni Gaal ken dagiti kakabsatna ket saandaka a pastreken iti siudad.

³²Inton rabii, ikuyogmo dagiti tattaom, ket aglemmengkayo kadagiti taltalon.

³³Inton bigat, sapaenyo ti bumangon ket kellaatenyo a rauten ti siudad. No makiranget ni Gaal ken dagiti tattaona, dangramto ida iti amin a kabaelam.”

³⁴Inayaban ngarud ni Abimelec dagiti tattaona. Rimmuarda iti rabii ket naglemmengda iti ruar ti Sikem. Nabingbingayda iti uppat a grupo.

³⁵Rimmuar ni Gaal ket napan nagtakder iti ruangan ti siudad. Idi makita ni Abimelec ken dagiti tattaona, rimmuarda met iti naglemmenganda.

³⁶Nakita ni Gaal ida, ket kinunana ken ni Zebul, “Kitaem, adda tattao a sumalsalog manipud iti tapaw dagiti bantay.” Simmungbat ni Zebul, “Saan a tattao dagita; anniniwan laeng ti bantay.”

³⁷Kinuna manen ni Gaal, “Kitaem, adda tattao a sumalsalog iti bessang ket maysa a grupo ti magmagna iti dalan nga aggapu iti kayo ti lugo dagiti mammadles.”

³⁸Kinuna ni Zebul kenkuana, “Ayanna itan ti kinapangasmo? Dimo met kadi sinaludsod no siasino ni Abimelec, ta agserbikami kenkuana? Adtoyen dagiti tattao a linalaismo. Rummuarkan ta makirangetka kadakuada.”

³⁹Iti kasta, impanguloan ni Gaal dagiti taga-Sikem ket nakirupakda ken ni Abimelec.

⁴⁰Ngem kinamat ni Abimelec ni Gaal ket kapilitan a naglibas. Adu dagiti nasugatan agingga iti pagserkan ti ruangan.

⁴¹Nagsubli ni Abimelec idiay Aruma. Pinagtalaw ni Zebul ni Gaal ken dagiti kakabsatna, isu a didan nagnaed idiay Sikem.

⁴²Iti sumuno nga aldaw, naammoan ni Abimelec a panggep dagiti taga-Sikem ti mapan iti away.

⁴³Inummongna dagiti tattaona, biningayna ida iti tallo a bunggoy sada naglemmeng iti away. Idi makitana dagiti tattao a rummuar iti siudad, rimmuar met iti naglemmenganna ket pinatayna ida.

⁴⁴Nagdardaras met a napan ti bunggoy ni Abimelec iti ruangan ti siudad tapno guardiaanda. Dagiti met dua a grupo, dinarupda dagiti tattao nga adda iti away ket pinatayda amin ida.

⁴⁵Nagmalmalem ti dangadang. Nagballigi ni Abimelec a nangparmek iti siudad. Pinatayna dagiti tattao, rinebbekna ti siudad sana ginaburan iti asin.

⁴⁶Idi nadamag dagiti lallaki a pangulo ti sarikedked ti Sikem, napanda nagpakni iti torre ti templo ni Baal-berit.

⁴⁷Napakaammoan ni Abimelec a naguurnongda sadiay,

⁴⁸isu a simmang-atda kadagiti tattaona iti Bantay Zalmon. Nangala ni Abimelec iti wasay, pimmukan iti sanga ti kayo sana binaklay. Imbilinna kadagiti tattaona a darasenda a tuladen ti inaramidna.

⁴⁹Nagpukan met ti tunggal maysa iti sanga ket simmurotda ken ni Abimelec. Inggabsuonda dagiti sanga iti puon ti torre sada pinasgedan. Natay amin dagiti adda iti uneg ti torre—agarup 1,000 a lallaki ken babbai.

⁵⁰Kalpasanna, napan ni Abimelec idiay Tebes. Linakubda ti Tebes ket sinakupda.

⁵¹Adda nalagda a torre sadiay a napan nagkamangan dagiti amin a lallaki ken babbai iti siudad agraman dagiti panguloda. Binalunetanda ti ruangan ket napanda iti tuktok ti torre.

⁵²Idi dumteng ni Abimelec sadiay napan iti ruangan tapno puoranna ti torre.

⁵³Ngem adda babai a nangitupak iti gilingan a bato iti ulo ni Abimelec ket nabuong ti ulona.

⁵⁴Inayaban a dagus ni Abimelec ti lalaki nga agtutubo a para-iggem iti igamna ket kinunana kenkuana, “Asutem ta kampilanmo ket patayennak, ta diak kayat a masasaonto a pinataynak ti maysa a babai.” Iti kasta, dinuyokna ni Abimelec. Natay ni Abimelec.

⁵⁵Idi makita dagiti Israelita a natayen ni Abimelec, nagawidda amin.

⁵⁶Kasta ti panangbales ti Dios ken ni Abimelec gapu iti dakes nga inaramidna ken ni amana idi pinatayna dagiti 70 kakabsatna.

⁵⁷Pinagsagaba met ti Dios dagiti taga-Sikem gapu iti dakes nga inaramidda, kas kinuna ni Jotam nga anak ni Gideon idi inlunodna ida.