Read Iloko Revelation 22 Bible Online

Revelation 22 - Iloko bible

Revelation 22

¹Impakita pay ti anghel ti karayan ti danum ti biag. Nalitnaw a kas kristal ti danumna nga agubbog manipud iti trono ti Dios ken ti Kordero.

²Agayus ti karayan iti tengnga ti kalsada ti siudad. Iti agsumbangirna, adda dagiti puon ti kayo ti biag a binulan nga agbunga, ket nasamay dagiti bulongda a pangagas iti sakit dagiti pagilian.

³Awan sadiay ti aniaman nga inlunod ti Dios. Masarakan iti siudad ti trono ti Dios ken ti Kordero ket agdaydayawto kenkuana dagiti adipenna.

⁴Makitadanto ti rupana ket maisuratto ti naganna iti mugingda.

⁵Awan ti rabii sadiay ket didanto masapul ti pagsilawan wenno ti lawag ti init agsipud ta ni Apo Dios ti silawdanto ket agaridanto iti agnanayon nga awan inggana.

⁶Kalpasanna, kinunana, “Napudno ken mapangnamnamaan dagitoy a sao. Ni Apo Dios a nangted iti Espirituna kadagiti profeta, isu ti nangibaon iti anghelna tapno ipakitana kadagiti adipenna met laeng ti masapul a mapasamak iti mabiit.

⁷Umayakon! Nagasat dagiti agtungpal kadagiti padto a nailanad iti daytoy a libro!”

⁸Siak ni Juan a nakangngeg ken nakakita kadagitoy a bambanag. Kalpasan ti pannakangngeg ken pannakakitak kadagitoy, nagpaklebak iti sakaanan ti anghel tapno agdaydayawak kenkuana.

⁹Ngem kinunana kaniak: “Saanmo nga aramiden ti kasta! Adipenak met a kas kenka, kas kadagiti kakabsatmo a profeta ken kas kadagiti amin nga agtulnog kadagiti sao iti daytoy a libro. Ti Dios laeng ti pagdaydayawam!”

¹⁰Kinunana pay: “Dimo ilimed dagiti padto iti daytoy a libro agsipud ta asidegen ti pannakapasamakda.

¹¹Agtultuloy a dumakes ti managdakdakes. Agtultuloy nga agbiag a narugit ti narugit ti panagbiagna, ngem agtultuloy nga agaramid iti nalinteg ti nalinteg, ket ti nasantoan, agtultuloy ti panagbiagna a nasantoan.”

¹²Naibaga kaniak: “Dumngegkayo, umayakon! Itugotko dagiti gunggona nga itedko iti tunggal maysa kas mayannurot iti inaramidna.

¹³Siak ti Alfa ken ti Omega, ti umuna ken ti maudi, ti pangrugian ken ti panungpalan.”

¹⁴Nagasat dagiti mangdalus kadagiti kawesda ta maikkanda iti kalintegan a sumrek iti siudad ken mangan iti bunga ti puon ti kayo a mangted iti biag.

¹⁵Ngem mabati iti ruar ti siudad dagiti narukop a tattao, dagiti managsalamangka, dagiti mannakikamalala, dagiti mammapatay, dagiti agdaydayaw kadagiti didiosen ken dagiti managayat ken agaramid iti kinaulbod.

¹⁶“Siak ni Jesus a nangibaon iti anghelko tapno saksianna dagitoy kadakayo nga adda kadagiti iglesia. Nagtaudak iti ramut ken kaputotan ni David. Siak ti naraniag a bituen ti agsapa.”

¹⁷“Umayka!” kuna ti Espiritu ken ti Babai a Maikallaysa. “Umayka!” kuna met ti amin a makangngeg iti daytoy. Umasideg ti siasinoman a mawaw. Awaten ti siasinoman a mayat ti danum ti biag a kas sagut.

¹⁸Siak ni Juan. Ballaagak ti siasinoman a makangngeg kadagiti padto a naisurat iti daytoy a libro: No adda mangnayon kadagitoy, inayonto met ti Dios iti dusana dagiti didigra a naisurat iti daytoy.

¹⁹Ket no adda mangikkat iti aniaman kadagiti padto a naisurat iti daytoy, ikkatento met ti Dios ti kalinteganna a mairanud iti kayo ti biag. Ikkatento pay ti Dios ti kalinteganna a mairaman iti Nasantoan a Siudad kas nailanad iti daytoy a libro.

²⁰Kuna ti mangpaneknek iti daytoy, “Agpayso nga umayakon!” Amen! Umaykan, Apo Jesus!

²¹Sapay koma ta magun-od ti amin a tattao ti Dios ti parabur ni Apo Jesus. Amen.