Read Iloko Revelation 8 Bible Online

Revelation 8 - Iloko bible

Revelation 8

¹Idi ikkaten ti Kordero ti maikapito a timbre, nagturay ti ulimek sadi langit iti agarup tallopulo a minuto.

²Kalpasanna, nakitak a naikkan iti trumpeta ti tunggal maysa kadagiti pito nga angheles a nakatakder iti sangoanan ti Dios.

³Simmangpet ti sabali nga anghel nga addaan iti insensario a balitok, ket napan nagtakder iti sango ti altar. Naikkan iti nawadwad nga insenso nga inayonna kadagiti kararag dagiti tattao ti Dios ken idatonna iti balitok nga altar iti sangoanan ti trono.

⁴Manipud iti ima ti anghel a sitatakder iti sangoanan ti Dios, nagpangato ti asuk ti mapupuoran nga insenso a naikuyog kadagiti kararag dagiti tattao ti Dios.

⁵Kalpasanna, innala ti anghel ti insensario, kinargaanna kadagiti beggang manipud iti altar sana impurruak iti daga. Naggurruod, rimsua ti napigsa nga arimbangaw, nagkimat ken nagginggined.

⁶Nagsagana dagiti pito nga angheles a mangpuyot kadagiti trumpetada.

⁷Pinuyot ti umuna nga anghel ti trumpetana. Nagtudo iti yelo ken apuy a nalaokan iti dara. Napuoran ti apagkatlo a paset ti daga, ti apagkatlo dagiti amin a kaykayo ken dagiti amin a nalangto a ruot.

⁸Pinuyot ti maikadua nga anghel ti trumpetana. Adda sumsumged a kasla dakkel a bantay a naipurruak iti taaw. Nagbalin a dara ti apagkatlo a paset ti taaw.

⁹Natay ti apagkatlo dagiti nabiag a parsua iti taaw ken nadadael ti apagkatlo dagiti barko.

¹⁰Pinuyot ti maikatlo nga anghel ti trumpetana. Manipud langit, natnag ti maysa a dakkel a bituen a sumsumged a kasla pagsilawan, ket nagdisso iti apagkatlo a paset dagiti karayan ken dagiti ubbog.

¹¹(“Napait”—daytoy ti nagan ti bituen.) Pimmait ti apagkatlo a paset dagiti danum, ket natay ti adu a tattao ta napait ti danum nga ininumda.

¹²Pinuyot ti maikapat nga anghel ti trumpetana. Nadadael ti apagkatlo a paset ti init, ti apagkatlo a paset ti bulan ken ti apagkatlo a bilang dagiti amin a bituen, isut' gapuna a napukaw ti apagkatlo a lawagda. Nagsipnget iti apagkatlo a paset ti aldaw ken iti apagkatlo a paset ti rabii.

¹³Kalpasanna, nakitak ti maysa nga agila nga agtaytayab iti langit ket nangngegko nga impukkawna: “Nakaal-alingget! Nakaal-alingget! Nakaal-alinggetto ti pagbanagan dagiti amin a tattao ditoy rabaw ti daga inton pagunien dagiti tallo nga angheles ti trumpetada.”