Read Iloko Revelation 2 Bible Online

Revelation 2 - Iloko bible

Revelation 2

¹“Kastoy ti isuratmo iti anghel ti iglesia idiay Efeso: “Daytoy ti mensahe nga aggapu iti mangig-iggem kadagiti pito a bituen iti makannawan nga imana ken agpagnapagna iti nagbabaetan dagiti pito a pagsilawan a balitok:

²Ammok dagiti aramidmo, dagiti panagbannog ken ti naanus a panagibturmo. Ammok a dimo maanusan dagiti dakes a tattao. Sinuotmo dagiti agpampamarang nga apostoles, ket natakkuatam nga ulbodda.

³Ammok a naanuska. Inturedmo dagiti rigat gapu kaniak ket saanka a naupay.

⁴Ngem daytoy ti diak kayat kenka: saannakon nga ay-ayaten a kas idi damo.

⁵Laglagipem ti kasasaadmo idi sakbay ti pannakatnagmo. Agbabawika ket agbiagka a kas idi nangrugika a nagkristiano. Ta no saanka nga agbabawi, umaykonto ikkaten ti pagsilawam iti nakaisaadanna.

⁶Ngem adda met naimbag kenka: guraem, kas kaniak, ti ar-aramiden dagiti Nicolaita.

⁷“No adda pannakaawatyo, denggenyo ngarud ti sao ti Espiritu kadagiti iglesia: “Ti agballigi, ikkakto iti kalintegan a mangan iti bunga ti kayo ti biag nga adda iti minuyongan ti Dios.”

⁸“Kastoy ti isuratmo iti anghel iti iglesia idiay Esmirna: “Daytoy ti mensahe nga aggapu iti Pangrugian ken Paggibusan, isu a natay ken nagbiag manen:

⁹Ammok dagiti pakariribukam. Ammok met a napanglawka, ngem iti kinapudnona, nabaknangka! Ammok pay dagiti pammadpadakes kenka dagiti agkunkuna a Judioda uray no saan met. Maysada a bunggoy nga agdaydayaw ken ni Satanas.

¹⁰Dika agbuteng kadagiti panagsagaba a dumtengto kenka. Denggem, suotennaka ti Diablo babaen iti panangipisokna iti sumagmamano kadakayo iti pagbaludan. Agrigatkayto iti uneg ti sangapulo nga aldaw. Agtalinaedka ngarud a mapagtalkan uray pay no isut' pakatayam ket itedkonto kenka ti biag a kas gunggona ti balligim.

¹¹“No adda pannakaawatyo, denggenyo ngarud ti sao ti Espiritu kadagiti iglesia: “Ti agballigi, malisiannanto ti maikadua nga ipapatay.”

¹²“Kastoy ti isuratmo iti anghel ti iglesia idiay Pergamo: “Daytoy ti mensahe nga aggapu iti addaan iti natadem a kampilan a dua ti tademna:

¹³Ammok ti pagnaedam—ti lugar a yan ti trono ni Satanas. Nupay kasta, nagtalinaedka a napudno kaniak. Dimo tinallikudan ti pammatim kaniak uray idi tiempo ni Antipas a mapagtalkan a saksik a napapatay iti daydiay a pagtaengan ni Satanas.

¹⁴Ngem adda diak kayat kenka: adda sumagmamano kadakayo dita a pasurot ni Balaam. Isu ti nangisuro ken ni Balak a mangaramid iti pagbasolan dagiti Israelita babaen iti pannanganda iti taraon a naidaton kadagiti didiosen ken panagaramidda kadagiti immoralidad.

¹⁵Adda met sumagmamano kadakayo a sumursurot iti pannursuro dagiti Nicolaita.

¹⁶Agbabawika ngarud kadagiti basbasolmo. Ta no saan, umayak kenka iti mabiit ket pukawek dagita a tattao babaen iti kampilan a rummuar iti ngiwatko.

¹⁷“No adda pannakaawatyo, denggenyo ngarud ti kuna ti Espiritu kadagiti iglesia: “Ti agballigi, ikkakto iti naidulin a taraon. Ikkakto pay ti tunggal maysa iti puraw a bato a nakaimalditan ti baro a nagan nga awan ti makaammo malaksid ti umawat.”

¹⁸“Kastoy ti isuratmo iti anghel ti iglesia idiay Tiatira: “Daytoy ti mensahe nga aggapu iti Anak ti Dios nga addaan kadagiti mata a gumilgil-ayab a kasla apuy ken kadagiti saksaka nga agranraniag a kas iti napasileng a gambang.

¹⁹Ammok dagiti aramidmo, ti ayat ken pammatim, ti panagserbim ken ti naanus a panagibturmo. Ammok nga ad-adu ti ar-aramidem ita ngem idi damo.

²⁰Ngem daytoy ti diak kayat kenka: palpalugodam ni Jezebel, dayta babai nga agpampamarang a profeta. Isursuro ken isungsongna dagiti adipenko a makikamalala ken mangan kadagiti taraon a naidaton kadagiti didiosen.

²¹Inikkak iti naan-anay a panawenna nga agbabawi kadagiti basbasolna ken mangtallikud iti immoral a panagbiagna, ngem dina kayat ti agbalbaliw.

²²Adtoy, idalitkonto iti pagiddaan, agraman dagiti nakikamalala kenkuana. Agsagabadanto iti nakaro malaksid no agbabawida iti kinadakes nga inaramidda iti sidongna.

²³Papatayekto met dagiti annakna tapno maammoan dagiti iglesia nga ammok ti panunot ken tarigagay dagiti tattao. Dusaekto ti tunggal maysa kadakayo, segun ti inaramidyo.

²⁴“Ngem ti dadduma kadakayo dita Tiatira, diyo sinurot daytoy dakes a pannursuro. Saanyo a nasursuro ‘ti nauneg a palimed ni Satanas,’ kas kuna ti dadduma. Kunak kadakayo a dikayton pabaklayan iti sabali nga awit.

²⁵Ngem masapul a pagtalinaedenyo a natibker ti adda kadakayo agingga iti yaayko.

²⁶Ti agballigi nga agtungpal iti pagayatak agingga iti panungpalan, ikkakto iti pannakabalin a kas iti inawatko ken ni Amak: Pagturayekto kadagiti nasion

²⁷tapno iturayanna ida babaen iti baston a landok ken burburakenna ida a kas iti damili a banga.

²⁸Itedkonto met kenkuana ti bituen nga agraniag iti agsapa.

²⁹“No adda pannakaawatyo, denggenyo ngarud ti sao ti Espiritu kadagiti iglesia.”