Read Iloko Revelation 14 Bible Online

Revelation 14 - Iloko bible

Revelation 14

¹Nakitak ti Kordero nga agtaktakder idiay Bantay Sion. Kaduana ti 144,000 a tattao a nasuratan ti mugingda iti nagan ti Kordero ken iti nagan ti Amana.

²Manipud sadi langit, adda nangngegko a timek a kasla daranudor ti dissuor ti danum ken napigsa a gurruod. Immaweng a kasla musika nga agtaud kadagiti matoktokar nga arpa.

³Nakasango dagiti 144,000 iti trono, kadagiti uppat a sibibiag a parsua ken kadagiti panglakayen. Agkankantada iti baro a kanta nga awan ti makasursuro malaksid laeng kadakuada a nasubbot ditoy daga.

⁴Isuda dagiti saan a natulawan babaen kadagiti babbai, ta nadalusda. Sumursurotda iti Kordero iti sadinoman a papananna. Isuda dagiti nasubbot iti sangkataoan ken dagiti umuna a maidaton iti Dios ken iti Kordero.

⁵Pulos a saanda a nagulbod. Awan mulitda.

⁶Kalpasanna, nakitak ti sabali nga anghel nga agtaytayab iti tangatang. Adda kenkuana ti agnanayon a mensahe ti Naimbag a Damag nga ipakaammona kadagiti agnaed ditoy rabaw ti daga, iti amin a puli, tribu, pagsasao ken pagilian.

⁷“Agbutengkay iti Dios,” impukkawna, “ket agdaydayawkayo iti kinatan-okna! Ta dimtengen ti tiempo a panangukomna. Agdaydayawkayo iti Dios a namarsua iti langit, daga, taaw ken kadagiti ubbog.”

⁸Simmaruno ti maikadua nga anghel ket kinunana, “Natnagen ti Babilonia! Wen, natnagen ti agdindinamag a siudad! Pinainumna dagiti amin a tattao iti arak—ti naingel nga arak ti kinaderrepna.”

⁹Simmaruno ti maikatlo nga anghel a nangipukkaw, “Dagiti agdaydayaw iti narungsot nga animal ken iti ladawanna, ken umawat iti marka iti muging wenno imana,

¹⁰inumendanto a mismo ti arak ti napalalo a pungtot ti Dios, ti arak nga imbukbokna nga awan lalaokna iti kopa ti pungtotna! Matutuokdanto iti apuy ken asufre iti sangoanan dagiti nasantoan nga angheles ken ti Kordero.

¹¹Agnanayon nga awan inggana ti panagpangato ti apuy a mangparparigat kadakuada. Aldaw ken rabii nga awan inana dagiti nagdaydayaw iti narungsot nga animal ken iti ladawanna, ken dagiti namarkaan iti naganna.”

¹²Daytoy ti pakasapulan iti panagibtur dagiti tattao ti Dios, dagiti agtulnog kadagiti bilin ti Dios ken dagiti agtalinaed iti pammati ken ni Jesus.

¹³Kalpasanna, nakangngegak iti timek a naggapu sadi langit. Kinunana kaniak, “Isuratmo daytoy: Manipud ita, nagasat dagiti matay iti panagserbida iti Apo.” “Wen, nagasat,” kuna ti Espiritu. “Makainanadan kalpasan ti nadagsen a trabahoda ta kumuykuyog kadakuada ti bunga ti panagserbida.”

¹⁴Kalpasanna, adda nakitak a puraw nga ulep a pagtugtugawan ti maysa a parsua nga umas-asping iti anak ti tao. Adda korona a balitok iti ulona ken nakaiggem iti natadem a kumpay.

¹⁵Sabali pay nga anghel ti rimmuar iti templo ket impukkawna iti agtutugaw iti ulep, “Aramatem ti kumpaymo ta aggapaska, ta dimtengen ti tiempo. Mabalinen ti agani iti daga!”

¹⁶Pinagparaspas ngarud ti nakatugaw iti ulep ti kumpayna ket nagapas ti apit ti daga.

¹⁷Adda manen sabali nga anghel a nakitak a rimmuar iti templo sadi langit. Nakaiggem met iti natadem a kumpay.

¹⁸Adda pay sabali nga anghel a nakitak a rimmuar iti altar. Isu ti agay-aywan iti apuy. “Aramatem ti kumpaymo,” impukkawna iti anghel a nakaiggem iti kumpay. “Burasem dagiti ubas iti daga, ta naluomdan!”

¹⁹Iti kasta, pinagparaspas ti anghel ti kumpayna, binurasna dagiti bunga ti ubas, ket impurruakna dagitoy iti dakkel a pagpespesan ti napalalo a pungtot ti Dios.

²⁰Napespes dagiti ubas iti ruar ti siudad, ket manipud iti pagpespesan, nagayus ti dara a dimmanon iti 320 a kilometro ti kaatiddog ken lima a kadapan ti kaadalem.