Read Iloko 3 John 1 Bible Online

3 John 1 - Iloko bible

3 John 1

¹Ingungotek a Gayo: Isuratko daytoy kenka, sika a pudno nga ay-ayatek.

²Patgek a gayyem, ikarkararagko a nasayaat latta koma ti kasasaadmo. Sapay koma ta nasalun-atka a kas iti ammok a naespirituan a panagbiagmo.

³Kasta unay ti ragsakko idi simmangpet dagiti kakabsat ket imbagada kaniak ti panagtalinaedmo iti pudno. Wen, ta agpayso met nga agbibiagka iti kinapudno.

⁴Awan sabali a makaited kaniak iti dakdakkel a ragsak, no di ti pannakadamagko nga agbibiag dagiti annakko iti kinapudno. Siak a Panglakayen ti naggapuan daytoy a surat.

⁵Ingungotek a gayyem, nasayaat unay ti panagserbim kadagiti kakabsat iti pammati, nangruna kadagiti ganggannaet.

⁶Impadamagda iti iglesia ditoy ti maipapan iti ayatmo. Pangngaasim ta tulongam ida nga agtuloy iti panagdaliasatda, iti wagas a makaay-ayo iti Dios.

⁷Ta nagluasda gapu iti panagserbi ken ni Cristo. Saanda nga umawat iti tulong dagiti Hentil.

⁸Datayo ngarud a mamati ti rumbeng a mangted iti kasapulan dagitoy a tattao tapno tumulongtayo iti pannakaisaknap ti kinapudno.

⁹Nagsuratak iti iglesia, ngem saannak nga ikankano ni Diotrefes. Kayatna ngamin nga isu ti agbalin a panguloda.

¹⁰Ngarud, inton umayak, iruarkonto amin nga ar-aramidenna, agraman dagiti iwarwarasna a pammadpadakesna kaniak. Ngem di pay la mapnek iti dayta. Saanna a sangailien dagiti kakabsat, ket saanna la a paritan dagiti mayat nga umawat kadakuada, no di pay ket kayatna a pagtalawen ida iti iglesia!

¹¹Patgek a gayyem, dimo tuladen ti dakes nga aramid. Tuladem ketdi ti naimbag. Kukua ti Dios ti agaramid iti naimbag. Ngem ti agaramid iti dakes, dina nakita ti Dios.

¹²Nasayaat ti ipadpadamag ti tunggal maysa maipapan ken ni Demetrio. Mismo a ti pudno ti mangpaneknek iti maipapan kenkuana. Wen, paneknekak met, ket ammom a pudno ti kunak.

¹³Adu koma pay ti ibagak kenka, ngem diak kayat nga isurat iti pluma ken tinta,

¹⁴ta agkitata iti mabiit, ket agsaotanto laengen a personal.

¹⁵Talna koma ti adda kenka. Pakomustaandaka dagiti gagayyemmo. Saggaysaem a pakomustaan dagiti gagayyem dita.