Read Iloko Ruth 4 Bible Online

Ruth 4 - Iloko bible

Ruth 4

¹Napan ni Boaz iti ruangan ti siudad, iti disso a masansan a pagtitiponan dagiti tattao, ket nagtugaw sadiay. Iti saan a nabayag, limmabas ti lalaki a kaasitgan a kabagian ni Elimelec, ti lalaki nga imbaga ni Boaz ken ni Ruth. Inayabanna sana kinuna, “Kabagian, mabiit laeng! Agtugawka.” Iti kasta, immasideg ti lalaki ket nagtugaw iti abay ni Boaz.

²Kalpasanna, nangayab ni Boaz iti sangapulo kadagiti papangulo ti ili ket pinagtugawna ida iti yanda. Idi nakatugawdan,

³kinunana iti kabagianna, “Ita ta nagsublin ni Noemi manipud Moab, kayatnan nga ilako ti talon daydi Elimelec a kabagianta.

⁴Napanunotko a masapul a maammoam daytoy. Ita ngarud, no kayatmo, gatangem ti talon iti imatang dagitoy papangulo nga adda a situtugaw ditoy. Ngem no dimo kayat, ibagam, ta dakdakkel ti kalintegam a gumatang ngem siak.” “Gatangek ti talon,” insungbat ti lalaki.

⁵“Ngarud, no gatangem ti talon ken ni Noemi,” kinuna ni Boaz, “asawaem met ni Ruth, ti balo a taga-Moab, tapno agtalinaed ti talon a kukua ti familia daydi natay a kabagianta.”

⁶Simmungbat ti lalaki, “No kasta ngarud, bay-akon ti kalintegak a manggatang iti talon, ta kaipapananna a dinto tawiden dagiti annakko. Sika laengen ti gumatang.”

⁷Kastoy idi ti ugali dagiti Israelita: No gumatang wenno makisinnukatda iti sanikua, uksoten ti naglako ti sapatosna sana ited iti gumatang a mangipakita iti pannakarisut ti nagtulaganda.

⁸Iti kasta, apaman nga imbaga ti lalaki a ni laengen Boaz ti gumatang iti talon, inuksotna ti sapatosna sana inted ken ni Boaz.

⁹Kinuna ni Boaz kadagiti papangulo ken kadagiti amin nga adda sadiay, “Ita nga aldaw, dakayo ti saksi a ginatangko ken ni Noemi ti amin a sanikua da Elimelec, Kilion ken Mahalon nga annakna.

¹⁰Maysa pay, asawaek ni Ruth a Moabita, ti asawa daydi Mahalon, tapno agtalinaed ti sanikua iti familia daydi natay. Iti kasta, saan a mapukaw ti kaputotanna kadagiti tattaona ken iti pagilianna. Dakayo ti saksi iti daytoy ita nga aldaw.”

¹¹Kinuna dagiti papangulo ken dagiti dadduma nga adda sadiay, “Wen, dakami ti saksi. Sapay koma ta bendisionan ti Apo daytoy a babai, kas kada Raquel ken Lea a nangted iti adu nga annak ken ni Jacob. Rumang-ayka koma iti kapuonan ni Efrata, ket agdinamagka koma ditoy Betlehem.

¹²Sapay koma ta dagiti annak nga ited ti Apo kadakayo iti daytoy a babai pagbalinenda ti familiayo a kas iti familia ni Perez nga anak da Juda ken Tamar.”

¹³Inasawa ngarud ni Boaz ni Ruth ket inyawidna. Pinaraburan ida ni Yahweh iti anak a lalaki.

¹⁴Kinuna dagiti babbai ken ni Noemi, “Madaydayaw koma ti Apo! Ita nga aldaw, inikkannaka iti apoko a mangaywan kenka. Sapay koma ta agbalinto a nalatak ti ubing iti Israel!

¹⁵Ipatpategnaka ti manugangmo. Ad-adu ti inaramidna kenka ngem ti pito a lallaki nga annak. Ita, inikkannaka iti apoko a mangted iti baro a biag kenka ken mangted iti talged iti kinabaketmo.”

¹⁶Inubba ken inarakup ni Noemi ti ubing, ket inaywananna.

¹⁷Obed ti impanagan dagiti babbai iti ubing. Kinunada kadagiti amin a tao, “Naipasngay ti maysa a lalaki iti familia ni Noemi!” Isu ti ama ni Jesse nga ama ni David.

¹⁸Daytoy ti kapuonan ni David manipud ken ni Perez: Perez, Hezron, Ram, Aminadab, Naason, Salmon, Boaz, Obed, Jesse, David.