Read Iloko Ruth 1 Bible Online

Ruth 1 - Iloko bible

Ruth 1

¹Idi panawen a panagturay dagiti ukom iti Israel, adda bisin a nagsaknap iti pagilian. Iti kasta, napan nagnaed idiay Moab iti apagbiit a tiempo ti maysa a lalaki a taga-Betlehem idiay Juda. Inkuyogna ti asawana ken dagiti dua a lallaki nga annakna.

²Elimelec ti nagan ti lalaki, Noemi ti nagan ti asawana, ket Mahalon ken Kilion dagiti annakda. Nagtaudda iti kapuonan ni Efrata.

³Kabayatan ti kaaddada idiay Moab, natay ni Elimelec ket naulila ni Noemi ken dagiti dua nga annakna.

⁴Nangasawa dagiti annakna kadagiti Moabita. Orfa ti nagan ti maysa, Ruth ti sabali. Kalpasan ti dandani sangapulo a tawen a panagnaedda sadiay,

⁵natay da Mahalon ken Kilion. Nabalo ni Noemi ket natay met dagiti dua nga annakna.

⁶Nadamag ni Noemi a pinaraburan ni Yahweh dagiti tattaona iti nawadwad nga apit. Iti kasta, nagsagana a pumanaw iti Moab agraman dagiti manugangna.

⁷Nagdaliasatda nga agsubli idiay Juda ngem iti dalan,

⁸kinuna ni Noemi kadagiti manugangna, “Agsublikayon ket makipagnaedkayo kadagiti innayo. No kasano ti kinaimbagyo kaniak ken kadagiti pimmusay nga annakko, kasta koma met ti kinaimbag ti Apo kadakayo.

⁹Ipalubosna koma a maasawaankayo manen ket maaddaankayo iti baro a familia.” Inagkan ni Noemi dagiti manugangna a kas pammakadana ngem nagsangitda iti napigsa.

¹⁰Kinunada kenkuana, “Saan! Sumurotkami kenka nga agsubli kadagiti kailiam.”

¹¹“Annakko, masapul nga agsublikayo,” insungbat ni Noemi. “Apay a kayatyo ti sumurot kaniak? Makaanakak pay aya iti mangasawa kadakayo?

¹²Agawidkayon kadagiti balbalayyo, ta baketakon a makiasawa manen. Uray pay no kunak nga adda namnamak ket makiasawaak ita a rabii tapno aganakak,

¹³makauraykayo kadi agingga a makadakkel dagiti annakko? Daytoy kadi ti makalapped iti pannakiasawayo iti sabali? Annakko, ammoyo a narigat a mapasamak dayta. Binaybay-annak ti Apo, ket maasianak kadakayo.”

¹⁴Nagsangit manen dagiti manugang ni Noemi. Kalpasanna, inagkan ni Orfa ti katuganganna sa nagpakada, ket nagawid. Ngem saan a pinanawan ni Ruth ti katuganganna.

¹⁵Kinuna ni Noemi kenkuana, “Ruth, kitaem, nagsublin ti abiratmo kadagiti kailianna ken iti didiosenna. Agawidka metten.”

¹⁶Ngem insungbat ni Ruth, “Diyo koma kiddawen a panawankayo. Palubosandak koma a sumurot kadakayo. Umayak iti sadinoman a papananyo. Agnaedak iti sadinoman a pagnaedanyo. Kailiak metten dagiti kailianyo, ket ti Diosyo isu metten ti Diosko.

¹⁷Iti sadinoman a pakatayanyo, sadiayto metten ti pakatayak ken pakaitanemak. Dusaennak koma ti Dios no ipalubosko ti aniaman a banag a mamagsina kadatayo malaksid ken ni patay.”

¹⁸Idi makita ni Noemi a natibker ti pangngeddeng ni Ruth, saanen a nagtagtagari.

¹⁹Intuloyda ti nagbiahe agingga a nakadanonda idiay Betlehem. Idi sumangpetda, nasdaaw ti amin. Sinaludsod dagiti babbai, “Pudno kadi a sika ni Noemi?”

²⁰Kinunana, “Didak awagan iti Noemi. Awagandak iti Mara, ta pinarigatnak ti Dios a Mannakabalin-amin.

²¹Narang-ayak idi pumanawak ditoy, ngem ita, ima-imaak nga insubli ti Apo. Apay nga awagandak iti Noemi idinto a dinidigra ken pinarigatnak ti Apo a Mannakabalin-amin?”

²²Kastoy ti napasamak idi nagsubli ni Noemi idiay Betlehem manipud Moab. Kaduana ni Ruth, ti Moabita a manugangna. Mangrugin ti panagani iti sebada idi sumangpetda idiay Betlehem.