Read Iloko Revelation 18 Bible Online

Revelation 18 - Iloko bible

Revelation 18

¹Kalpasanna, nakitak ti sabali nga anghel a bumabbaba manipud langit. Adda dakkel a turayna ket rinaniagan ti dayagna ti entero a daga.

²“Natnagen!” impukkawna. “Natnagen ti Babilonia nga agdindinamag a siudad! Taeng laengen dagiti demonio ken dakes nga espiritu. Pagaponanen ti amin a kita ti agkakarugit ken nakarimrimon a tumatayab.

³Ta pinainumna dagiti amin a pagilian iti naingel nga arak ti kinaderrepna. Nakikamalala kenkuana dagiti ar-ari iti daga, ket bimmaknang dagiti agtagtagilako ditoy lubong gapu iti aglablabes a kinaderrepna.”

⁴Nangngegko ti sabali pay a timek a naggapu sadi langit a kunana: “Adaywanyo, rummuarkayo kenkuana, tattaok! Saankayo a makiraman kadagiti basbasolna, tapno diyo baklayen met ti pannakadusana!

⁵Ta tumukno sadi langit ti kaadu ti basolna, Ket dinto malipatan ti Dios ti kinadakesna.

⁶Ipalak-amyo kenkuana ti inaramidna kadakayo. Ibalesyo iti mamindua ti impaayna. Punnoenyo ti kopana iti inumen a napapait ngem ti insaganana kadakayo.

⁷No kasano ti kinapasindayag ken kinabarayuboyna, Kasta met ti rigat ken ladingit nga ipalak-amyo kenkuana. Ta kanayon nga ibagbagana iti bagina: ‘Naisaadak a reyna, saanak a maysa a balo. Diakto aglak-am iti ladingit uray kaano!’

⁸Gapu iti daytoy, aggigiddan nga agdissuor kenkuana dagiti didigra iti uneg ti maysa nga aldaw, Angol, ladingit ken bisin. Ket mapuoranto agingga a dumapu, ta mannakabalin ni Apo Dios a mangukom kenkuana.”

⁹Mapuoranto ti siudad ket agdung-aw ken agsasangitto dagiti ar-ari a nakikamalala ken nakiraman iti kinaderrepna inton makitada ti asuk ti apuy a mangikisap kenkuana.

¹⁰Agtakderdanto iti adayo agsipud ta mabutengda a mairaman iti pannakadusana. Kunadanto: “Nakabutbuteng! Iti uneg laeng ti maysa nga oras, nalpasen ti pannakadusa ti agdindinamag a siudad ti Babilonia!”

¹¹Sangitan ken dung-awanto met dagiti agtagtagilako ditoy daga ta awanen ti gumatang kadagiti tagilakoda.

¹²Awanen ti gumatang kadagiti balitok, pirak, agkakapateg a bato ken perlasda; kadagiti linen, ube, seda ken nalabaga a lupot; kadagiti amin nga agkakabanglo a kayo ken amin a kita ti alikamen a naaramid iti marfil ken agkakangina a kayo, bronse, landok ken marmol;

¹³ken kadagiti kanela, rekado, insenso, mirra ken olibano; kadagiti arak ken lana, arina ken trigo; kadagiti baka ken karnero, kabalio ken lugan, tagabu, kayatna a sawen, dagiti kararua dagiti tattao.

¹⁴Kunanto kenkuana dagiti agtagtagilako: “Awanen dagiti naimbag a bambanag a kayatmo a tagikuaen, ket saanton a mapasubli ti amin a kinabaknangmo agraman ti kinapintasmo!”

¹⁵Saan nga umasideg dagiti agtagtagilako a bimmaknang iti dayta a siudad agsipud ta mabutengda a mairaman iti panagsagabana. Agsangit ken agdung-awdanto,

¹⁶a kunada, “Nakabutbuteng ti napasamak iti agdindinamag a siudad! Agkawkawes idi iti nalabaga a lupot, de lana ken ube. Agar-aramat idi kadagiti alahas a balitok, agkakapateg a bato ken perlas!

¹⁷Iti las-ud laeng ti maysa nga oras, nagbalinda amin a dapu!” Manipud iti adayo, agbuybuya dagiti amin a kapitan ken tripulante ti barko, dagiti pasahero ken ti dadduma pay nga aggapu iti taaw ti pagbiagda.

¹⁸Agsangsangitda a mangbuybuya iti asuk ti maur-uram a siudad. “Awan umasping iti kinalatak dayta a siudad!” kinunada.

¹⁹Inikkanda dagiti uloda iti tapok ket kinunada a sililiday: “Nakabutbuteng! Nakaam-amak ti napasamak iti agdindinamag a siudad! Dayta a siudad ti bimmaknangan dagiti amin nga adda barkona nga agbibiahe. Ngem napukawna amin iti uneg ti maysa nga oras!”

²⁰Agragsakka, O langit, gapu iti pannakadadaelna; agragsakkayo, dakayo a tattao ti Dios, dakayo nga apostoles ken dakayo a profeta! Ta inukom ti Dios gapu iti inaramidna kadakayo!

²¹Kalpasanna, nangala ti maysa a mannakabalin nga anghel iti bato a kas iti kadakkel ti gilingan ket impurruakna iti baybay a kunkunana: “Kastoyto ti nakaam-amak a pannakatnag ti Babilonia nga agdindinamag a siudad, ket saanton a makita uray kaanoman.

²²Saanton a mangngeg iti siudadmo ti tokar dagiti umaarpa ken musiko, dagiti agpuypuyot iti fluta ken trumpeta. Awanton ti masarakan kenka a managpartuat. Saanton nga aguni dagiti gilingan!

²³Saannakanto metten a raniagan ti uray maysa a pagsilawan; saanto metten a mangngeg dagiti naragsak a timek ti agkasar. Dagiti komersiantem ti kabibilgan iti amin a lubong. Inallilawmo dagiti amin a nasion babaen iti salamangka.”

²⁴Nadusa ti Babilonia gapu ta nasarakan kenkuana ti dara dagiti profeta, dagiti tattao ti Dios ken dagiti amin a napapatay iti sangalubongan.