Read Iloko Ruth 3 Bible Online

Ruth 3 - Iloko bible

Ruth 3

¹Iti maysa nga aldaw, kinuna ni Noemi ken ni Ruth, “Masapul nga ibirokanka iti asawam, tapno adda met bukodmo a taeng.

²Laglagipem a kabagianta ni Boaz. Isu ti among dagidi babbai a kinaduam a nagani iti talonna. Denggem ti ibagak. Agpairik ni Boaz iti sebada inton rabii.

³Agdigoska, agbangbangloka ket ikawesmo ti kapintasan a pagan-anaymo saka mapan iti pagpairikanna. Ngem dimo ipadpadlaw ken ni Boaz ti kaaddam agingga a malpas a mangan ken uminum.

⁴Siputam a naimbag no sadino ti pagturoganna. Inton namnamaem a nakaturogen, mapanka iti ayanna, ilukaismo ti ulesna, ket agiddaka iti sakaananna. Ibagananto ti rumbeng nga aramidem.”

⁵“Aramidek amin nga ibalakadyo,” insungbat ni Ruth.

⁶Napan ni Ruth iti pagirikan ket inaramidna amin nga imbilin ti katuganganna.

⁷Kalpasan ti pannangan ken panaginum ni Boaz, mayat ti riknana. Napan naturog iti pempen ti sebada. Nagin-inayad nga immasideg ni Ruth ket ingngatona ti ules sa nagidda iti sakaanan ni Boaz.

⁸Idi makariing ni Boaz, nagballikid, ket nasdaaw a nakakita iti maysa a babai nga agid-idda iti sakaananna.

⁹“Siasinoka?” sinaludsod ni Boaz. “Siak ni Ruth nga adipenmo, apo,” insungbatna. “Gapu ta asideg a kabagianka, adda kalintegam a mangasawa kaniak.”

¹⁰“Bendisionannaka koma ti Apo,” kinuna ni Boaz. “Iti daytoy nga inaramidmo, dakdakkel nga adayo ti panangipakitam iti kinapudnom kadakami nga agkakabagian ngem ti inaramidmo iti katugangam. Ngamin, dika nagsapul iti agtutubo, nabaknang man wenno napanglaw.

¹¹Dika agdanag, Ruth. Ammo dagiti amin nga umili a naimbagka a babai. Aramidek amin a dawatem.

¹²Pudno nga asideg ti panagkabagianta, ngem adda lalaki nga as-asideg a kabagiam ngem siak.

¹³Maturogkan, ket inton bigat, ammoenta no kayatna nga isu ti mangaywan kenka. No kayatna, naimbag. Ngem no saan, isapatak iti nagan ti Dios a sibibiag a siak ti mangaywan kenka. Ita, maturogkan agingga iti agsapa.”

¹⁴Naturog ngarud ni Ruth iti sakaanan ni Boaz agingga iti agsapa, ngem bimmangon sakbay nga aglawag ta kayat ni Boaz nga awan ti makaammo a naturog sadiay.

¹⁵Kinuna ni Boaz kenkuana, “Uksobem ta kagaymo ket yaplagmo ditoy.” Inikkat ni Ruth ti kagayna, ket binukbokan ni Boaz iti dandani 23 a kilo ti sebada sana tinulongan nga impasusuon kenkuana. Nagawid,

¹⁶ket napan ken ni katuganganna. “Kumusta ti napanam, anakko?” sinaludsod ni Noemi. Imbaga ni Ruth kenkuana ti amin nga inaramid ni Boaz.

¹⁷Kinunana pay, “Imbagana kaniak a saan a mabalin nga agawidak nga ima-ima, isut' gapuna nga intedna kaniak dagitoy a sebada.”

¹⁸Kinuna ni Noemi kenkuana, “Agan-anuska, Ruth, agingga a maammoam ti pagbanagan daytoy. Saan nga agtalna ni Boaz ita nga aldaw agingga a marisutna daytoy.”