Read Iloko Revelation 9 Bible Online

Revelation 9 - Iloko bible

Revelation 9

¹Pinuyot ti maikalima nga anghel ti trumpetana. Nakitak ti maysa a bituen a natnag manipud langit a nagdisso ditoy daga, ket naited kenkuana ti tulbek ti ruangan ti nakaun-uneg a yuyeng.

²Idi luktanna ti yuyeng, rimmuar ti asuk a kasla iti asuk a naggapu iti dakkel nga urno. Nagsipnget ti init ken ti tangatang gapu iti asuk.

³Manipud iti asuk, nagruar dagiti dudon ket nagdissoda iti daga. Naikkanda iti pannakabalin a mannilud a kas iti pannakabalin a naited kadagiti manggagama.

⁴Nabilinda a dida dadaelen dagiti ruot wenno dagiti kayo wenno uray ania a mula. Dagiti laeng tattao nga awan marka ti timbre ti Dios iti mugingda ti ranggasanda.

⁵Saan a napalubosan dagiti dudon a pumatay kadagitoy a tattao, no di ket parigatenda laeng ida iti las-ud ti lima a bulan. Umasping ti ut-ot iti silud ti manggagama ti ut-ot ti panangparigatda.

⁶Kabayatan dagita nga aldaw, sapulento dagiti tattao ti patay ngem didanto masarakan. Kayatdanto ti matay ngem itarayanto ida ni patay.

⁷Kasla kabalio a nakasagana a makigubat dagiti dudon. Adda kasla korona a balitok iti uloda. Kasda la agruprupa a tao,

⁸agbubuok a babai, ken agngipngipen a leon.

⁹Naabbongan dagiti barukongda iti kasla kabal a landok. Agkaykay-ab dagiti payakda ket kasla uni ti karadakad ti adu a lugan a guyguyoden dagiti kabalio nga agdardaras nga agturong iti paggugubatan.

¹⁰Adda ipus ken siludda a kas iti manggagama. Adda iti ipusda ti pannakabalin a mangparigat kadagiti tattao iti las-ud ti lima a bulan.

¹¹Adda arida a mangituray kadakuada, ket isu ti anghel a mangbambantay iti nakaun-uneg a yuyeng. Abaddon ti naganna iti Hebreo, ket Apolion met iti Griego (kayatna a sawen, “Ti Mangdadael”).

¹²Nalpasen ti umuna a nakabutbuteng a didigra. Dua pay dagiti dumteng.

¹³Pinuyot ti maikanem nga anghel ti trumpetana. Nakangngegak iti timek a naggapu kadagiti suli ti altar a balitok iti sangoanan ti Dios.

¹⁴Kinunana iti maikanem nga anghel nga adda trumpetana: “Ruk-atam dagiti uppat nga angheles a nakagalut iti dakkel a karayan Eufrates.”

¹⁵Naruk-atan dagiti uppat nga angheles. Naisaganada a mangpatay iti apagkatlo a bilang ti amin a tattao iti daytoy met la nga oras, aldaw, bulan ken tawen.

¹⁶Naibaga kaniak ti bilang dagiti nagkabalio a bunggoy: 200 a milion.

¹⁷Ket nakitak iti parmatak dagiti kabalio ken dagiti nakasakay a nakakabal iti kasla kolor ti apuy, asul a kasla kolor ti safiro ken amarillo a kasla kolor ti asufre. Kasla ulo ti leon ti ulo dagiti kabalio. Agipugpugsoda iti apuy, asuk ken asufre.

¹⁸Natay ti apagkatlo dagiti amin a tattao babaen kadagitoy a didigra: ti apuy, ti asuk ken ti asufre nga aggapu iti ngiwat dagiti kabalio.

¹⁹Adda pannakabalin iti ngiwatda, kasta met iti ipusda. Kasla uleg nga addaan iti ulo dagiti ipusda, ket dagitoy ti pangparigatda kadagiti tattao.

²⁰Saan a nagbabawi dagiti tattao a nakalasat kadagitoy a didigra. Dida insardeng ti panagdaydayawda kadagiti demonio ken kadagiti didiosen nga inaramidda—dagiti ladawan a balitok, pirak, bronse, bato ken kayo a di makakita, makangngeg wenno makapagna.

²¹Saanda met a nagbabawi iti panagpappapatayda, panagan-anitoda, pannakikamkamalalada ken panagtaktakawda.